Një tufë me epigrame nga Viron Kona

Nise nga vetja

Ti flet e akuzon të tjerët përditë,

për disa gjëra mbase ke t`drejtë,

veçse, që të jesh i besueshëm,

fol dhe për “zullumet” që ke bërë vetë!

Si një enë me presion

Njeriu si qenie me arsye,me gjak e nerv,

hallet dhe streset me vështirësi i duron,

ndaj ka sajuar thashethemet e gazetat,

që të mos shpërthejë si enë me presion!

Që t`ia dalësh asaj ane!

Mendon se po u dhimbsesh?

Askush për ty s`do t`ia di,

po s`e nxore vet gomarin1),

në baltë mbetesh edhe ti...

Edhe një herë, si ju të jem!

Pyetën gjimnazistët drejtorin:

-Ç `do të doje të ishe ti n`jetë:

shkrimtar i madh e me famë,

apo drejtor lider me autoritet?

-Ndihem mirë që jam drejtor,

të jem shkrimtar më pëlqen,

do t`i falja me qejf që t`dyja,

sikur edhe një herë si ju të jem!

I zemëruari

Nëse do të dish se,

kur je i zemëruar me cilin ngjason,

atëherë krahaso veten me një dem,

që ka shpëtuar nga zgjedha dhe s`di për ku vrapon!

Krahasoje dhe me një tren,

që del nga shinat e dihet si përfundon,

por, po deshe krahasoje veten,

dhe me një shofer të dehur në timon!

Në të gjitha rastet, i zemëruari,

vetëm prish dhe shkatërron...!

Macja që mjaullin s` gjuan minj!

Kur e drejta është me ty,

mos u tremb nga asnjë kërcënim,

qeni që leh nuk të kafshon,

macja që mjaullin s` gjuan minj!