Vasil Tabaku

 

ME KËNGËN TIME DHE JETËN

 

Vasil Tabaku: “ME KËNGËN TIME DHE JETËN”, poezi, botoi Shtëpia Botuese  “Naim Frashëri” Tiranë 1987.  Redaktor: STAVRI DAJO; Recensent: Klara KODRA dhe Moikom ZEQO.

(B.M.) dhe (B.V.) : 891.983-1  T- 12

 

 

 

ATE ÇFARE DUA

 

Atë çfarë dua tani,

e urrej më vonë

Atë që urrej tani e dua më pas...

Më thoni

çfarë të urrej

dhe çfarë të dua

në këtë botë të ndërtuar

nga DASHURIURREJTJA?...

 

 

 

HESHTJA

 

Heshtja,

kjo dhimbje e verbër,

shpesh na çon n dyert e trishtimit,

mos i hapni ato dyer.

Rruga për në harrim,

kalon përmes fjalëve të vdekura.

Kufomat e fjalëve të pathëna

lulëzojnë në varrezën e zymtë të pendimit...

Njerëz,

flisni, këndoni dhe puthni...

jeta

është vetëm një vrapim i shpejt përmes ferrit...

 

 

MBI RRUGË...

 

Mbi rrugë...

hapat e tua

me sandale gjethesh.

Ishim lodhur,

botën shëtitëm

dhe lumturinë nuk e takuam askund...

Ishim lodhur...

mjaftonte një përqafim

për të vrarë trishtimin,

një buzëqeshje

për të rilindur përmes shpresës...

 

 

VENDLINDJE...

 

Ne kthejmë atje

Bota

fillon pikërisht aty

ku puthjen e parë lamë peng të dashurisë

mbi krahët e fluturave

Atje ku gërsheti i shthurur i vajzës

Më ra mbi supe

si një krah prej drite hëne

Ku pika e vesës

u shndërrua

në një pikë loti

Për ty  VENDLINDJE...

 

 

* * *

...se dashuria është unike,

Dashuria nuk kopjohet.

Në dashuri

të gjithë jemi perandor të shpirtit,

Ndërsa të gjitha betejat,

kur dashuron,

janë të fituara..

por ah, fatkeqësisht

në gjithë ato beteja

kuptoje

ti je i vetmi që je vrarë

dhe ... ke aq shumë plagë...

Dhimbja e bukur DASHURI,

është ndoshta

dhimbja e vetme

që do të donim ta jetonim gjatë...

 

 

GRUA

 

GRUAJA:

PORTA E JETËS

Një mrekulli njerëzore,

Ku shpirti i bukur feston dashurinë

Trëndafili i puthjes ka hapur gonxhet

dhe mrekullisht

Buzët  shuajnë etjen e një puthjeje pa mbarim

Gruaja...

ky bekim i jetës.

Pjesa jonë e dytë...

Ajo pjesë e brishtë dhe elegante,

Pa të cilën

burri  kurrsesi nuk do të kishte kuptim...

 

 

* * *

Në ecjen tonë...

rruga është magjia...

por anës rrugës janë pemët,

mrekullitë e blerta të shpirtit

që kërkojnë dashuri dhe jetë.

Në kraharorin tim

po lulëzon një pemë, mos e vrisni...

 

 

* * *

...se pritja

është kuptimi i jetës.

të presësh,

do të thotë të shpresosh.

të shpresosh,

do të thotë të jetosh,

të jetosh,

do të thotë të ëndërrosh,

të ëndërrosh,

do të thotë të dashurosh,

të dashurosh do të thotë... gjithçka...

 

 

* * *

Më thuaj

se çfarë moshe ka puthja

që të të them

se çfarë moshe kam unë.

Mos i vishni DASHURISË

këpucët e ngushta të moshës

...se e vrisni..

 

Përgatiti: Sh. Dibrani

 

 

 

* * *

SHËNIME PËR AUTORIN:

 

V A S I L   T A B A K U

 

Vasil TABAKU (10.9.1953). Lindi në Lushnje, në një familje me origjinë nga Gramshi. Pas disa muajsh familja e tij do të transferohet në zonën e Mallakastrës në qytetin e Ballshit, ku e kaloi fëmijërinë dhe rininë. Arsimin tetëvjeçar e kreu në Ballsh, sikurse edhe atë të mesëm në Shkollën e Mesme të Bashkuar “Derivsh Hekali”.

Poeti, shkrimtari dhe publicisti Vasil Tabaku, krijimtarinë letrare–artistike e ka filluar që në bankat e shkollës tetëvjeçare, kurse botimet e para poetike i ka publikuar në vitet e shkollës së mesme, në organet e shtypit letrar të kohës.

Në vitin 1977 ka përfunduar  Studimet e Larta, Fakulteti Gjuhë – Letërsi në Universitetin e Tiranës me rezultate të shkëlqyera, një vit më vonë ka dhënë provimet plotësuese dhe ka kryer edhe Fakultetin e Gazetarisë. Në vitin 1987 ka ndjekur për dy vjet Studimet e Larta pas Universitare në specializimin për skenarist i filmit artistik dhe ekranit televiziv, ku është diplomuar po ashtu me sukses të shkëlqyeshëm. Në vitin 1995 ka kryer trajnim dymujor për gazetari televizive pranë TRT - Ankara, Turqi.

Edhe pse që student botoi librin e parë dhe dhjetëra cikle poetike në gazetat letrare të kohës si dhe shumë artikuj studimor dhe publicistikë, pushtetarët komunist të asaj kohe, nuk i dhanë mundësinë të punonte në ndonjë qendër të zhvilluar apo shkollë qyteti, por “e detyruan?!”në shtator të vitit 1977 të filloj punën si mësues në fshatin Ninësh të Mallakastrës gjer në qershor të vitit 1978.

