Blerim Latifi: Vushtrria, 1671 dhe 2026 - Historia që po përsëritet

Viti 1671. Dioqezën e Shkupit e viziton Shtjefën Gaspri. Ai ka për detyrë të hartojë një relacion për Romën mbi gjendjen e katolikëve në këtë dioqezë, e cila përfshinte territoret që sot janë Kosova dhe Shkupi me rrethinë.

Në Prishtinë, ai mëson se katolikët e mbajnë meshën në fshehtësi të plotë, në shtëpi private, duke vendosur një roje jashtë për të lajmëruar në rast se shfaqen turqit.

Në Vushtrri gjen të njëjtën gjendje. Katolikët atje luten fshehtas në një shtëpi private. Për kishë as që bëhet fjalë. Ndërkohë, kambanat e kishave ortodokse dëgjohen fort nga Graçanica në Pejë.

Kanë kaluar shekuj nga ajo kohë e errët. Perandoria Osmane ka 114 vjet që ka vdekur. Edhe sundimi gati njëshekullor serb ka përfunduar. Kosova thuhet se është shtet i lirë, demokratik dhe proevropian, por ja që në Vushtrri, atyre pak katolikëve të deklaruar u ndalohet të kenë një kishë të tyre në një katund të saj, ashtu siç u ishte ndaluar në vitin e largët 1671.

Kushtetuta e Republikës së Kosovës e garanton lirinë e besimit, e kjo liri, mes tjerash, nënkupton edhe të drejtën për të pasur tempuj fetarë. Kjo e drejtë garantohet edhe në situatat kur ekziston edhe një individ i vetëm i një feje të caktuar.

Por nejse, çfarë po flas edhe unë. Po i referohem Kushtetutës së Kosovës, e cila, nga dita në ditë, po kthehet në një copë letre të pavlerë, në sirtarët e një shteti të cilin askush nuk e merr më seriozisht, përfshirë edhe ata që dje ndihmuan me armë e diplomaci në krijimin e tij.

_________

Shihe magarin me çka merret: gjithqysh me gjetë diku diçka që t’i bindë shqiptarët me fillu me u martu brenda lidhjes familjare.

Një ditë, krejt ky imoralitet e primitivizëm ka me kalu, ashtu siç zgjohemi prej një ëndrre të keqe, dhe kemi me u ndi të turpnum për faktin që e lejuam me ndodhë mes nesh.

_________

Afganistani ka rreth 43 milionë banorë. Sipas informacioneve të WFP-së, rreth 14 milionë afganë përballen me uri akute. Vdekjet nga kequshqyerja dhe mungesa e shërbimeve shëndetësore janë bërë përditshmëri. Një komb i tërë i dënuar në uri dhe sëmundje.

Kështu, talibanët tani po kërkojnë që SHBA-ja të rikthehet, të rivendosë marrëdhëniet diplomatike dhe të hyjë me investime ekonomike në Afganistan.

Sepse ekonomia nuk mbahet me dokrra ideologjike e religjioze. Por mençuria është që kjo e vërtetë e thjeshtë të kuptohet para se të ndodhë katastrofa, sepse pas katastrofës ajo nuk ka më asnjë vlerë.