Shtesë » Lajme

Milazim Kadriu: Ish-kryetari i Amerikës, Bill Klinton qëndroi në Prishtinë

E diele, 01.11.2009, 07:57 PM

KLINTON FALËNDERON POPULLIN E KOSOVËS DHE AUTORITETET E LARTA TË VENDIT PËR MIRËNJOHJEN DHE MIKËPRITJEN

Nga Milazim KADRIU

Kuvendi i Kosovës mbajti një mbledhje solemne me rastin e qëndrimit në Prishtinë, të ish kryetarit amerikan, Bill Klinton.
Zbulohet shtatorja e ish-kryetarit amerikan Bill Klinton në një shesh, në qendër të Prishtinës

Me ftesë të kreut të Kosovës dhe qëllim për të marrë pjesë në zbulimin e shtatores së tij, sot po qëndron në Prishtinë, kryetari i Amerikës gjatë luftës në Kosovë, Bill Klinton. Me këtë rast autoritetet më të larta të vendit iu kanë bërë thirrje qytetarëve për pritje sa më madhështore dhe të dinjitetshme duke vlerësuar lartë marrëdhëniet në mes të Prishtinës dhe Uashingtonit.

Në hapjen e seancës solemne, kryetari i Kuvendit të Kosovës, Jakup Krasniqi përshëndeti ish-kryetarin e Amerikës, Bill Klinton, i cili po qëndron për një vizitë në vendin tonë, për të marrë pjesë në ceremoninë e zbulimit të shtatores së tij, në Sheshin “Bill Klinton”, në Prishtinë. Më pas Jakup Krasniqi i ka dhënë fjalën kryetarit Fatmir Sejdiu i cili i uroi mirëseardhje, z. Klinton. Sejdiu ka folur për meritat e tij dhe të Shteteve të Bashkuara të Amerikës, në ndihmën dhe kontributin që i ka dhënë popullit të Kosovës, para, gjatë dhe pas luftës në vendin tonë. Në fjalën e tij para kryetarit amerikan, Klinton dhe deputetëve të Kuvendit të Kosovës, kryeministri Hashim Thaçi ka falënderuar përzemërsisht mikun e madh të shqiptarëve, z. Klinton dhe Shtetet e Bashkuara të Amerikës, si meritorët kryesorë për çlirimin dhe pavarësinë e Kosovës.

Kryetari amerikan, gjatë kohës së luftës në Kosovë, Bill Klinton, me të arritur në Prishtinë, u takua dhe bisedoi me krerët më të lartë të vendit. Ndërkohë ai mori pjesë në seancën solemne të Kuvendit. Në fjalën e tij të gjatë para parlamentarëve kosovarë, Klinton iu përgjigj mirënjohjes së kosovarëve se “ndjehet krenar për Kosovën, dhe se kosovarët po ashtu duhet të ndjehen krenar për veten e tyre”. “Ndoshta jeni 2 milionë apo 200 milionë, por njësoj do të ishte fuqia e shembullit tuaj... duhet të jeni shembull dhe krenar për atë që keni kaluar”, tha mes duartrokitjeve Klinton. Kosova nuk është më ajo që ishte në vizitat e mëparshme dhe këtë Presidenti e vërtetoi me fjalët, “Duhet të jeni shumë krenar, ju keni konsoliduar institucionet demokratike që i keni ndërtuar, keni ngritur shtypin e lirë, partitë më të mëdha janë duke punuar së bashku, jeni pjesë e BB, FMN pavarësia e saj është pranuar nga 62 shtete të botës dhe së shpejti do të jeni dhe në BE, NATO etj”. Sipas Klinton edhe puna që ka bërë shteti kosovar me etnitetet është për tu përgëzuar. “Puna që keni bërë për të siguruar serbët, ju jeni shembulli më i mirë”. Megjithatë, tani duhet të mendojmë se çka do të bëni, dhe një prej gjërave që kam mësuar është fakti se është shumë më e lehtë për njerëzit, të ndajnë të ardhmen, nëse mendojnë më shumë për të dhe më pak për të kaluarën”, tha ish presidenti amerikan, Bill Klinton, gjatë fjalimit të tij në Kuvendin e Kosovës. Klinton ka shprehur kënaqësi dhe entuziazëm të veçantë për mikpritjen që iu ka bërë nga populli dhe autoritetet e vendit tonë. Ish presidenti i Shteteve të Bashkuara të Amerikës Bill Klinton ka kërkuar nga udhëheqësit e institucioneve dhe nga populli i Kosovës që ta lënë të kaluarën prapa dhe të merren me të ardhmen, duke ndërtuar një jetë të përbashkët të të gjitha komuniteteve, duke falur dhe duke respektuar njëri-tjetrin, ndërkohë që ka përgëzuar krerët e Republikës së Kosovës për ngritjen e institucioneve demokratike të Kosovës.

Në prani të mijëra qytetarëve, që kishin arritur nga të gjitha viset e vendit, në Prishtinë, në sheshin “Bill Klinton” është përuruar shtatorja e kryetarit të Shteteve të Bashkuara të Amerikës gjatë luftës në Kosovë, z. Bill Klinton. Kjo shtatore e lartë tri metra është ngritur në shenjë nderimi për kontributin që kanë dhënë Shtetet e Bashkuara për lirinë dhe pavarësinë e Kosovës. . Ish-presidenti Klinton ka siguruar popullin e Kosovës se do të ketë gjithmonë mbështetjen e palëkundur të SHBA-ve.

Shtatorja e ish presidentit amerikan Bill Klinton në sheshin që mban emrin e tij në Prishtinë, është punuar nga skulptori llapjan Izeir Mustafa, ndërsa gjatë ceremonisë së zbulimit kanë qenë të pranishëm mijëra njerëz për të nderuar “heroin e Kosovarëve” që i hapi rrugën pavarësisë së Kosovës 10 vjet më parë.
Para zbulimit të shtatores, Kryetari i Shoqatës, “Miqtë e Amerikës- Miqtë e Bil Klintonit”, Agim Rexhepi tha se ky bust është nderimi që populli i Kosovës i bën një heroi të gjallë të tij.

(Vota: 15 . Mesatare: 5/5)