Bedri Tahiri: Azem Galica meriton më shumë

AZEM GALICA MERITON MË SHUMË

(Fjalë përshëndetëse me rastin e vënies së gurthemelit të Kullës së Azem Galicës, më 15 korrik 2010)

Nga Bedri TAHIRI

Të respektuar të pranishëm!

Sot gjendeni në truallin ku, para 86 vjetësh, pra më 15 korrik 1924, u zhvillua beteja e fundit e Azem  Galicës, e cila në histori njihet me emrin Epopeja e Arbërisë së Vogël. Ardhja Juaj është një nder i veçantë për ne dhe për heronjtë, sepse: Kush nderon historinë, krijon ardhmërinë!

Azem Galica bashkë me Nusen e Maleve, Shotë Galicën, dhe me bashkëluftëtarët e tij besnikë, për 12 vjet rresht nuk i lëshuan armët nga dora. Ata zhvilluan mbi gjashtëdhjetë beteja fitimtare kundër pesë pushtuesve të kohës. Më 1923 krijohet Zona e Lirë e Drenicës e njohur si ARBËRIA E VOGËL, e cila fillimisht përfshinte të gjitha fshatrat e komunës së Prekazit e më vonë vetëm Galicën, Lubovecin e Mikushnicën. Kjo bërthamë e parë shtetërore, pati jehonë të madhe, kombëtare e ndërkombëtare, saqë shpejt u detyrua ta njoh edhe mbretëria serbosllave. Më 11 tetor 1923, deputeti i Kosovës, Jovan Magovçeviqi, u tha në Beograd: “Zotërinj, unë i kam dy vota; një si deputet i rregullt i Kuvendit Popullor dhe një si deputet i jashtëm i shtetit të Azem Galicës”.

 Thënia e Nolit se çdo heroi në histori i duhet të kalojë përmes tri fazave: të glorifikimit, të asgjësimit dhe të rivlerësmit, më shumë së për të tjerët, vlen për Azem Galicën. Ai, për çudi,  edhe ditët e sotme, po përballet me sfida të tilla.

 Sidoqoftë, ai mbetet frymëzuesi më i madh i brezave liridashës. Edhe luftëtarët e UÇK-së shumicën e betejave i fituan nën thirrjen: O prite, prite Azem Galicën!

Jubileun e sotëm po e shënojmë me vënien e gurthemelit te Kullës së  kryekomandantit të të gjitha çetave çlirimtare shqiptare, e cila është simboli më i qëlluar i rezistencës për liri. Roje e saj do të jetë vetë kapedani, eshtrat e të cilit, më 1971, i nxori nga shpella atdhetari i madh Abdyl Krasniqi. Ama,  atij po i mungon bshkëshortja dhe bashkëluftëtarja, Shotë Galica. Bashkimi i tyre nënkupton bashkimin tonë shpirtëror e kombëtar!

Falënderim i veçantë u takon atyre që bënë hapin e parë në mbështetjen e Projektit,  PTK-së, me drejtuesin e suksesshëm dr. Shyqyri Haxhën dhe KK të Vushtrrisë, udhëhequr nga Bajram Mulaku. Shpresojmë shumë së kjo nismë e mbarë do të përkrahet edhe nga Qeveria, edhe nga Ministria e Kulturës, edhe nga donatorë të tjerë, sepse vetëm ashtu lajmë një borxh të vockël ndaj atyre që sollën Ditën e Bardhë- LIRINË!

Edhe njëherë, në emër të Galicës dhe te Arbërisë së Vogël, u falënderojmë të gjithë Juve, që me pjesëmarrjen Tuaj nderuat Azem e Shotë Galicën, nderuat gjakun e atyre që sollën lirinë, nderuat historinë, nderuat kombin!

U lumshin këmbët e qofshi faqebardhë!

Ju mirëpresim vitin e ardhshëm në përurimin e Kullës-MUZE!