Kulturë
Sinan Sadiku: Vargje të frymëzuara nga dashuria ndaj atdheut dhe lirisë
E enjte, 17.12.2009, 10:54 PM
Nexhat Rexha “Ndrydhja e pikës K”, botoi “Nositi” Dardanë 2003, fq. 81
Nga Sinan Sadiku
Nexhat Rexha
është një emër i njohur, një veprimtar i palodhur i cili ka punuar në dobi të
çështjes kombëtare një kohë të gjatë. E them këtë fakt sepse angazhimi i tij në
të mirë të çështjes kombëtare, peripecitë e shumta nëpër të cilat ka kaluar ai
dhe populli ynë, veprimet jonjerëzore të okupatorit, dhuna e shfrenuar,
vrasjet, burgosjet… gjegjësisht mbajtja nën robëri e një populli të tërë, si
dhe baticat dhe zbaticat e lëvizjes kombëtare për çlirim nga Serbia, janë temat
më të shpeshta të cilat i gjejmë në poezitë e librit “Ndrydhja e pikës K”. Duke
mos qenë vëzhgues i ngjarjeve, por pjesëmarrës aktiv i tyre, ai i ka përjetuar në
shpirt shumë ndodhi, shumë bëma, shumë vështirësi, shumë pengesa, shumë veprime
mizore të okupatorit dhe të gjitha këto ka arrit t`i shpreh me gjuhën e
poezisë. Andaj duke i lexuar poezitë e librit “Ndrydhja e pikës K” na kujtohen
shumë nga ato ndodhi, na kujtohen, ngjarjet e tmerrshme, masakrat e okupatorit, dëbimet masive, atmosfera
e zymtë e frikës dhe e ankthit, por edhe qëndresa dhe heroizmi i njerëzve tanë
të cilët u përballën me armikun e egër dhe dolën fitues. Mu pse ka qenë
pjesëmarrës aktiv në ngjarjet e kohës, autori ka qenë shumë i motivuar të
shkruaj për to, andaj poezitë më të realizuara janë shkruar me një frymëzim të
thellë që del nga përjetimet e
drejtpërdrejta të poetit dhe ato janë
shprehje e mendimeve dhe ndjenjave të tij. Libri “Ndrydhja e pikës K” përfshinë
64 poezi të ndara në pesë cikle. Ciklet janë: “Dalje nga ferri i Dantes”,
“Përkëdhelje miopësh”, “Gjurmë të pashlyera”, “Harlisja ditore” dhe
“Ëndërrshpresë në pakufi”. Karakteristikë e përbashkët e të gjitha cikleve, e
të gjitha poezive është se në to shkruhet për njeriun e këtij trolli, për fatin
dhe fatkeqësinë e tij, për ditët e zeza dhe ngjarjet e pakëndshme nëpër të
cilat ka kaluar, për rezistencën e tij, për sakrificat e shumta dhe kuptohet
për veprimet e armikut të cilat i kanë sjellë vuajtje e mjerim, shkatërrim e
tragjedi, por edhe për dobësitë e brendshme të cilat disa herë e kanë penguar
ecjen e tij drejt objektivave për liri e përparim.
Atmosfera e zymtë e luftës – okupimit
Libri hapet
me poezinë “Kolona pa skaj” në të cilën jepet atmosfera e dhunës, e tmerrit, e
barbarisë që ushtroi okupatori serb mbi popullatën shqiptare të Kosovës në
pranverë të vitit 1999. Poezia fillon me
vargjet: “Të gjitha rrugët e Kosovës/
janë mbushur ankth e mllef”. Pastaj përshkruhet dhuna e shfrenuar e
okupatorit, vrasjet, dhunimet, kolonat e paskaj të të dëbuarve nga shtëpitë dhe
pronat e veta, për të ardhur te vargjet “Për
të ruajtur në kujtim të historisë/ një ëndërr trishtuese”. Dhe vërtetë
poezitë e Nexhat Rexhës brezave të ardhshëm ua ruajnë një realitet trishtues të
cilin gjithsesi duhet ta dinë. Megjithatë edhe në këtë poezi shkruhet për “Qëndresë e lindje të reja/ për një ditë
pranvere/ në Kosovë”.
