Fritz Radovani: At Pjetër Mëshkalla S.J.

At PJETËR MËSHKALLA S.J.

Portret nga Fritz RADOVANI (Grafikë,lapsë) 1993

25 SHTATOR

1901 – 2011 …

110 vjet  ma  parë…

ka lé i paharrueshmi

At Pjetër Mëshkalla S.J.

Nga krijimtaria letrare At Mëshkallës:

5. NANË,  KTHEJU !

Si shkambi n’për rrymë të shekujve,

muret qendrojnë jetike

ngulun për rranzë thëmeleve,

të Rozafës sonë Kreshnike.

Dhe sot, që, féja nipave

shpresët e të Parëve ndritoi,

lè të shkruhet mbi ballë të mureve:

“Nanës, që na vorfnoi!”.

Njâsaj, që’i ditë prej sulmeve

të Kulçedrës me shtatë krena,

na u bâ mburojë e, të nêmuna

s’duroi t’i shohë këto dhena.

Njasajë... por vaj, na fajeve

në verbim s’u vume cak

e Nanës iu randue zemra,

iku edh’e la këte prak!

O ju, që parzme hekuri

luftuet për bésë e fé,

idhtë tue valvitun Flamurin,

shenjtnue me gjak e bé,

zgjonju nën rrasa të heshtuna,

ngrihnju me pa mjerim!

Ndihma e Arbënisë, e Pamposhtuna

ç’u ba?... Si drita u shkim!!...

Po a kurrë, thue, ma kurrë Virgjina

-me gjâmë kah thrret Shqipënia,-

s’do të ndrisë, si ndriti moteve

përbrinjë Rozafës...M A R I A ?!

Tepër lënguem këso shtigjeve

si fëmija mbetë pa Nanë,

për né ma dritë nuk lëshuene

as hyj, as diell, as hanë!

Po a kurrë, ma kurrë, s’do të ngrohemi?

pa shpresë do të rrijmë e të presim?

Po a heshtun gjithmonë vallëja

do të ngeli, në terr kah dënesim?!

Jo, jo! Pse qiellëve të epëra

Zoti me dorë të vet

ka shkrue: “E Zojës asht Shkodra,

e, Zoja e Shkodrës së vet !”.

Qé, ké ato mure të ndrituna,

-zemra m’a ndiën, -qé’i zani

Një populli në hov të galdimave,

tue brohoritë: “O ngâni!...

Ktheu, N A N A !” O, ditë ma e bukra

që Arbënia prét, ago!

Nanë ktheju, e, në mburoje të hireve

në fé shënjte na vëllazno!

Shkodër, 1927.

Shenim nga F. Radovani:

Të gjitha materialet e Tij që do të shperndajë ose do të botoj,

nuk kanë asnjë ndryshim nga origjinali.