Kulturë
Istref Haxhillari: Gruaja që nuk e meritonte dashurinë
E hene, 08.04.2013, 06:15 PM
Gruaja që nuk e meritonte dashurinë
Nga Istref Haxhillari
Kim Zhaka
u shtrua në spital me dhimbje të befta e të forta barku. Mjekët diagnostifikuan
peritonit akut të zorrëve.
U operua
atë mbrëmje.
Sava i
ndenji te koka pa u larguar asnjë minutë. Trupi me përmasa fëmijësh shtrihej pa
fuqi mbi shtrat. Katandisur në gjendje vegjetale të pashpresë, përngjante
kufomë e pakallur në varr. Pamja e
mëparshme qe shpartalluar në dy orët e operacionit.
Keqardhja
kapërceu përfytyrimet e saj. Më shumë ndjesi e zgjatur faji si t’i kërkonte të
falur për jetën e pavarur e të fshehtë. Për herë të parë kuptoi me qartësi të
habitshme se bashkëjetesa e gjatë nuk kaloi pa lënë gjurmë. Sido që e pati shpërfillur,
madje urryer kushedi sa herë, ai nuk e bënte veten, mundohej t’i përshtatej
natyrës së saj të hedhur pak çapkëne, siç u shprehej të tjerëve.
E gërryen
parandjenja të errëta. Ndoshta burri i transformuar çerek njeriu nuk do të
kthehej në
gjendjen
e mëparshme, as do të përmendej kurrë.
Një valë keqardhjeje e bëri të reflektonte për vitet e shkuara. E donte të
shoqin në mënyrën e vet si pjesë të jetës prej njëzet vitesh. Sa herë kthehej
në shtëpi, ai e priste me ankth. Ndodhte të nxehej e bërtiste, po vinte çasti
pajtoheshin si të mos kishte ndodhur asgjë. Në periudha të gjata mirëkuptimi
lëshonin pe, i besonin njëri-tjetrit.
Duke
vështruar me sytë e dhimbjes trupin e të shoqit mendoi se jeta e tyre e
përbashkët nuk qe aq
e keqe.
Nëse pati të çara, faji qëndronte në anën e saj. A nuk ka të drejtë burri t’i
kërkojë llogari gruas kur vonohet orëve të vona të natës? A nuk duhet të
bërtasë kur dyshon në ndershmërinë e saj? Ai pati plot dyshime të tilla.
Njerëzit priren të mos e mbajnë gojën mbyllur, i zmadhojnë edhe ato që mendojnë
vetë.
Iu
dhimbs. Nëse vdiste nuk do ta merrte veten kurrë.
Disa
çaste nuk mundi të mendojë asgjë, ngashërimet ia dridhmuan trupin. U kthye nga ana tjetër e shtratit duke
luftuar të mbante lotët, u plas në karrige, nuk lëvizi për një kohë të gjatë.
Nga mesi
i natës i shoqi rënkoi lehtë.
-Sava, -
pëshpëriti me zë të shuar.
-Jam
këtu, - nxitoi të përgjigjej.
-Si është
puna?
-Operacioni
doli mirë, - i tha me indiferencë të shtirë, pa kthyer kokën.
-Jam kaq
i lodhur.
Ajo i
shkoi dorën mbi ballë, e fërkoi butësisht.
-Ndodh
gjithnjë kur operohet njeriu, - i tha.
-Do të
ngrihem në këmbë?
-Doktori
më siguroi se do të përmirësohesh shpejt.
-Më duket
e vështirë.
-Do t’ia
hedhësh, - i dha kurajë po zëri iu drodh. Dhe nuk kaloi pa u vënë re. Kimi buzëqeshi
hidhur.
Dhëmbët e bardhë, të ngrënë e tregonin të përçudnuar.
-Je
gënjeshtare e lindur, - e shikoi përvujtërisht.
-Ndonjëherë
edhe gënjej, - qeshi, - por tani jo.
-Faleminderit.
-Përse?
-Që
kujdesesh për mua.
-Jam
gruaja jote, - tundi kokën me dashamirësi.
I sëmuri
lëvizi mundimshëm, i kërkoi sytë.
-Nuk jam
sjellë aq mirë me ty, - tha ngadalë.
-Kam
gabuar, Kimi. Domosdo burri inatoset, këshillon.
Tentoi të
kthehej në krah, nuk ia doli dhe bërtiti nga dhimbje të forta në fund të
barkut. Sava e
ndihmoi
të zinte pozicion të përshtatshëm, ngriti mbulesat, futi cepat e çarçafëve nën
dyshek.
