Pirro Prifti: Prishja e Stacionit Hekurudhor, Krim

Prishja e Stacionit Hekurudhor të Tiranës një Krim jo vetëm Urbanistik

Nga Pirro Prifti

Nuk mund te qëndrohet pa e vënë re prishjen e stacionit të trenit te Tiranës në emër  bërjes së një bulevardi bazuar në planin urbanistik të Tiranës.

Prishja e stacionit të Trenit ëhtë një krim i pashëmbëllt jo vetëm për   largimin e tij gati 20 km larg nga Kryeqyteti por  duke e bërë të pamundur transportin me tren për banorët e Tiranës por dhe për të gjithë pasagjerët e Shqipërisë që duan të vijnë apo të kthehen nga Tirana për në shtëpitë e tyre.

Përse u bë një veprim i tillë i pa lejueshëm përsa i përket justifikimit se… kështu është plani urbanistik i Tiranës…?!

Së pari plani urbanistik i Tiranës sido që të ishte bërë qoftë nga urbanistët kombëtarë ashtu dhe ata ndërkombëtarë, nuk duhej të largonte Stacionin e Trenit të Tiranës në Vorë, pra aq larg sa praktikisht  linja hekurudhore u asgjësua plotësisht dhe nuk egziston më në Tiranë kjo linjë e rëndësishme transporti.

Së dyti, shumica dërrmuese e shteteve europiano-perëndimore por edhe në botë (shiko Parisin, Londrën, Tokion etj) kanë madje edhe në qëndër të kryeqyteteve të tyre stacionin qëndror hekurudhor si një stacion dhe linjë shumë e rëndësishme transporti. Por në Tiranë Kryebashkiaku Basha veproi `më kokë të vet`,  për të treguar se ai i ditkërka të gjitha (?!), duke dëshmuar kështu karakterin tekanjoz dhe arrogant të një kryetari që nuk ka larg-pamësinë e nevojshme për të qënë kryetar, si dhe  praninë e snobizmit, përsa i përket përuljes pa asnjë kundërshtim ndaj eprorëve të tij klientelistë.

Së treti, transporti hekurudhor, ka qënë në programin e qeverisë demokratike ndoshta jo prioritet por kishte qënë një mundësi përmirësimi i i këtij transporti, duke qënë një transport shumë pak i kushtueshëm, dhe i lehtë për shumicën e popullsisë nevojtare me të ardhura ë pakta; sidoqoftë transporti hekururdhor i mallrave është nga më të preferueshmit sepse gjithashtu është me pak kosto.

Së katërti, a nuk mund të  bashëkjetonte stacioni hekurudhor i Tiranës së bashku me planin e famshëm urbanistik të krijimit të një bulevardi deri matanë Lumit të Tiranës deri në Babrru?

Atëhere del pyetja tjetër: përse e prishi Basha,  Stacionin Hekurudhor të Tiranës ?

Mendoj se ka disa argumenta per prishjen e papritur te Stacionit Hekurudhor te Tiranes. Këtu mendoj gjithashtu se kanë përgjegjësi edhe Këshilli Bashkiak i cili nuk e mori në shqyrtim këtë hata të madhë që i u bë Tiranës. Kjo plagë e hapur do të ketë sigurisht pasoja në transportin e pasagjerëve jo vetëm të Tiranës por në të gjithë Shqipërinë, sepse po krijon një precedent të dëmtimit dhe të prishjes së të gjitha linjave hekurudhore në Shqipëri aty ku ka.

Argumenti i parë është se Projekti për  Tiranën e ka bulevardin por në të nuk thuhej që të shkatërrohej Stacioni Hekurudhor i Tiranës. Ky Stacion mund të çvendosej diku më poshte, p.sh., në Laprakë. Madje edhe tani ky opsion mund të realizohet, vetëm se do të duhet që urbanistët tanë të mos rrijnë të heshtur por të lëvizin dhe të dërgojnë opsionin e tyre sa nuk është vonë tek Kryeministri i Ri për ta paraqitur në Komisionin për Rregullimin e territorit të Republikës së Shqipërisë,

Argumenti i dytë është se bërja e bulevardit në dëm të Stacionit Hekurudhor të Tiranës, të jep përshtypjen se ka interesa klienteliste se sa dobi për qytetarët të cilët e shohin prishjen e stacionit hekurudhor të Tiranës, më tepër si një dëm të madh ndaj interesave të tyre,

Argumenti i tretë është se mungesa e transparencës për të bërë të njohur planin e famshëm urbanistik për bulevardin duke fshehur gjithashtu atë kryesoren- shkatërrimin e Stacionit Hekurudhor, tregon më së miri për qëllime aspak të mira në Projektin e Tiranës moderne por ..pa Stacion Treni. Kjo gjithashtu të le përshtypjen  që Basha  jo vetëm që nuk ka vizione europiane të paktën  por nuk ka as ndërgjegjen e pastër kur ndërmerr vendime të tilla pa këshillime paraprake,

Argumenti i fundit, është se prishja e Stacionit Hekurudor të Tiranës ka krijuar precedentin e shkatërrimit total të hekurudhës të ngritur me aq mund , djersë dhe fonde nga qeveritë e mëparshme të cilat kishin vizionin përkatës për të ardhmen e këtij transporti të rëndësishëm për pasagjerë dhe mallra.

Praktikisht që nga Tirana e deri afër Vorës, të gjitha shinat e trenit do të hiqen dhe hekurudha do të shkatërrohet duke i shkaktuar  vëndit një dëm të pallogaritshëm si nga ana financiare, transportit, por edhe në trashëgiminë e vendit.

Nuk mund të harrohet tendenca për të shkatërruar për shkak të ideve të gabuara të politikanëve dhe dëshirës së tyre patologjike për të bërë si Enver Hoxha-`… atë që bën armiku.. ti bëj të kundërtën….`.

Por sot nuk ka armiq, i nderuar Basha por ka oponencë.  Nuk mund të kuptohet se sa keq u ndodh Tirana kur humbën rreth 2 milion Euro kur u prish mbikalimi i ndërtuar në Zogun e Zi nga Bashkiaku i mëparshëm më 2007, duke e lënë  transportin e Tiranës në atë linjë si mos më keq.

Le të shpresojmë që veprime të tilla aspak qytetare dhe aq më pak profesionale të mos përsëriten më por planet dhe programet të rregullohen bashkarisht duke vënë në plan të parë Tiranën, populli e saj dhe të të gjithë Shqipërisë, duke vënë në plan të parë prosperitetin e këtij kryeqyteti  të ri  të ndërtuar nga hiçi por me një strukturë kaotike dhe aspak funksionale.