Gjon Keka: Djegja e librit do të thotë rënie e njeriut në errësirë dhe në demonizëm

Djegja e librit do të thotë rënie e njeriut në errësirë dhe në demonizëm

Nga Gjon Keka

Askush kushdo qoftë ai nuk ka të drejtë të djeg asnjë libër qoftë ai fetar apo jofetar,sepse secili libër ka një arsye pse ai ekziston dhe pse duhet lexuar edhe nëse nuk janë libra të preferuar apo të pëlqyer e kritikuar, prapë duhet lexuar dhe nxjerr në dritë qoftë të mirat ashtu edhe gabimet e tij.

Unë për veten time kur kam qenë në shkollën e mesme e kam lexuar Kuranin tri herë, ndërsa në kohën e studimeve e kam lexuar Biblën poashtu tri herë si dhe historinë e religjioneve që është një domosdoshmëri për t'i njohur themelet e secilit religjjion në tokë.

Librat si Bibla dhe Kurani apo Librat tjerë të religjioneve tjera nuk duhet djegur, por duhet lexuar sepse nuk ekzistojnë rastësisht ato libra si pjesë e historisë së Religjionit.

Ata që djegin libra të tillë të feve nuk janë as fetar e as lexues por injorant dhe të verbuar nga sytë dhe mendja e shpirti, prandaj ata kanë nevojë për dritë në mendje, zemër e shpirt për t'iu hapur sytë dhe për të parë më mirë me mendje për të lexuar e mësuar nga secili libër.

Në fakt asnjë libër në karakterin e tij thelbësor nuk është pa ndonjë porosi, pa ndonjë të mirë, nga secili libër njeriu mëson diçka nxjerr diçka qoftë ai fetar apo jofetar, por interpretuesit dhe të ngarkuarit me verbëri ideologjike-politike e për përfitime e lexojn interpretojnë keq dhe ndezin urrejtje e shkaktojnë konflikte ,prandaj librat duhet lexuar por jo marrë si udhëzues të luftrave apo urrejtjes së tjetrit por si libra që mësojnë njeriun se si të jetoj një marrëdhënie me Zotin dhe me njeriun në harmoni me veten dhe paqe e dashuri,sepse ekziston një Zot për të gjithë ashtu sikur është një diell për gjithë tokën.

Është e trupshme të digjen librat fetar që flasin për qiellin, natyrën ,Njeriun, Zotin dhe krijimin etj etj. Djegia e librave ka ndodh vetëm në diktatura dhe tirani,prandaj në një shoqëri të lirë, feja është një zgjedhje e lirë personale e private e besimit dhe që duhet respektuar në kuadër të kushtetutës së Republikës, gjë që nuk duhet të ndodh e as të mendohet për djegje librash si ato fetar apo jo fetar.

Unë për vete i dua librat aq fortë sa them shpesh se po të mos ishte shpikja e Shtypshkronjës nga Gutenbergu, njerëzimi e bota do të ishte në një analfabetizëm e injorancë të thellë, sepse vetëm libri si një dhurat e bekuar na vendosi dhe ngriti në një shkall të tillë të humanitetit e qytetërimit duke na ndarë nga bota e injorancës dhe errësirës, aty ku ka libra ka dritë ,ka dije, ka porosi, ka shpikje, ka shkencë e art,ka kulturë, ka vlera të pashlyeshme , ka humanizëm e fjalë hyjnore etj. Kur dëgjojë se sot në shekullin XXI digjen libra më dhemb sepse çdo libër ka një vlerë për njeriun,individin, për qytetërimin,për popuj, për kombe etj,prandaj djegja e një libër do të thotë mallkim,për arsye se shpikja e shtypshkronjës ishte një bekim, djegja e librit konsiderohet mallkim dhe rënie e njeriut në errësirë dhe humnerë.

Ndoshta nuk e kanë lënë mendt ndonjë shqiptar në Kosovë apo kudo që të arrijë deri në atë pikë të djallëzisë e errësimit të mendjes e shpirtit sa të djeg një libër fetar qoftë Biblën apo Kuranin apo ndonjë libër të religjioneve tjera,sepse do të ishte një çmenduri,marrëzi dhe akt demoniak. Nëse një akt i tillë ka ndodh vërtetë, atëherë organet e ligjit dhe të rendit duhet të merren me të, ta hetojnë atë dhe kushdo që e ka bërë atë akt të dënohet ashtu sikur thonë Ligjet dhe Kushtetuta e Republikës së Kosovës.

Shqiptarët e Kosovë dhe kudo në trojet tona duhet të jetojnë si një pa dallim feje, ata duhet ta kuptojnë se feja është besim personal ndërsa gjaku iliro-arbëror nëse ka mbetë pak në venat tonë, pastaj kombi arbëror, pra idenetiteti kombëtar arbëror- dardan europian, gjuha dhe kultura burimore etj janë të përbashkëta.

Larg imitimeve djallëzore të djegjeve të librave nga të tjerët ,shqiptarët e Kosovës duhet të jetojnë të lidhur njëri me tjetrin nëse duan të kenë të ardhme të përbashkët dhe të bashkuar si në kohën e të pavdekshmit kryeheroit tonë arbëror Gjergj Kastriotit(Skënderbeut) i cili e donte unitetin arbëror,sepse e shihte aty burimin e të mirës së përgjithshme të kombit, të fuqisë dhe të ardhmes së sigurt të Arbërisë.

Po e përmbyll këtë shkrim me fjalët e shkrimtarit e poetit të njohur gjerman Heinrich Heine që thoshte se; "aty ku djegin libra, në fund do të djegin edhe njerëz."