Arbana Xharra: “Proamerikani” Adem Grabovci

“Proamerikani” Adem Grabovci

Nga Arbana Xharra

Edhe pak ditë Adem Grabovci do të futet kryelartë në sallën e madhe të “Lutjeve të Mëngjesit” në Washingron si një “proamerikan” i denjë. Duke mos besuar as vetë se si i ra hise të jetë pjesë e këtij organizimi mes kongresmenësh, ku i pranishëm do të jetë edhe kryetari i SHBA-ve, Barack Obama. Grabovci thotë se me gjermanisht qëndron mirë, rezultat i punës në një fabrikë në Romanshorn, buzë liqenit të Konstancës, kurse me anglisht jo edhe aq, por s’i prish punë kapaciteti “intelektual” në komunikim, atij i mjafton ftesa që ka marrë për vizitë.

“Hajt se s’o gajle që s’di anglisht, as shefi s’din”, do ta ngushëllojë veten mbase Grabovci, teksa me mburrje do të parakalojë nëpër sallë, duke falënderuar në heshtje Kongresin, për këtë mundësi jetësore, që as në ëndërr nuk e kishte parë. E sa për anglisht, e ka me vete Bekim Çollakun, i cili edhe ashtu është mësuar duke përkthyer për Thaçin tash sa vjet, pse i ndihmon pak Grabovcit nuk bëhet hataja.

Më 5 shkurt, në Washington, Grabovci me delegacion do të përfaqësojnë pushtetin që për vite të tëra u është referuar vlerave amerikane, por që në realitet ka shkelur gjithçka që përfaqëson demokracia amerikane. Pushtet ky që secilin veprim e ka arsyetuar me kartën e “proamerikanizmit” duke e mashtruar dhe duke e kërcënuar opinionin. Kurse kritikuesit e veprimeve të PDK-së janë shpallur lehtësisht antiamerikanë. E po këta “proamerikanë” prej vitesh keqpërdorin demokracinë, shkelin ligjet, vrasin virtualisht kritikët dhe tallen me çdo vlerë demokratike. Ata janë shndërruar në milionerë me para të shtetit, por edhe kapadainj. Kur djemtë e Grabovcit rrahin me shuplaka fytyrës policin e shtetit të Kosovës, askush nuk guxon të bëjë zë.

Këta “proamerikanë” si Sami Lushtaku, në emër të luftës ende marrin miliona euro përmes tenderëve. “Proamerikani” tjetër, Azem Syla, keqpërdori sistemin social zviceran, duke përvetësuar gati gjysmë milioni franga nga sigurimet sociale. “Azilkërkuesi” Xhabir Zharku u arratis pa asnjë problem nga Kosova. Ky tabor i përgjuar dhe i dyshuar për korrupsion me vite të tëra çdo fëlliqësi e ka fshehur nën maskën e “miqësisë me Amerikën”. “Komandantët supremë të UÇK-së” ende kërcënojnë e shantazhojnë në emër të luftës.

Këta degradues të Kosovës fatkeqësisht po marrin ftesa duke i nderuar me vizitë në Washington. Këta që denigruan aq shumë Kosovën, saqë nuk ka nevojë të përmenden radhazi skandalet e tyre.

Mjafton t’i hedhësh një sy autobusëve që po nisen çdo natë nga Kosova dhe përmes Beogradit po vazhdojnë drejt Hungarisë me plot të rinj, familje e nëna me fëmijë.

Ata po i lënë pas pronat e tyre të poshtëruar dhe të plaçkitur nga ky pushtet në shkëmbim të kampeve të Hungarisë, me shpresë se do të gjejnë një jetë më të mirë. Çdo natë nga dhjetë autobusë, vetëm nga stacioni i autobusëve të Prishtinës, nisen drejt kufijve të Schengenit, nga një përllogaritje e thjeshtë del se vetëm brenda këtyre dy muajve kanë ikur rreth 30 mijë veta nga Kosova.

Pamjet e njerëzve teksa shtyheshin kush të hipë i pari në autobusë të linjës Prishtinë-Beograd dhe fëmijë që qanin, tmerruan opinionin. Kosova po zbrazet për shkak të një zori të madh që ka ky popull, e që qeverisja e sojit të Grabovcit e solli në këtë derexhe Kosovën.

Me këtë klasë politike që në thelb është antiamerikane, antievropiane dhe antiperëndimore integrimi i Kosovës merr fund në urën mbi lumin Ibër, aty ku përzihen interesat dhe bizneset e kriminelëve serbë dhe “proamerikanëve kosovarë” të partisë së xhabirëve.

Derisa Grabovci me shokë do të bredhë poshtë e përpjetë Washingtonit, autobusët përplot me të rinj që nuk shohin të ardhme në Kosovë, as 15 vjet nga çlirimi prej regjimit serb, marrin rrugën përmes Beogradit drejt Hungarisë.

Kurse bilanci i Qeverisë së përbërë nga “miqtë e Amerikës” mbeten vetëm kampet e Evropës plot e përplot me azilkërkues kosovarë.