Sevdail Hyseni: Plani 7 pikësh

Sevdail Hyseni

Satirike

Plani 7 pikësh

Si sot më kujtohet

Para dymbëdhjetë vjet,

Na lindi një Plan

Me shtatë pika krejt.

Të cilat në pamje

S’dukeshin shumë,

Mirëpo luginasve

U hynin në punë.

Mblidhet lidershipi

Si grusht i pandarë,

Për ta çuar në vend

Me këmbën e mbarë.

Por, nga ajo ditë

Me vite, me muaj,

Për 7 pikat thuhet:

- Ka pi macja ujë!

Ndaj nisin bisedat

N’shesh të Kalemegdanit,

Përballen trimoshat

Në fushë të mejdanit.

Plani është në rregull,

Thonë të Beogradit:

- Do ta marrim shtruar

Në fund të mandatit.

Si rrota e ndryshkur

Sillen në trotuar,

Pluhuri i harresës

I zverdh në sirtar.

E menduan planin

Me pikat shtatë,

Që njihen në botë

Si numrat me fat.

7 ditë i ka java,

7 nota muzikore,

7 ngjyra ylberi,

7 mrekulli botërore.

7 kate i ka qielli,

7 thupra fuqia,

7 liqenet e Lurës,

7 keca mama dhia.

7 xhuxhët në përralla,

7 fishekë martina,

7 vrima koka,

7 parti Lugina.

7 male, kontinente,

7 pozita politike,

7 paga, honorare,

7 dashnore simpatike.

Nëse nuk bëhet

“Plani” me taktikë,

Do t’i shkoj si dhelpra...

Dashit në Selanik!

(Karikatura marrë nga interneti)