Armela Hysi: Nënë Terezës

Nënë Terezës, nga Armela Hysi

 "Si një përkujtim për një shpirt të madh e të shenjtë"

forca e psherëtimës

(Nënë TEREZËS)

e shtrëngoi sërish në gjoksin e rrëgjuar

si fsheh sorkadhen një kulpër

nga vdekja e ujktë në pyllin e tejmë.

nuk kishte më fuqi për lot

buzë mbrëmjeje në Kalkutë

çadrave ngjyrashuar bashkë me diellin,

vetëm ca lutje

rruazoret e shpresës përkëdhelin

sfilitjen e imagjinatës mbi dremitjen

e dromcave të ndërgjegjes

kullesë lebrose-mollëzave, fatëbjerrura

humnera të gjelbra

skalitur në buzët e sfilitura të malaries

aty ku Zoti ka vënë barkun

një thes i fryrë nga ofshet

e më të vërtetës prej urive

dhe fryma e një shenjtoreje.

psherëtimat kanë krahët

më të fuqishëm për tek Ati,

ndaj s’kishte më lot

veç engjëj të bardhë që vinin kompresa

ëndrrash azhur-kaltër

dhe fryma e një shenjtoreje.

korrik 2005