Karaçica: Ortodoksia e përlindur shqiptare

Ortodoksia e përlindur shqiptare në Maqedoni

Nga Skënder Karaçica

Shqiptari ortodoks dhe intelektuali Prof.dr.Branislav Sinadinovski erdhi në Amerikë për të promovuar librin e tij shkencor-historik që hedh dritë për kohën e asimilimit dhe të anatemimit të pjesë së kombit shqiptar ortodoks nga regjimet antishqiptare serbo-maqedonase tash e një shekull. Në mesin e njerëzve të gjakut të tij në Çikago dhe Nju Jork, e njëjta porosi kombëtare: Shqiptarët ortodoksë të kenë të drejtën e përcaktimit dhe të daljes nga errësira dhe dyert e fshehjes së identitetit që e bëri regjimi sllavomaqedonas në emër të besimit fetar (ortodoks) për gjoja se ishin të një ,,gjaku,,dhe të një feje të përbashkët! Koha erdhi. Po troket ora historike dhe kombëtare në Rekën e Epërme ku nënat shqiptare u këndonin shqip ninullat fëmijve të vet, të veshura me kostumet e traditës me vijësimin e folklorit, të gjuhës dhe riteve se ata janë të gjakut shqiptar. Nuk janë tjerë. Nuk jemi të huaj, e thanë në tubimet e promovimit dhe të takimeve tjera sy me sy me njeri-tjetrin.

Reka e Epërme shqiptare është zgjuar në mëngjeset e pranverës. Ajo i thërret bijtë dhe bijat e veta nëpë vendet e shpërndara të Maqedonisë që të vijnë në tokën e vet, nën erëmollën e pemëve që kundërmojnë aromën shqiptare ortodokse me besim tek Zoti dhe me tapinë e vet që janë Atdheu-Flamuri-Gjuha-Gjaku. Po sot e kujtojmë mësuesin Ferit Bajrami i katundit të Josif Bagërit, që fund të viteve të gjashtëdhjetë, regjimi antishqiptar maqedonas i kohës së Llazar Kolishevskit, e pati shpallur nacionalist dhe shqiptaromadh. U ndoq dhe u largua përgjithmonë nga puna në arsimimin e brezave të shkollës shqipe. Po sot, në Rekën e Epërme, të hapet shkolla shqipe dhe të marrë emrin e mësuesit të përndjekur Ferit Bajrami! Në orën e mësimit, një nxënës i tij, siç shkruan kronika e kohës, thot: Na, mësues, nuk dimë maqedonisht. A mundesh edhe neve të na japësh mësim shqip? Pasi mori pëlqimin edhe të prindërve, mësuesi shqiptar filloi ta zhvillojë mësimin vetëm në gjuhën shqipe. Por kur për këtë e mori vesh pushteti maqedonas, mësesin e dëbuan nga shkolla!

Një shekull vetmi (1913-2015)! Një shekull asimilim dhe anatemim i përaktësisë kombëtare shqiptare ortodokse në Maqedoni. Në kohën kur shqiptari ortodoks Sinadinovski kthehej për në Shkup, aty përsëri ishte Nazim dhe Emin Halimi që i uruan udhën e mbarë vëllait me këto fjalë: Të fala Atdheut! Të fala Rekës së Epërme! Profesor Sinadinovski i falenderon të gjithë shqiptarët në Amerikë dhe me lot në sy u tha: Jemi shqiptarë,do të bëhemi bashkë në tokën etnike në Maqedoni! Udha e mbarë vëlla shqiptar ortodoks profesor Sanidinovski!