Spica Metalike: Zogu i verës

Spica Metalike

Satirike

Zogu i verës

Mërgimtari zog shtegtar,

vjen n’vendlindje fluturim;

sjell me vete plot dhurata,

mbush shtëpinë me gëzim.

Sapo mbërrin në oborr,

i dalin para varg e vijë:

nëna, baba, halla, daja...

e përqafojnë me dashuri.

Por edhe gëzimi ka kufi,

si vizitat me orar;

nuk mjafton veç dashuria

për një jetë mërgimtar.

Çdo mbrëmje thotë,

me zë e solemnitet:

-Vitin tjetër kthehem,

vendlindjen e kam amanet!

Kur vera bashkë me gushtin

i afrohet përfundimit,

valixhet presin te dera,

me biletën e kthimit.

Si dallëndyshja ai

e do folenë me dashuri;

por vetëm verës e viziton,

dimrin s’e kalon aty.

Sapo vjen shtatori

me erën e parë,

fluturon përsëri,

si zogu shtegtar.

E ka vendlindjen

dashuri të pashtershme,

por në kurbet,

adresën e përhershme.

(Karikatura marrë nga interneti)