Zeqir Lushaj: Fluturova…,ika…!!

FLUTUROVA…,IKA… !!

 

Zeqir Lushaj

 

“…Shite tokën,…del hup krejt…!”

-Varg i një kënge popullore,rreth një shekull më parë-

( Fletë ditari,Tiranë, shkurt 1998)

 

1.

Më thanë se:

I biri i xhandarit jam !

-Në çdo fletë biografie,

Në çdo dosje e kam .

2.

Më thanë se:

-Je,një katundar-malok !

Me prejardhjen time,

Mburrëm edhe sot .

3.

Më thanë se:

-Je agjent i Sigurimit!

…I shikova,pak,

Si me çudi …!

(Një meritë,

E panjohur prej meje,)

Ama,gjithe Bota,

Punon për Siguri !

4.

Më thanë se:

Je kriptokomunist,

Nuk ke per t’u rinovue !

Ç’ka me ba?

-Medet për mue !

5.

Më thanë se:

-Je feminist ,

…Sa shumë vajza ke dashtë !

-Sa mirë,-ua ktheva:,

“Në vesh të Perëndisë,

…Zoti e thashtë…!”

6.

Gjithë keto akuza,

(Nuk janë,…as gjysma),

Mbarë e mbrapsht i dëgjova,

Vetën e hangra me dhëmbë,

Bana si bana…,

I durova !

7.

Kur,më thanë se:

-Je servil-karrierist,

Të dhimbset karrika !

U preka në shpirt,

(Mallkova në heshtje):

-Paçi faqen e zezë!

…Ju raftë pika !

…!

(Ma trazoi shpirtin një fjalë,

Fjalë e vjetër,qyshkurë:

-Unë me bukë,e Ti me gurë !)

8.…!

Kur,me kokën mbrapa,

Rëndova…,

Në shkallët e avjonit (!!),

Mu duk vetja…,

Breg-varrit,

Gozhduar,mes arkivolit…!

…!

9.

-Prapa diellit…,

E thefsh qafën…!

Më bahej se,(…ata),

Më flisnin në vesh !

Ata…,(ata e ato!),

Që gjithë jetën i desha,

Dhe do t’i dua ,

Deri sa të vdes. !

10.

Si zogu mbi lis,

Instinktivisht,

Çukita…,

…Mbi xham,

Xhamin e qelqtë ,

Me ballin mbeshtetur,

Fshiva,

( lehtë),

Avullin me dorë,

Por… ,

Pa e kuptuar,

Kisha përshëndetur!

11…!

N’daç, përshëndeta,

N’daç ,çukita…!

?!…,

12.

…!

Fluturova…,

Ika….!!

Rinas (Tiranë),27 shkurt 1998

./.