Haxhi Muhaxheri: Dridhja telat asaj sharkie

Haxhi Muhaxheri

DRIDHJA TELAT ASAJ SHARKIE

Rapsodit Agim Gashit

Dridhja telat asaj sharkie

E thuaja këngës më të bukur që di

Le të pëlcas farë e keqe

E shqipet të ngriten në lartësi

Dridhja telat asaj sharkie

E kënga të marr udhë shtigjeve të plisit

Dielli të na i ngroh ëndrrat tona të mira

Damarëve të gjymtuar të fisit

Dridhja telat asaj sharkie

E zëri le të buçasë si rrufe

Dridhja telat asaj sharkie

Me mallin e ndezur për atdhe

Dridhja telat ore lum miku

Le të shkërmoqen të gjitha magjitë

Dridhja telat asaj sharkie

E lutu të ketë më shumë dritë

Dridhja telat asaj sharkie

Dridhja e këndo si përhera

Me gjuhë e fjalë perëndie

Se veç kështu vjen pranvera

25. 06. 2015