-Duhet të
flesh, - i tha, - gjumi të bën mirë.
-Nuk je
larguar fare?
-Deri sa
të përmirësohesh do të rri këtu.
Ai puliti
sytë, të vetmit që i urdhëronte, për t’i thënë se nuk besonte të shërohej.
Më ke
mua, - u mburr Sava.
-Faleminderit,
- i tha përsëri. Pas një minute zuri gjumi.
E shikoi
tek flinte dhe u lehtësua. Operacioni e mundoi ngaqë ishte i dobët, prandaj
dukej aq i
patakequr.
Me siguri do t’ia hidhte. Si e qetësoi veten në një farë mënyre, vetvetiu
mendja i shkoi pas te ngjarjet e asaj dite, padashur i ndaloi te portreti i
ëmbël i Ned Aganit.
Nën
përqafimin e tij dëgjoi zilen e zgjatur të aparatit celular, po nuk lëvizi nga
vendi.
-Telefoni,
- e kujtoi Nedi.
-Le të
bjerë, - gërhiti nga kënaqësia e peshës së krahut të tij mbi gjoks.
Ai e mori
nga tavolina ia afroi te veshi. Sava shtypi butonin, dëgjoi menjëherë një zë të
njohur e të transformuar.
-Babi po
vdes, - ishte Niti, i biri, i shokuar nga e keqja.
Kujtoi të
gjithë skenën, ambulancën, vëllain plak të Kimit, komshinjtë e mbledhur me
ngut, spitalin, mjekët. Dhe ja tani përgjonte tërë shqetësim të shoqin në një
dhomë të ngushtë e të pa ajrosur, ku të mbysnin aromat e forta të
medikamenteve.
Sapo i ra
ndërmend i dashuri, një shqetësim i brendshëm ngriti krye, gati e harroi të
sëmurin. Pati qenë ëndrra e saj të lidhej me një burrë të vetëm, ta donte gjer
në fund të jetës, t’i përkushtohej. Ned Agani u bë dashuria që kërkoi gjatë.
Për vete nuk dyshonte, e kishte arritur. Për atë s’qe aq e sigurt.
Zemra e
gruas kupton shumë gjëra më parë se të ndodhin.
Ktheu
kokën nga Kimi dhe u habit që hidhërimi për të zinte pjesën më të vogël të
brengave. I erdhi turp. A thua meraku për burrin lidhej vetëm me sëmundjen?
I sëmuri
u zgjua mbytur në djersë. Nuk dilte dot jashtë dhe barku i fryrë, zorrët e
bllokuara e torturonin. Kur mbërriti mjeku bashkë me një infermiere të shkurtër
topolake, Sava u ngrit në këmbë, vështroi e alarmuar. Mesoburri me flokë të
shprishura dhe bluzë hedhur me nxitim krahëve i bëri shenjë të ulej.
-Përgatit
klizmën, - urdhëroi infermieren dhe iu drejtua Savës duke nxjerrë me potere
tymin e duhanit.
-Duhet
t’iu sqaroj disa rrethana të sëmundjes, - u përpoq t’i zgjidhte fjalët. - Çdo
pacient është një tragjedi që flet, gjithçka është e mundur. Burri juaj ka
pësuar peritonit ose ngatërrim të zorrëve, siç thuhet rëndom. U detyruam t’i
presim një të tetën e zorrës së hollë, pjesë e vdekur nga mosqarkullimi i
gjakut për katër orë.
Sava
rrekej të perceptonte sa më shumë hollësi.
-Nga kjo
anë nuk ka ndonjë komplikim, gjithçka shkoi mirë, - vazhdoi bluza e bardhë,
- pas klizmës fillojnë gazrat dhe zorrët
do të funksionojnë njëlloj si më parë.
-Oh,
doktor, më gëzuat, - u nxitua ta falënderonte.
-Ne
dyshojmë për masë të huaj në duoden si shkak i peritonitit, - vazhdoi mjeku, pa
marrë parasysh entuziazmin e saj. - Nuk e dimë nëse është beninj. Morëm
kampione nga stomaku, i vumë në kushte vegjetacioni laboratorik, po duhet të
presim disa ditë të marrim përgjigje të saktë. Shpresojmë të jetë malinj.
Sidoqoftë pasi të përjashtojmë këtë rrezik mund të flasim për shërim të plotë.
