Qazim Shehu: Ndoshta

NDOSHTA

QAZIM SHEHU

Në peshë të ajrit kap valën e një kënge,

Vala thërmohet, bëhet ajër në flokët e tu,

Veçse unë i lehtë si ky ajër me këngë të përmbysura,

Tek ti s`mund të hyj.

As të nxjerr nga heshtja e gjatë,

Ku je ngufosur për dreq,

Ndoshta mund të thirr një shtërngatë,

Jo këtë ajër që dridhet si qelq…

POROSI PËR POETËT

Poetë të modës së vetëkëndellur,

Poetë figurash të përdredhura,

Në thellësi të vetes duke vjedhur,

Aty ku gënjeshtra qet të vjellura,

Poetë  a e dini ju sa kushton dashuria për popullin,

Kur dashurinë për veten ktheni në mit?

Poetë dilni nga rrëmimi I vetvetes ,nga shtrydhja e imagjinatës,

Nga figurat e përdredhura si rrjeta,

Në zemrën e popullit kur të futeni,

Në shtëllungat me brenga,

Aty me zjarr do mbruni vargun tuaj,

Kështu jetoni sa vetë jeta…

URITHË

Ne zotërinj mbetëm pas jush,

Na i morët të drejtat të gjitha,

Kur ne tham pjegull ju volët rrush,

Mbi supet tona u rritët si uritha.

Ju urithë mund të rrëmonit nën tokë,

Aty ku keni folenë,

Jo mbi supet tanë,

Zhytur në baltën e një shprese të rremë...

DREDHI YJESH

Shkëndijojnë ,feksin, feksin shkëndijojnë,

Shkrumbin e mbetur prej djegies,

E vënë në gjurmët që harrojnë.

Hapësirave të pamatura që nuki kap,

Syri jonë.

Aty ku emri i tyre vetëm jeton…

Sa yje i shkëputa nga qielli,

I vura në vargje në fjalë të papeshuara,

Ato vetëm emrin na lanë tua përmendim,

Më tepër se dritën shkrumbin na lanë në duar…

NJË FLETË MËLLAGE

Vriten zemrat pa asnjë shkak

Në hipokrizi.

Dashuria gjithnjë e shpik  një llak

Me tepri.

Të rendësh  pas dashurisë ,e pafalshme,

Kur një mijë ngjyra ndez e shuan,

Më mirë të rrishë në ngjyrën e një flete mëllage,

Që ngjyrën e vet pa xhelozi ruan…