Një përshkrim të atmosferës që ka mbretëruar
në Kosovë në gjysmën e parë të vitit 1999 autori e bënë edhe në disa poezi të
tjera ndër të cilat më të realizuarat janë: “Lulet e pranverës së përgjakur”
dhe “Si jetohet këto ditë në Kosovë”. Në poezinë e dytë i gjejmë vargjet:
Në Kosovë jetës i vie erë droje
Gratë i kanë prerë flokët
Vajzat e kanë ndërruar frizurën
Djalëria e parafytyron luftën
Në vijën e parë të frontit
Burrave u është zgjatur mjekra
Fëmijëve u ka humbur gëzimi
Për të vazhduar
Në Kosovë këto ditë
Bukë hahet pak ujë pihet
shumë
Kriteret e jetës kanë një vështrim
Në çdo qoshe të rrugës
Rrezik pa përjashtim
Kosovë je loti, dhembja dhe gjaku im
Pra era e drojës, parafytyrimi
i luftës, humbja e gëzimit te fëmijët, rreziku në çdo qoshe të rrugës janë
karakteristikat e kohës të përshkruara me një gjuhë poetike ku dominojnë notat
e ankthit, të tmerrit, të rrezikut, por edhe të mobilizimit për të mbijetuar.
Dobësitë e brendshme
shqetësim i autorit
Këto vitet e fundit të okupimit klasik jo vetëm që i kanë
qitur në shesh veprimet johumane, veprimet barbare të okupatorit, por kanë qenë
vite kur ne shqiptarët në mënyrë masive jemi përpjekur të bëjmë secili diçka
për ta fituar lirinë, dhe këtu jemi njohur mes veti, jemi rinjohur dhe i kemi
parë shumë dobësi tona, disa herë absurde dhe të pabesueshme, të cilat dobësi e
kanë zgjatur shumë dhe do ta zgjasin edhe më tej rrugën edhe ashtu të gjatë dhe
përplot pengesa drejt lirisë dhe përparimit. Janë këto dobësi të cilat disa herë
nuk e lënë të qetë autorin dhe ai i qet në shesh duke i pagëzuar me emër të
vërtetë dhe kuptohet vet identifikimi, apo më mirë të themi diagnostifikimi i
tyre është një hap, ama një hap i domosdoshëm drejt korrigjimit dhe tejkalimit.
Kuptohet autori këtë e bënë me një gjuhë poetike ku sugjerimet e lehta dalin
nga pakënaqësia, nga zemërimi, nga protesta dhe nga revolta e tij. Këtë
tematikë e trajtojnë disa nga poezitë më të realizuara të librit si: “Para
arritjes”, “Mos kështu” “Bredhje” ,
“Zbrazëti”, “Gjurmë kotësie”, “Udha përtej lumit”, “Nëpërkëmbja”, “Sërish”, e
të tjera. “Para arritjes” është një poezi e bukur, ndër më të bukurat e librit
në të cilën tehu i kritikës e godet mendjemadhësinë, vetlavdimin, mburrjen e pa mbulesë, pakujdesinë dhe mungesën e
projekteve konkrete për ta realizuar qëllimin, për t`i realizuar objektivat
kombëtare. Andaj “Me fjalë shumherë/ e
kemi pushtuar botën” shkruan autori dhe vazhdon “Arrijmë deri te Malet e Parnasit/ dhe kthehemi duarthatë/ pa e
pushtuar asnjë shpellë”. Sa i përket vlerës artistike nivelin e poezisë
paraprake e ka edhe poezia “Mos kështu”, në të cilën preket çështja e tradhtisë
kombëtare dhe hapësira e gjerë e veprimit që iu lejohet njerëzve të tillë. Te
kjo poezi i gjejmë vargjet:
Në këto kohëra të
pranverës
Pa pranverë
Në atdheun tim edhe më tej
Kali i Trojës shëtit
shlirshëm
E buzëqeshja ndër dhëmbë
Grimcon gurët e
kështjellës sonë
Kurse ballit tim po i
shtohen rrudhat
“Në atdheun tim edhe më tej/ Kali i Trojës shëtit shlirshëm”
shkruan autori i cili është i trembur, i hutuar, i mbetur mënjanë në atdheun e
vet, ndërsa kënga shqiptare mbetet e pabotuar në kohën e pranverës pa pranverë.