-Çdo të
thotë kjo? - pyeti e merakosur.
-Peritoniti
është pasojë e tumorit në stomak, - bëri një përçapje tjetër.
Sava
vështroi e hutuar, lëvizi buzët pa nxjerrë zë. Mjeku e kuptoi se ajo nuk do ta
merrte vesh kurrë, as do ta pranonte të vërtetën e frikshme, prandaj u nxitua
t’i binte shkurt.
-Hë për
hë asgjë, - i tha, - më tej të shohim.
-Si i
bëhet për dhimbjet, vuan shumë.
-Mbaje me
kompresa, do të përmirësohet shpejt, - sqaroi së fundi dhe u largua.
Pas tre
ditësh u ngrit në këmbë, filloi të pijë lëngje. Sava shkëputej dy herë në ditë,
i përgatiste ushqim sipas këshillave të mjekut. E zëvendësonte i vëllai i
Kimit.
Ndihej
mirë. Gati i shëruar priste ta nxirrnin nga spitali, kur Savën e thirri
infermierja.
-Ju lutem
ejani pak me mua.
Ajo u
tkurr përnjëherë, i shkoi mendja te mostra e mbjellë nga stomaku i Kimit.
Pothuaj e pati harruar, vinte me shpresë se qe procedurë rutinë për gjithë të
sëmurët. Aq më tepër që i shoqi e mori veten.
Në dallim
nga herët e tjera, mjeku u ngrit prej kolltukut, i afroi karrigen.
Sava u
ul, priti e ngrirë.
-Më duhet
t’u jap lajm të keq, - i tha pa e
shikuar në sy.
Asaj s’i
duhej më asgjë tjetër. E kishte përjetuar aq shumë sa hollësirat nuk do t’i
bënin punë. Fundja përse duhet t’i dinte?
Jashtë çdo dyshimi jeta e të shoqit po shteronte.
-Sa i
ngelet? - pyeti për t’i dhënë fund çastit të rëndë.
-Gjashtë
muaj, e shumta, - i tha.
-Doktor...
- diç deshi t’i thoshte, por ai i vuri lehtë dorën në sup, e ndërpreu.
-Bëni ta
kalojë sa më natyrshëm kohën e mbetur, - i tha miqësisht.
-Faleminderit,
- mezi mundi të thotë dhe u largua gati me vrap. Në korridor shpërtheu në të
qara, vuri dorën mbi sy, u mbështet pas murit.
-Nuk bën
kështu, - e solli në vete zëri i butë i infermieres së shërbimit, - duhet të
bëheni e fortë.
-Nuk dua
të bëhem e fortë, - iu plas në krahë. Dridhej nga e keqja.
-Nuk u
beson askush, - i tha infermierja me një dritë djallëzore në sy, - mos bëni
kot.
Asgjë nuk do ta ngushëllonte sa këto fjalë, lotët
iu terën si me magji. Iu duk vetja hipokrite e pashoqe, a thua tjetra e dinte
jetën e saj. Pastaj u kujtua se nuk e njihte.
-Ç’thua
moj, - u egërsua.
-E
dëgjove, - buzëqeshi ajo dhe u largua qetësisht.
Për
familjen Zhaka shkelën ditë e net të rënda, ngarkuar me tmerrin e sëmundjes pa
shërim. Shpresat u shuan, gjithçka mbetej ishte ankthi i stërgjatë. Sava nuk i
tha askujt, e mbajti peshën e plumbtë
për vete gjashtë muaj rresht. Të tjerët ende shpresonin.
Morfina u
bë mjekimi i vetëm, asnjë medikament nuk hynte në punë. Sapo kalonte efekti
qetësohej pak, pastaj fillonte sërish kriza. Dridhej, ulërinte.
Sa vinte
tretej, humbiste.
Atë
mbrëmje, sapo mori dozën e përditshme, u ndje më mirë, kërkoi ujë. Sava u afrua
pranë shtratit me gotën e mbushur, i ngriti kokën, e ndihmoi të pinte. Pas dy
gllënjkave e largoi, u shtri i rraskapitur si të kishte kryer punë të vështirë.
Mori frymë thellë, pastaj në një mënyrë intime të beftë i tha:
-Bëhu e
fortë, grua.
-Unë e
fortë jam, ti forcohu, - deshi ta anashkalojë nënthënien.
-E kupton
çfarë dua të them.
-Jo, -
pëshpëriti dhe zemra i rrahu fort.
