BDSH: Gjykata Supreme e Maqedonisë dëshmoi në mënyrë Supreme natyrën antishqiptare...

Për opinionin kombëtar dhe atë ndërkombëtarë tani më është e njohur se dhuna dhe terrori shtetëror i diktaturës VMRO-PDSH kulmoi me masakrimin e popullsisë së pafajshme në fshatin Brodec të Malësisë së Tetovës me 7 nëntor të vitit 2007.

Bombardimet e ushtrisë dhe policisë maqedonase ndaj këtij fshati shqiptar shkaktuan 6 të vrarë dhe 12 të plagosur  (tre persona vdiqën më vonë si pasojë e kësaj dhune).

Për opinionin kombëtar dhe atë ndërkombëtarë tani më është e njohur se 13 shqiptarë u arrestuan atë ditë me qëllim të detyrimit të pranimit të veprave që do të arsyetonin “efikasitetin e shtetit maqedonas kundër terrorizmit shqiptar”.

Opinioni publik kombëtar dhe ai ndërkombëtar pati mundësi të shihte vetëm disa nga pamjet e tmerrit dhe torturave të hetuesisë maqedonase ndaj shqiptarëve për t’i detyruar të pranojnë veprat që nuk i kanë kryer.

I rikujtojmë opinionit publik shqiptar se në të gjitha raportet e institucioneve ndërkombëtare, qofshin politike, qofshin të karakterit për mbrojtjen e të drejtave dhe lirive të njeriut dënohet dhuna që autoritetet e Shkupit përdorin gjatë hetuesisë.

Përkundër kësaj, Gjykata Supreme e Maqedonisë bëri të plotfuqishëm metodat mesjetare të  hetuesisë maqedonase duke vërtetuar si të plotfuqishëm dënimin prej 190 vjet burg ndaj të dënuarve për “Rastin e Brodecit”  me 26 shkurt të këtij viti, veprim ky që vetëm vërteton natyrën antishqiptare të institucioneve të këtij shteti.

Bashkimi Demokratik Shqiptar dënon këtë funksionimin antishqiptar të institucioneve të shtetit maqedonas dhe apelon në domosdoshmërinë e mobilizimit të gjithëmbarshëm kombëtar për ndërprerjen e dhunës dhe diskriminimit që ky shtet aplikon ndaj shqiptarëve. 

Veprimet e këtilla të diskriminimit racial ndaj shqiptarëve, parasëgjithash janë fatale për vetë shtetin e Maqedonisë dhe padyshim që çojnë drejt destabilizimit rajonal. Ato janë kundër aspiratave euro-atlantike të Maqedonisë dhe standardeve ndërkombëtare të të drejtave të njeriut.

28 shkurt 2010