Një përjetim i ankthshëm i robërisë, por poezia mbetet shumë aktuale edhe tani
kur askush nuk merret me njerëzit që kanë punuar dhe që punojnë ende kundër atdheut të vet, po
krejt energjia harxhohet në përpjekje
për t`i eliminuar e margjinalizuar njerëzit e devotshëm që kanë punuar dhe
sakrifikuar shumë për të mirën e atdheut. “Toka
ka ujë për pije sa të duash/ kurse ty o njeriu im nuk të shuhet etja” janë
dy vargjet e poezisë “Zbrazëti” të cilat mund të interpretohen se përkundër
pasurive të shumta natyrore që i ka atdheu ynë, ende njerëzit tanë për shumë
arsye nuk mund t`i plotësojnë as nevojat më elementare, po mund të
interpretohen edhe ashtu se etja, pangopësia, ambicja e shfrenuar, vrapi pas pasurisë dhe
pushtetit nuk po njohin asnjë kufi moral, material... sepse “Koha ime është mbushur me ironi/ Heronjtë e
hanë njëri tjetrin këtu” janë vargjet që i gjejmë më poshtë në poezi, të
cilat vargje e shprehin një realitet të hidhur duke e emërtuar shkaktarin
kryesor të fatkeqësisë dhe të dramës kombëtare. Te poezia “Bredhje” i gjejmë
vargjet: “Ditët shterin njëra tjetrën/
liria ku mbeti” ose “Besa ku
mbeti/ këtu o njeri është kohë e krisur”.
Pra koha kalon shpejt, ndërsa ne punojmë shumë ngadalë për ta fituar lirinë,
gjegjësisht ne bredhim poshtë përpjetë dhe kjo te autori shkakton brengë, bile
edhe ankth, sepse na ndodh të habitemi e ta harrojmë misionin tonë. Dobësitë
tona janë objekt trajtimi edhe në poezinë “Sërish” në të cilën i gjejmë
vargjet: “Vallë robëria po krijuaka/
rrënues të themeleve/ Mu në ditën kur vihen shtyllat”. Mund të themi se një
numër jo i vogël i njerëzve tanë, madje edhe i veprimtarëve që në kohën e
krijimit të organizmave tanë fillestarë për çlirim, në një farë mase thuaja nuk
e kanë pasur seriozisht, dhe kjo mund të jetë edhe pasojë e robërisë së gjatë e
edhe pasojë e energjisë destruktive të disa njerëzve, të cilët vërtetë janë
rrënues të themeleve. Poezi për dobësitë tona morale, organizative, të cilat
nuk na lënë të ecim përpara me shpejtësinë e duhur. Dobësitë morale paraqiten
bukur në vargjet “Ata jetëgjatët i
bashkon liria/ Ata dallkaukët i bashkon tagjia” të poezisë “Nëpërkëmbja”.
Me keqardhje dhe dëshpërim të thellë mund të konstatojmë se poezitë e librit
“Ndrydhja e pikës K” në të cilat
diagnostifikohen dobësitë tona, veçmas të udhëheqësisë tonë, sot tingëllojnë
shumë më aktuale se në kohën kur janë shkruar. Madje mund të themi se edhe pse
numri i poezive në të cilat përshkruhen veprat mizore të okupatorit është
dukshëm më i madh, po t`i përfshijmë aty edhe ato poezi të cilat nëse jo në
mënyrë të drejtpërdrejtë atëherë në mënyrë të tërthortë e trajtojnë atë
tematikë, se sa i poezive që i përshkruajnë dobësitë tona, po t`i zgjedhim poezitë më të mira të librit
nuk do të na dalin më shumë poezi që kanë të bëjnë me veprimet e okupatorit se poezitë që kanë
të bëjnë me dobësitë tona. Me gjasë edhe autori i librit dhe shumica e njerëzve
të tjerë nuk janë befasuar nga veprimet e okupatorit, ato veprime nuk kanë qenë
diçka e papritur. Pra nga pushtuesi nuk është pritur asgjë e mirë, ndërsa disa
dobësi tona, e veçmas disa sjellje kriminale të njerëzve të cilëve iu kemi
besuar, kanë shkaktuar tronditje të thellë, kanë shkaktuar zhgënjim sepse ata i
kanë tradhtuar idealet kombëtare dhe besimin tonë. Andaj veprimet e tilla
autorin e kanë prek në shpirt e kanë tronditë dhe e kanë frymëzuar t`i shkruaj
disa nga poezitë e tij më të bukura.
