Agim Gashi: S'mund t'harroj

AGIM GASHI

SMUND T´HARROJ

(Bijës sime Shqipës që vdiq më 2 gusht 2014)

 

Ditë e netë po më kalojnë

Ti nuk je ma në këtë botë,

Të ka morrë Ty përgjithmonë

Zoti i Madh dhe e lumja tokë.

 

Të thërret djali edhe burri

Babë e bir lotojnë për Ty,

Pse nuk zgjohesh ti moj Shqipe

Në dhe të zi o flen n´qetësi.

 

Të thërrasin motrat tua

Të thërrasin  edhe vllaznia,

Nanës  lotët  spo i teren

Na ka mbetë e shkretë shtëpia.

 

II

Po kalon një jetë e tanë

Na ka nda mërgimi i zi,

Sa shpejt u rrite moj bija ime

Zgjodhe burrin me dashuri.

 

U veshe bukur e shkove nuse

Nuk të thashë as rrugë e mbarë,

Ti kur vdiqe unë të erdha

Vetë të lshova në t´ftoftin varr.

 

Atë fustan në ditë t´varrimit

Kur ta putha ma ngriu gjakun,

Si nuk pata fat moj bijë

Me ta puth edhe duvakun.

 

T´lëshuam n´vorr, mu rrutllue bota

Dashta të gjuhem e të vi me Ty,

Qanin motrat dhe vllaznia

Nanës loti n´farqe ju ngri..

 

Shokë e shoqe aty ishin

Nga një lule n´varr e lanë,

Lamtumirë moj Shqipe e shqipes

Me sa dhimbje Ty të thane.

 

Tu përkul dhe djali i vetëm

Lotët peng ti la mbi vorr,

Ka me ardhë me të sjell lule

Me nanë t´veten ai me folë.

 

Edhe burri që shumë të dashti

Një jetë bashkë me dashuni,

Nuk e di sa do të shkoj

Me kujtime e vaj për Ty.

 

III

Lokja jote atje n´Kosovë

Qau e qau, ma skishte lotë,

Foton tande e futi n´gji

Me t´mbajtë ngrohtë për jetë e mot.

 

Ah e shkreta sta di vorrin

Se ti vorr nuk ke në atdhe,

Koka shkrue n´tokë të Suedisë

Trupi yt me tu ba dhe.

 

Ta këndoj moj bijë Ty kangen

T´u  vajtu me gjithë sharki,

Shtatqind jetna me i pas me rrnue

Me lotë lulet i ujis për Ty.

 

23.08.2014

Düren

____________

Agim Gashi - Vargje të përlotura

/ Bijës sime, Shqipe Gashi /

 

Emer të shenjtë të pata dhënë

E shqip derdha edhe lotet për Ty

Kur ike për ta takuar perëndinë...

Bija ime Shqipja ime Dielli im

 

Më janë shuar rrezet e zemrës

Jetës i humbën të gjitha ngjyrat

E dhembja mi dogji damarët e shpirtit

Po keq e le babin Oi Oi Oiiiiiiii

 

15.08.2014-Lipjan

_____________

AGIM GASHI

TEK VARRI YT, BIJA IME

(Bijës sime Shqipes)

 

Ty, bija ime Shqipe

T'u përkula te varri yt

Me zemrën e bërë copë-copë

Pasi të varrosëm në tokën e huaj

Shqip të foli babai ty

E si me të folë ndryshe

Kur emrin dhe zemrën shqipe e kishe.

 

Djali dhe burri me zemrën e bardhë

Të veshën me fustanin kuq e zi

Motrat ta bënë grimin

Nëna të lau me lotin e saj

Vëllëzërit t'i ujitën lulet mbi varrin tënd

Babai shqip të përcolli në amshim.

 

Oh, zemra e babit

Oh mish i mishit tim

Sa qenka dhimbje e trishtim

Me të përcjellë në amshim

Në këtë vdekje të pa rend

Në tokën e huaj me të shti në dhe

Qoftë i mallkuar mërgimi i zi

A thua qan diksuh për ne

Mërgimtar, o njeri pa atdhe.

 

Zgjohu, bija ime e dashur, zgjohu

Shiqoje jetën edhe njëherë me sy

Sa vujanë prindërit për ty

Burri e djali lotojnë

Jeta vazhdon edhe pa ty

Dikush martohet e dikush fejohet

Dikush qan e dikush qesh

Por ti më nuk je, moj bijë,

Të mbuloi dheu i zi.

 

Ditën që vdiqe, moj bija ime,

Edhe fluturat lotuan për ty

Ishe engjëll e shkuar engjëjve

E veçanta e botës njerëzore

Sa ndihmove njerëzit në nevojë

Të varfërve kafshatën ua dhurove

Andaj Zoti të mori pranë vetes

Fluturat e lulet do t'i kesh përmbi.

 

Fli e qetë, Shqipja ime,

Me fustan të nusërisë kuq e zi

Varri çerdhe mërgimi t'u bë

Atje larg në polin e veriut mbi re

Do ta puthësh të shtrenjtin atdhe

E ne sa do që do të jetojmë

Kurrë, kurrë s 'të harrojmë.

 

14.08.2014-Lipjan

________________

Agim Gashi

SHQIPE, PSE IKE?

 

Sot, datë 02.08.2014, pikrisht në ora gjashtë, bija ime Shqipe Gashi-Hoxha mori rrugën drejt qiellit për tu takuar me Parajsën e premtuar.