Më pas Vasil Tabakun do ta gjejmë në këto detyra dhe funksione profesionale:

- l978 – 1986, drejtues në Pallatin e Kulturës Ballsh.

- 1986 – 1987, gazetar në gazetën “Drita”, organ i Lidhjes së Shkrimtarëve dhe Artistëve të Shqipërisë.

- 1987 – 1993, skenarist i filmit artistik në Kinostudion “Shqipëria e Re”, Tiranë.

-1992 – 1993, kryeredaktor i Revistës “Film” organ i Kinostudios dhe Film – Distribucion.

- 1993 – 1998, gazetar në Radio Televizionin Shtetëror (RTSH), Tiranë.

- 1998, hiqet nga TVSH për shkak të bindjeve të tija politike të djathta, mishëruar edhe në emisionet e tij televizive  si dhe në shumë shkrime dhe analiza të botuara në shtypin e ditës si ”RD“, ”Tribuna Demokratike“, “Republika“, ”Drita“, “Albania“ etj.

- 1998 – 1999, gazetar në gazetën “Liria“, organ  i shoqatës së ish të dënuarve politikë të Shqipërisë.

- 1999 - 2000, gazetar në Radio Kontakt, Tiranë.

- 2000 – 2001, gazetar në TV- ATN – 1, Tiranë.

- 2001 – 2002, kryeredaktor i gazetës „Tirana demokratike“ organ i PD Tiranë.

- 2002 – 2003, kryeredaktor i gazetës “Lajmëtari i Lirisë“ organ i shoqatës për integrim të ish të përndjekurve politikë.

- 2003 – 2004, kryeredaktor i TV – ATN - 1 dhe  Reporter i Radios Ndërkombëtare „IRIB“, komentator politikë në “Radio Nacional”, bashkëpunëtor i gazetës “Bota Sot”në  Zvicër etj.

- 2004 –2005, Vasil Tabaku mbetet  i papunë.

- Që nga viti 2007, Vasil Tabaku punon gazetar në Agjencinë Telegrafike Shqiptare ATSH.

 

SHKRIME, TRAJTESA E PUBLIKIME NË FUSHËN E PUBLICISTIKËS:

Vasil Tabaku, ka botuar rreth 5450 shkrime publicistike, analiza politike, sociale, shoqërore si dhe shkrime te veçanta studimore në fushën e letërsisë, folklorit dhe kritikës letrare, në këto organe: “Drita”, “Zëri i Rinisë”, në revistat: “Nëntori” e “Ylli”. Pas vitit 1991 ka botuar kryesisht në: “Rilindja Demokratike (RD)”, “Tribuna Demokratike”, ”Republika”, ”55”, ”Koha Jonë”, ”Liria”, “Ballkan”, “Sot”, ”Tema”, ”Metropol”, ”Lajmëtari i Lirisë”, ”Drita”, ”Shkodra”, ”Bota Sot” në Zvicër etj. Po ashtu Vasil Tabakun e gjemë me poezi e tregime nëpër gazeta e revista si: “Drita”, “Zëri i Rinise”, “Ylli”, “Nëntori” dhe më pas edhe në: “RD”,  “Republika”, “Drita”, “Tema“ etj.

- Vasil Tabaku është autor i rreth dyzet e pesë dokumentarëve artistik televiziv në TVSH dhe ATN – 1. Ka realizuar me qindra emisione televizive dhe radiofonike në “TVSH”, “ATN – 1”, në “Radio Kontakt”, “Radio Nacional” dhe së fundi edhe në Radion Ndërkombëtare “IRIB”.

 

VEPRAT LETRARE:

1.     “Hyrja e Pranverës“, poezi, 1976.

2.    “Në të gjitha ditët“, poezi, 1981.

3.    “Me këngën time dhe jetën“, poezi, 1987.

4.    “Ndërrimi  i epokave“, studime, 1988.

5.    “Bota në sytë e mi”, ese, 1990.

6.    „Klithmë drite“, poezi,  1998.

7.    “Vit i mbrapsht“, ese politike, l998.

8.    “Zgjim i dhimbjes“, ese dhe studime social – shoqërore, 1999.

9.    “Vështrim i ngrirë”, poezi dhe ese, 2000.

10.  “Shqipëria në udhëkryq, apo politika e kryqëzuar?”, studime dhe artikuj politikë, 2001.

11. “Shkolla Iraniane dhe Shqipëria”, studime dhe intervista me akademikë dhe personalitete të shquara, 2005.

12. “Monumentet e munguara të Demokracisë”, libër eseistiko – publicistikë, 2006.

13. ”Baleti i drerit të plagosur“, roman, 2007.

14.  “SHKOLLA IRANIANE DHE SHQIPËRIA”, është përkthyer në gjuhën  persishte, Teheran, 2004.

 

ËSHTË PREZANTUAR:

15. Hasan Hasani: “LEKSIKONI I SHKRIMTARËVE SHQIPTARË 1501 – 2001”, Prishtinë 2003.

16. Ferdinan Laholli: “ANTOLOGJI E POEZISË MODERNE SHQIPE – ANTHELOGIE DER MODERNEN ALBANISCHEN LYRIK”,  Holzminde/Germany, 2003.

 

Përveç kësaj veprimtarie të begatshëm që përmendëm më lart Vasil tabaku ka në proces të finalizimit edhe dy libra, një roman dhe një libër poetik, kurse një pjese e krijimeve poetike i janë përkthyer edhe në gjermanisht, italisht dhe persisht. Ai njehë mirë italishten dhe rusishten.

Vasil Tabaku, jeton në Tiranë.

Adresa elektronike:  vasiltabaku@yahoo.com

Përgatiti: Sh. DIBRANI