Lirikat meditative
Mbase sjelljet e egra, veprimet mizore të okupatorit, po
edhe sjelljet disa herë jonjerzore dhe joatdhetare të disa njerëzve tanë,
poetit në momente të caktuara ia kanë
lëkundur edhe besimin në njeriun, çështje kjo e shprehur me vargjet “Më shumë satan/ e më pak virgjëreshë”
të poezisë “Njeriu”, në të cilën poezi i gjejmë edhe vargjet “O Zot më ruaj nga miqtë/ se nga armiqtë
ruhem vetë”.
Simbol i të
keqes është satani dhe në poezinë me të njëjtin titull poeti shkruan:
Në fytyrën tënde
Shoh erë varri
Të fëmijëve tanë
Për të vazhduar
E zemra ime
pret dashurinë e luleve
ngjyrat e ylberit dhembshëm i
vështron
Tashmë kemi ardhur te lirikat
e mirëfillta meditative të cilat krahas meditimeve të thella i karakterizon edhe
përjetimi shumë i natyrshëm dhe personal i autorit dhe në disa raste ngjyrimi
elegjiak. Mbase përmasat e së keqes, defektet e shumta, pakënaqësia, e në disa
raste edhe zhgënjimi e kanë lodhë autorin dhe ai është liruar nga shtrëngesat e ndrydhjet, nga ndonjë formë
e autocenzurës dhe ka dalë në sipërfaqe
natyra e çiltër njerëzore, ka shpërthyer në plotninë e tij talenti poetik, i cili është kurorëzuar me disa nga krijimet e
tij më të mira, të cilat krijime me vlerat e tyre estetike ia bëjnë një vend të
mirë në poezinë e sotme shqipe. Për disa nga këto lirika shkrova më lartë,
ndërsa nuk mund të mos i them disa fjalë për poezinë “Kohë apokalipse” e cila
është poezia më lirike, më personale e autorit, një poezi e bukur e përshkuar
nga notat e dhembjes dhe e shkruar në çastet e një përjetimi të thellë, të një frymëzimi
të natyrshëm i cili del nga thellësia e shpirtit poetik. Koha tinëzare kalon
duke ia marr subjektit lirik ditët më të mira, ëndrrat më të bukura. Është
fjala për një kohë e cila i ka ndrydhë aftësitë dhe mundësitë e tij krijuese,
për një kohë e cila thuaja ia ka marrë atij të drejtën që ta jetojë jetën ashtu
siç i ka hije, duke i krijuar kufizime dhe vështirësi të të gjitha natyrave,
duke ia mbyllur rrugët. Kjo kohë, pra koha e okupimit, zgjati shumë dhe
gjenerata të tëra e pësuan. Megjithatë subjekti lirik nuk dorëzohet, nuk
nënshtrohet dhe shpërthen në vargjet.
Vetëm unë një ditë do të shpallë
Luftë për jetë a vdekje
E ti mate mirë kohën
Se fundi do të vijë Skiron
Edhe për ty në këtë kohë
Të apokalipses
Përkundër një realiteti të
hidhur që autori ka arritur ta shpreh në shumë nga poezitë e veta, përkundër
pakënaqësisë e edhe zhgënjimit në momente të caktuara, përkundër vështirësive
dhe sfidave të shumta ai asnjëherë nuk ka pushuar të besoj “Se krismat e krushqve të lirisë/ po sjellin zjarrin e Prometeut” (poezia “Krismat mbi ombrellë”). Pra ai
asnjëherë nuk i ka humb shpresat , sepse “Udhëtimet
e feniksit/ gjurmojnë shtigje të reja/ për
një diell/ në djepin e Dardanisë”, shprehet ai në poezinë “Era”. Në poezinë
“Panairi i librit 1999” poeti si dashamir
i kulturës, si dashamir i librit i gëzohet panairit të librit, mbajtur në
Prishtinë në nëntor 1999, panair ky në të cilin kishin arritur shumë libra, të
cilët nuk kanë mundur të qarkullojnë lirisht asnjëherë në këto hapësira. Aty ai i gjenë
librat më të bukur të shkruar në gjuhën shqipe dhe kjo e gëzon pamasë, sepse “Ne me sytë tanë i kemi parë/ shtëpitë e
djegura, bibliotekat shkrumb”. Por edhe në këto momente të gëzimit vjen
dhembja për autorin e “Tufës”, poetin Latif Berisha dhe për Ymer Elshanin,
poet, autor i veprës “Loti udhëtarë”, që të dy të vrarë nga okupatori, si dhe
për Flora Brovinën e Halil Matoshin që ende vuanin në burgjet serbe.