Sa e vështirë, sa e rëndë kjo vdekja e mërgimit.

Nuk e mendova se unë do të të them lamtumirë Ty oj Engjull i babit.

Vdekje pa rend, por ja që Zoti i merr Engjujt pranë vetes së Tij.

As në mendje smë ka shkue që varri yt të mbulohet me lule atje në token e ftoftë të Suedisë.

Vendimi ishte i yti.Nuk dashte të largohesh nga djali e burri që të dashten aq shumë.

Dashte të pushosh pranë tyre, të zgjohesh naten e tua ledhatosh ballin me plot dashuri, ashtu si dite vetëm ti.

Po të them lamtumire pasi u binda se dëshirën e Zotit smundem me e ndal.

Lamtumirë bija ime Shqipe!

Babi yt Agimi me dhimbje që sdo të shuhen derisa të takohemi përsëri.

____________

Agim GASHI

TI U SHOVE YLLI IM

Bijës sime, Shqipes, qe sot kaloi në amshim

(24.09.1971-02.08.2014)

 

Ia beh gushti i përlotur

Ia beh gushti i ngulfatur,

Midis shiu midis vapës

Ku ta lë shpirtin e trandur.

 

Shpirti im i katandisur

Për pak gaz e dashuri,

Si rrufeja gjëmë krisur

Mori lajm të zi për ty.

 

Ti u shove ylli im

Bashkë me yjet në mëngjes,

Ma lë dhembjen trashëgim

Që çan zemrën mes për mes.

 

Unë kam pasur qindra ndarje

Që m'përlotën këta sy,

Jo këso me lot e zjarr

Sikur ndarja sot me ty.

 

Ti u shove ylli im

N'zemrën time i pashuar,

Sytë e tu i kam kujtim

Dashuri dritë praruar!

 

02.08.14

Düren

____________

Maki Maqedonci Canolli:PSE PO QANË RAPSODI?

 

Pse i ndali sot sharkia këngë dhe valle?

Rapsodin e kaploi dhimbje e madhe!

Një lule u këput në kopshtin e tij

dhe do ta mbulojë dheu i zi.

 

Pse po qan rapsodi sot me shumë mallë?

Një dhimbje e madhe shpirtin ja ka vrarë,

shqiponja e tij diku në mërgim

ndërroi destinacionin u nis për amshim.

 

Dhimbja kaloi fusha,male,dete, e oqeane

na kaploi të gjithë ne shqiptarëve,

e dëgjoi këtë dhimbje edhe toka arbërore

sa shumë u godit një zemër prindërore.

 

Pse ti moj Shqipe u nise për amshim?

Me dhimbje në zemër e le babin Agim!

Ja ndale këngë e valle telave të sharkisë

e shpirtin e tij e mbuloi petku i zisë.

 

Pusho ti e qetë Shqiponja e atdheut tim

i lehtë ty të qoftë dheu i tokës në mërgim,

Shpirti yt u prehtë në paqe në atë botë

rapsodit tonë Zoti dhimbjen ja lehtësoftë!

 

Qoftë i përjetshëm kujtimi i saj!

Në shenjë respekti dhe me dhimbje në zemër për ndarjen e parakohshme nga kjo jetë të bijës së rapsodit tonë Agim Gashi - Shqipe Gashit!

 

©Makfire M Canolli

New York

___________

Anesti T Koxhaj: RAPSODI NË DHIMBJE

4. August 2014

 

Dridhshëm lëshoi tingullin lahuta e birit të Dardanisë

Shkëputet nga zemra e tij një copëz shpirt-drejt qiellit

Bija e tij ,vesh krahët e ëngjëllit,shkon drejt yjësisë

I lë babait në shpirt vetëm dhimbjen dhe rrezet e diellit

 

***

Mos u ligështo o lahutar,i vetë bjeshkëve kosovare...

Bashko dhimbjen tënde ,me durimin e vetë maleve !

Një ditë vetë Shqipja do hapi me krah-ëngjëlli dritare

Dhe do fluturojë ëmbël mbi tinguj lahute si ujvare...

 

Greqi 5 gusht 2014

 

Të nderuar miq e mikesha nuk kisha ndermënd të publikoj më poezi të mijat.Një fatkeqësi e ndodhur tek miku im dhe juaji mbase Tek AGIM GASHI që më datën 2 gusht iu nda nga jeta vajza e tij SHQIPE GASHI në modhë shumë të re...I shkoftë shpirti në parajsë kësaj vajze...të rapsodit dhe poetit të nderuar Agim Gashi.

__________

FALENDERIM PUBLIK PËR TË GJITHË ATA QË NA NGUSHLLUAN DHE PO NA NGUSHLLOJNE

Të dashur familjarë, miqë, dashamirë e njerz tjerë nga e mbarë bota!

Ju që na u gjendet afër me ngushllimet e juaja përmes FB, telefonatave, letrave dhe vizitave të drejtëpërdjejta dhe vazhdoni të na ngushlloni në vazhdimësi të na vizitoni në këto çaste të dhimbjeve tona të pashuara për Shqipen time e cila mori rrugën e qiellit, Ju falenderoj nga zemra.

Qofshi të bekur nga Zoti e qofshit gjithmonë të nderuar ashtu si më keni nderuar Ju duke e ndarë dhimbjen me mua dhe me familjen time.

Me respekt Agim Gashi Kosovë-Gjermani!