-Edhe tri
ditë më kanë mbetur, - përmes gjysmerrësirës së dhomës fytyra i shquhej si lule
e bardhë kungulli në mugëtirë.
-Mos fol
ashtu, do të shërohesh, - i tha pa bindje.
Ai e
pikasi nga zëri.
-Ti e
kupton po aq mirë, - vazhdoi, - e kotë të fshihemi më.
Sava e
vështroi turbull përmes qerpikëve të lagur. I zuri llërën mbi bërryl: lëkurën e
kishte të lëmuar e të ftohtë.
-E dije,
apo jo?
-Po, - u
përgjigj ngathët me zë të këputur.
-Duhet të
ma thoshe.
-Ç’vlerë
do të kishte?
Ai u
mendua disa çaste, të fitonte kohë. E kishte vështirë t’i thoshte ato që po
mendonte.
-Jam me
fat, Sava.
Sidoqë u
habit, ajo nuk e bëri veten, pohoi me kokë. Druhej të fliste, s’i zinte besë
zërit.
-Jetova
si duhet, të kam ty, djalin, tani mjaft.
-Të lutem
Kimi, lëri këto.
-Dua ta
dish, isha njeri me shumë fat. Kur sëmuresh e vuan kështu, vdekja është kapak
floriri. Edhe ju shpëtoni nga ankthi.
Sava u
drodh ngaqë ai foli në kohën e shkuar. E quante veten të ikur tashmë, sikur
fliste nga bota tjetër. Fshiu me kujdes sytë, nuk foli. As dinte çfarë t’i
thoshte, vetëm një i marrë nuk e kuptonte si po rridhte puna.
-Kam qenë
i dashuruar me ty, mburresha sa herë e sillte puna. Gjithnjë kisha gëzim të
bukur, fshehur këtu brenda. Sa herë largoheshe prej meje edhe një minutë ishte
e ankthshme si një lamtumirë.
-E di,
Kimi, e kam ndjerë.
-Jo
tamam.
-Nuk e
kam merituar dashurinë tënde.
-Dashuria
vjen vetë, nuk kërkohet me zor, është e kotë, - në fytyrë pasqyrohej si lojë
dallga e çuditshme e fatit.
E pazonja
të vijonte bisedën, e mbytën ngashërimet, lotët i përplaseshin nën mjekër.
-Gabimi
është imi, - tha me zë gjithnjë e më të mekur, - të mora në qafë.
Ai
kërkonte dëshpërimisht të fliste dhe po të mos i kishte sytë mbi të, Sava nuk
do ta besonte kurrë, as do ta njihte atë ton lutjeje dhe dhimbjeje.
-Jo,
Kimi, mos e mundo veten, nëse ka një fajtor jam unë.
-Mos më
ndërpre, s’kam shumë kohë, - mendimet formësoheshin me vështirësi në kokën e tij. Kishte aq gjëra për të thënë... dhe
një kohë mizorisht të shkurtër për ta bërë këtë.
-Nuk mundem
më.
-Edhe pak
e do të mbaroj, - mori frymë sa më thellë mundi. - Nedi është njeri i mirë, e
kam vënë re.
Dreq, kjo
i kaloi kufijtë. E dinte dhe nuk ia zuri kurrë me gojë. Pa pikë gjaku në fytyrë
shikonte dhe nuk e perceptonte, dëgjonte po nuk kuptonte.
“Zot, më
ndihmo”, - u lut me gjithë shpirt.
-Martohu
me të Sava.
-Jo, o
Zot.
-Është
amaneti im, - tha me vështirësi.
Sytë nuk i hapi, mbi kapakët e verdha nxirrnin
krye damarë të hollë kaltëroshë. Kockat e mprehta nën lëkurën e nderë të
fytyrës, faqet e gropëzuara dëshmonin se mishi nën to qe tharë. Lëvizi dorën ta
përkëdhelte. Sava ia mori gishtat e holluar e të ftohtë i vuri në buzë, ndjeu
tkurrjen e venitur të mollëzave.
Një
buzëqeshje e mezidallueshme i përndriti fytyrën.
-Tani...
erdhi çasti! - germëzoi me zë të rënduar.
Pas
këtyre fjalëve të nxjerra me mundim ngriu. Mbi fytyrë u përvijua një pamje
qetësie dhe iu zhduk çdo shprehje: u shuajt siç shuhet drita elektrike duke
kthyer një çelës. Heshti përgjithmonë.