Shpalosja e dashurisë ndaj atdheut
dhe lirisë
Mund të themi pa mëdyshje se në mos të gjitha, gjithsesi
pjesa më e madhe e poezive të librit “Ndrydhja e pikës K” janë poezi patriotike në të cilat shpaloset
dashuria e autorit ndaj atdheut, ndaj bashkëkombësve të vet, dashuri kjo e cila
vjen në shprehje edhe në momentet kur ka pakënaqësi, edhe në momentet kur ka
dhembje, edhe në momentet kur ka zhgënjim e edhe në momentet kur ka qortim. Pra
ndryshon mënyra e artikulimit të kësaj dashurie, ndryshon shprehja poetike e
kësaj dashurie, gjegjësisht modeli i shprehjes poetike të saj , por ajo frymon
aty, në vargje. Modelin më tradicional, më patriotik të shprehjes së kësaj
dashurie e gjejmë në ciklin “Gjurmë të pashlyera”, në të cilin janë sistemuar
tetë poezi të cilat iu kushtohen dëshmorëve të cilët gjënë më të shtrenjtë ia
kanë dhuruar atdheut dhe lirisë. Poezitë iu kushtohen dëshmorëve: Kadri Zeka,
Sabri Krivaqa, Agush Isufi, Driton Krivaqa, Metush Krasniqi, Fehmi e Xhevë
Lladrovci, pastaj Dëshmorëve të Janarit, Rdvan Qazimit të njohur si Komandant
Lleshi, po përmenden edhe Xhemë Gostivari dhe Mehmet Gegë Tetova.
Në poezinë
kushtuar figurës madhore të Kadri Zekës të cilën e titullon “Kadri Zeka” i
gjejmë vargjet “Gjithnjë vrisje frikën/ e
ndizje flakën e mallit” , për të vazhduar
“Me kohë ulurimën e UDB-së/ e ke graduar në tradhti”. Dhe
vërtetë të rrallë kanë qenë njerëzit si
Kadri Zeka i cili ka pasur guximin dhe ka ditur ta zgjoj optimizmin dhe
krenarinë kombëtare edhe atëherë kur UDB-ja me anë të terrorit dhe burgosjeve
mbillte frikë, tmerr dhe mosbesim. Të rrallë kanë qenë njerëzit si Kadri Zeka të cilët kanë ditur t`ua heqin
maskat njerëzve të UDB-së.
“Lulet në
lapidar” është një titull i bukur simbolik i poezisë kushtuar
tri luleve, kushtuar tre dëshmorëve: Sabri Krivaqës, Agush Isufit dhe
Driton Krivaqës, të cilët ranë nga plumbat e armikut në lule të rinisë. Autori
poezinë kushtuar këtyre tre dëshmorëve e ka shkruar me përkushtim dhe dashuri
të veçantë. Kjo poezi me fjalë të zgjedhura, me shumë vërtetësi e përshkruan
ngjarjen dhe atmosferën që ka mbretëruar atë ditë në Dardanë kur vetëm falë
këmbëngulësisë së një numri të madh të njerëzve, përkundër kërcënimeve të
ushtarëve rus lapidari i tre dëshmorë në fjalë është vendosur në Qendër të
Dardanës, Te Ura. “Hijet e Karpateve lëshojnë krisma të zeza” shkruan autori
duke na e përkujtuar tentativën e dhunshme të ushtarëve rus të cilëve nuk iu
mjaftuan kërcënimet, por lëshuan edhe krisma me armë për ta penguar vendosjen e
lapidarit i cili edhe sot e kësaj dite qëndron me krenari aty ku e ka vendin. “Ata të tre në përqafim qëndruan/ testament
për breza urën e liruan” janë dy vargje të
bukura të poezisë në fjalë.
Në poezinë
kushtuar atdhetarit Metush Krasniqi zënë
vend edhe vargjet “Çdo ditë e burgut
tënd/ lindi nga një flamur” nga të cilat nënkuptojmë se me tortura e burgosje
armiku e arrinte të kundërtën e asaj që synonte, kuptohet falë Bacë Metushit
dhe bashkëpunëtorëve e nxënësve të tij, numrin e të cilëve nuk e pakësonin
burgosjet dhe terrori i armikut, por përkundrazi, veçsa e shtonin.
