Vullnet Mato: Gjilpëra

Vullnet Mato

G J I L P Ë R A

Më i afërti pasardhës,

nipi im vogël,

më i shtrenjti i zemrës

sime prej gjyshi,

sot m’u lut më tepër

se për çdo lodër

t’i bëja gjilpërën

për qetësim apendiciti.

Dora e infermieres

i dukej e hidhur,

sikur e thumbonte  

një grerëz në tule.

Kish dëgjuar gjyshen,

se isha i stërvitur,

me dorën të lehtë

siç bëja pekule.

Por ky rast ishte

një provë e dhimbshme,

të shpoja nervin e hollë

të ndjesive të mia.

U solla përqark

gjatë një ore të trishtime,

mos më dridhej dora

nga dhembshuria.

Zura mbi lëkurë

ndjeshmërinë t’i ngacmoja,

dhe dhimbjen e dobishme

sakaq kisha bërë.

Kur vogëlushi më pyeti

pse po vonoja,

kisha shpuar zemrën time

me gjilpërë...