Nebi Dragoti: Fabulat e verës

NEBI DRAGOTI

FABULAT E VERËS

FABULA

Ah, fabula, ah, fabula…

Flasin mace e qenë,

flet guri, gjarpri, druja.

Gozhda thotë:- Ta ngula…

-Te këpucari ma mbyll gojën,

-thotë këpuca…

Në fabul flaska çdo send…

-Jam fabul regjur në shëllirë,

në shëllirë dhe…alegori,

më kupto, njeri i mirë!

Ah, fabula, ah, fabula…

BODECI

Eh, ç’e gjeti kaun në brazdë,

(kau i lodhur gjithë shkumë goja):

-Bodec,

ç’më shpon orë e çast?

-Brazdën çaje drejt, or mik!

Unë komandën nga bujku e marr,

në majë hosteni shpoj e nxit…

E bëj punën si kritik…

DEBAT VERE

-Milingonë moj, pse xhepat i ke plot!?

Ah, unë e mjera, i kam fare bosh!

-Debaton me mua pa mend në kokë:

ti në majë peme, unë këtu në tokë…

Tërë verën ti gëzh, gëzh nëpër degë,

në tokë unë, milingona, mbledh bereqet!...

BRESHKA INSPEKTORE

Doli breshka nga ugari

për inspektim:

-Dal të shoh ç’ka kopështari!?

Domatet jashtë kuqkuq,

i nguli dhëmbët për analizë:

-Bobo, tuli qënka i drunjtë…

E paskan bastarduar shkencën fare,

pa le, kanë edhe Ministri Bujqësie,

që rrika si burrat e Çajupit në hije(…)

pika që s’u bie!

Degjeneruar speci, trangulli,

pa ëmbëlsi shalqini, bostani…

Breshka inspektore

jep recetë për kurim:

-…U marrtë lumi

me gjithë Ministrinë!

LARASKA MBURRAVECE

Hop, në degë lejthate

goxha zhurmë laraske,

tundëte, shkunte atë bisht:

“Unë o bëj, o s’ bëj muzikë!

Për besë qesh me ca “talente”,

që s’ njohin figurat letrare,

mbahen për poete si derdimene

e më imitojnë në degë lejthate….

…Për pentagram kam drizat,

për glasat kam ferrat;

çerrat duartrokasin nga frika,

përbuzin mëllenjat, sqepverdhat…

Muzikë, de, hej, ç’ muzikë,

e kam fyllin me një vrimë.

Sa kot e ka bilbili kritik,

arti im eshtë i paarrirë”.

“Degë më degë lejthate,

e pështirë dhe krejt bajate,

je stan pa bylmet e hirrë,

zëçjerr, vjen era shëllirë”.

Kështu ia përplasi bilbili

kësaj mburrje mburracake,

sa laraskës iu mpi bishti

e u mek në degë lejthate…

CIGARISHTJA ELEKTRONIKE

-Cigare elektronike, de, për mashtrim,

-macja po i thoshte maçokut trim,

-mos e merr, mos, shpirti im, miku im,

veç për lekë i prodhon dhelpra firmë…

Qeshi maçoku dhe nxorri llapën,

i përgjigjet firmës me plot sarkzëm:

-Përdore vetë me gojën që ke pas,

vetëm aty cigarishtja jep rezultat…

E kishin provuar dhe dhjetra të tjerë,

pëfundimi zero, po ky muhabet.

Ka prodhime firmash, që janë rreng,

bëjnë reklamë, hedhin shurrën përpjet…

-Duhet vullnet dhe vetëm vullnet,

lihet duhani helm,o njerëz, o njerëz:

mashtrimet janë bërë moda e kohës;

kujdes, mashtrimet të qëllojnë kokës!