Blerim Latifi: Sulmi rus dhe gardhi i Maliq Pashës rreth Prishtinës

Sulmi rus dhe gardhi i Maliq Pashës rreth Prishtinës

Në vitin 1807, konsulli francez në Janinë, François Pouqueville, gjatë një udhëtimi nëpër Kosovë, kaloi edhe në qendrën kryesore të saj, Prishtinë. Atje ai pa diçka të çuditshme. Sundimtari i qytetit kishte urdhëruar hapjen e një hendeku të madh rreth tij dhe ngritjen e një gardhi po ashtu të madh me ferra.

Ky sundimtar ishte Maliq Pashë Gjinolli. Atij i kishte shkrepur në kokë se së shpejti Rusia do të sulmonte Prishtinën dhe ai duhej të merrte masa.

Kur ata që po punonin në hendek i thanë me mburrje Pouqueville-it se tani qyteti ishte i sigurt, ai ua bëri qejfin, për të mos ua prishur iluzionin e atij improvizimi qesharak.

Por a ishte real rreziku i një sulmi rus në Prishtinë në vitin 1807?

Natyrisht që jo. Në atë kohë Rusia ndodhej në telashe të mëdha përballë përplasjes me Francën napoleoniane në Evropë dhe askujt në Rusi nuk i shkonte ndërmend një sulm në Ballkan, aq më pak në një katund të humbur thellë brenda tij. Por edhe po të donte, Rusia e asaj kohe nuk kishte fare mundësi ushtarake për një gjë të tillë.

Frika e Maliq Pashës ishte thjesht frika e një njeriu injorant dhe analfabet, që thashethemet i merrte për të vërteta dhe nuk ia kishte fare haberin e asaj që po ndodhte në Evropë në atë kohë.

Dhe merreni me mend: ky vend për shekuj është sunduar nga pashallarë të tillë injorantë, analfabetë e budallenj, të cilët mendonin se çifliku i tyre i mjerë kishte rëndësi botërore.