Sabit Rrustemi: Merre ma shtruar

Sabit RRUSTEMI

ZJARRMI E KTHJELLTË

M e r r e   m a   s h t r u a r

ZGJIMI
 
I njëjtë do jetë
Si dje pardje
Larg Çepurit
Pa një puhi mali
E aromë fushe
 
Një orëzile telefoni
Rrapëllimë dere
Disa të teshtitura
Radhazi
Do të të shkundin
Dhe këtë mëngjes
 
Në vend të asaj gurreje
Që të rrjedhë vetëm n’kujtesë
 
DETYRAT

Futi mbulesat në vitrinë
Rregullo shtratin
Dhe shtatin
 
Dil e ecë koridorit
Në kuzhinë
Pastro gotat e palara
Krijo atmosferë
Për kafe mëngjesi
 
Mos i harro
Dritat e ndezura në ndërkohë
Nga rikthimi i korentit
 
Një muzikë këndelljeje
Të prêt para ekranit
Me pamjen e një bukurosheje

GJATË DITËS

Do kesh një orar të ngjeshur
 
Sa në krye të shehrit
Tek qendra
Për t’ia lehtësuar dhimbjet
Ditës sate
Me një bocë të re gjaku
 
Sa kah sheshi
Për t’i takuar miqtë
 
Pastaj në teatër
Për një skenë të re politike
E një goditje të ulët
Nën brez

KARRIERA

Me xhepa të zbrazur
Je i përflakur
 
Kuzhinat janë stërmbushur
Me trurë
Moshash të ndryshme
 
Dhe çmime tejet të lira
 
Ma mirë kthehu kah vendlindja
Tek ajo fidanishtja
Për gjumë të qetë
Nën hije pemësh të vjetra
 
KUJDES

Letrat anonime që vijnë
Përmes faqesh interneti
Mos i lexo
Fshiji
Që të mbrohesh nga virusët e rinj
Adresat me porosi
 
Në ëndrra të reja mos u lësho
Trupin tënd
Brenda vetes
E streho

DASHURIA

Është fshehur diku thellë

Kohë e kohë
Të duhet
Për t'u kthjellë
 
Kërkoje aty ku e takove
Së fundmi herë
Se kjo vjeshtë me erë
E thyen
E përdredhë
 
Ai planet ëndrrash
Përpëlitet nëpër dredhë
 
Shpalo sa më parë zemrën
Tënden dorë
Që t'mos shkrihet si meteorë

SHËNDETI

Merri gjërat shtruar
Ruaju nga tensionet
Nga ambicja që fshihet
Pas një ëndrreje
 
Ma shpesh
Ecë nëpër Çepur
Deri tek ajo maje
 
Lirohu ofshamash
Nga ajo shkumë
Mbetur nën gjuhë
Prej kohësh
 
(3 nëntor 2010)

TASH PO DESHE

Nëse je diku thellë
Asaj kupe të kaltër
Zgjati gishtërinjtë
E prite  n shuplakë
Puthjen e saj

Po të kaploi etja
Dil tek ai krua
Nën atë Lis Çarri
Në shtratin prej bari

Aty tashmë një grishëz
Shtrihet bri teje
E një  fjalë s’ i a thua

Koha e  fjalëve
Nuk u shterrua

Gjethe të ngjyëngjyrta pylli
Nëpër perde të arta dielli
Do bien mbi  trupin tënd

Do bien pa pushim

(15 gusht 2011)