Shprehja poetike
Përveç synimit për t`i shprehur mendimet, ndjenjat,
përjetimet, ngjarjet, vizionet... autori është kujdesur që ato t`i shpreh me
një gjuhë sa më të bukur, sa më të përpunuar duke i zgjedhur dhe ndërtuar me
mjeshtri figurat stilistike, duke e bërë një lidhje dhe kombinim sa më të
natyrshëm të fjalëve, figurave, vargjeve dhe elementeve të tjera të poezisë,
dhe mund të themi se këtë e ka arrit falë përkushtimit, talentit dhe kulturës
letrare. Më lartë e bëra një analizë semantike të disa poezive dhe të librit si
tërësi, duke u përpjekur të shkruaj për mendimet, ndjenjat, dëshirat dhe
mesazhet të cilat autori përmes poezive i përcjell te lexuesi. Megjithatë të
mos harrojmë se poezia e Nexhatit është poezi bashkëkohore që ka ec në hap me
kohën, të cilën e karakterizon shumëkuptimësia dhe e cila lejon më shumë
mundësi interpretimi, ndërsa mesazhet nuk imponohen por dalin nga brendia e
poezive dhe e librit si tërësi. Te shumica e poezive lexuesi i kujdesshëm i
cili posedon kulturë të përgjithshme dhe përgatitje letrare nuk e ka vështirë
të depërtoj në brendinë e tyre, t`i gjejë idetë, dëshirat mesazhet... t`i
përjetojë ato, gjegjësisht t`i shijoj vlerat e tyre semantike dhe estetike. Më
duket se poezitë më të realizuara janë lirikat meditative në të cilat shfaqet
dashuria e autorit ndaj atdheut dhe
lirisë në një kuptim më të gjerë të fjalës, në të cilat krahas mendimeve,
ideve, botëkuptimeve, qëndrimeve... shfaqen edhe ndjenjat e ngrohta dhe
përjetimet e subjektit lirik, gjegjësisht shpaloset bota e pasur intelektuale dhe
emocionale e tij, të cilat lirika janë shkruar me një gjuhë të ngjeshur figurative
që nuk është vështirë të deshifrohet edhe pse në libër ka edhe poezi më të
drejtpërdrejta, por edhe më të komplikuara sa i përket anës semantike. Duket se
autori edhe në jetë e edhe në poezi e sheh të pandarë fatin e vet nga fati i atdheut, andaj jo vetëm mendimet po
edhe ndjenjat, edhe disponimi, edhe dhembja edhe shpresa e edhe gëzimi janë të kushtëzuara nga
ngjarjet e ndryshme që kanë të bëjnë me atdheun, gjegjësisht edhe përjetimet më
intime më personale janë të lidhura ngushtë me ndjenjën e atdhedashurisë. Sa iu
përket figurave, i gjejmë të përdorura me mjeshtri e shije të veçantë:
metaforën, simbolin, personifikimin, pastaj
alegorinë, aluzionin, epitetin, ironinë dhe aty këtu edhe figurat e
përsëritjes: asonancën dhe aliteracionin. Poezitë: “Kohë apokalipse”, “Satani”,
“Panairi i librit 1999”, “Para arritjes”, “Mos kështu”, “Bredhje”,, “Krismat
mbi ombrellë”, “Gjeografia e dhembjes”, “Zbrazëti”, “Si jetohet këto ditë në
Kosovë”, “Rrugët”, “Lulet e pranverës së përgjakshme”, “Udha përtej lumit”,
“Era”, “Nëpërkëmbja”, “Muzgu i perëndive” dhe disa të tjera, janë realizime të
bukura poetike që do t`i mbijetojnë kohës, te të cilat lexuesi gjen edhe art,
edhe kuptim, edhe mesazh, edhe mendim, edhe ide, edhe ndjenjë dhe si të tilla
janë një kontribut në pasurimin e poezisë së sotme shqipe. Janë poezi të cilat dëshmojnë se autori i tyre është një
krijues i talentuar, një krijues i veçantë i cili ka një botë të pasur emocionale dhe
intelektuale, ka një përvojë të pasur jetësore të skalitur nëpër ngjarjet dhe
sfidat e kohës, ka një kulturë të gjerë letrare dhe njerëzore në përgjithësi,
të cilat falë përkushtimit të tij tani i kemi në vargje dhe mund t`i lexojmë,
t`i rilexojmë, t`i analizojmë dhe mbi të gjitha t`i shijojmë si vlera të mirëfillta
artistiko-letrare.