Xhelal Zejneli: Robert Elsie – njeriu që ia solli botës Shqipërinë

ROBERT ELSIE

ALBANOLOGU TË CILIN NUK DUHET HARRUAR

NJERIU QË IA SOLLI BOTËS SHQIPËRINË

Një akademi që ecte, një nga njerëzit që punoi i vetëm aq sa institute nuk mundën dot, e la në mes e të pakryer kështjellën letrare të tij ku strehonte kulturën shqiptare.

“Ne lindëm shqiptarë, ty të bëri pasioni të tillë!”  Kumbaro

Nga Prof. Xhelal Zejneli

Robert Elsie (Vancouver, Kanada, 29.06.1950 – Berlin, 02.10.2017). Studioi filologjinë klasike dhe gjuhësinë në Universitetin e Kolumbisë Britanike (University of British Columbia). Diplomoi në vitin 1972. Po atë vit erdhi në Evropë me një bursë studimesh. I vazhdoi studimet e larta në Universitetin e Lirë të Berlinit Perëndimor (Freie Universität Berlin), pastaj në Shkollën Praktike të Studimeve të Larta (Ecole Pratique des Hautes Etudes) në Paris, në Institutin e Dublinit për Studime të Larta (Dublin Institute for Advanced Studies) në Irlandë dhe në Universitetin e Bonit (Universität Bonn) ku në vitin 1978 mbrojti doktoratën për gjuhësi krahasimtare dhe keltologji. Në atë kohë Instituti i Gjuhësisë i Universitetit të Bonit, me studiues nga Shqipëria komuniste kishte kontakte të rralla. Nëpërmjet këtyre kontakteve, Elsie, disa studentë dhe studiues të tjerë, në kuadër të takimeve shkencore midis Institutit Gjerman dhe Akademisë së Shkencave të Shqipërisë, patën mundësi të vizitonin Shqipërinë disa herë.

Disa vjet me radhë ka marrë pjesë në Seminarin Ndërkombëtar për Gjuhën, Letërsinë dhe Kulturën Shqiptare të mbajtur në Prishtinë. Në fund të viteve ’70 dhe në fillim të viteve ’80 të qindvjeçarit XX, këto udhëtime i gjallën një interesim të veçantë për Shqipërinë e mbyllur dhe për kulturën e saj jo mjaft të njohur në botë. Pasi e mësoi shqipen, iu  kushtua albanologjisë. Më vonë, ai do të bëhej një ndër ekspertët më të njohur të kësaj fushe.

Është autor i mbi gjashtëdhjetë librave dhe i artikujve të panumërt, kryesisht në fushën e albanologjisë. Në mes të viteve ’80 të qindvjeçarit XX, punoi si përkthyes për Ministrinë e Punëve të Jashtme të Gjermanisë në Bon. Prej viteve 1990... e deri ne fillim të shekullit XXI  ka punuar si përkthyes  i shqipes. Ka marrë pjesë në bisedime të nivelit të lartë për qeverinë gjermane, për BE-në, për Kombet e Bashkuara, për NATO-n, për Këshillin e Evropës, etj. Prej  vitit 2002 ka punuar për Tribunalin e Hagës. Ka qenë përkthyes simultan në procesin gjyqësor ndaj Slobodan Milosheviqit.

Është anëtar i Shoqatës së Evropës Juglindore (Südosteuropa-Gesellschaft), anëtar i jashtëm i Akademisë së Shkencave dhe të Arteve të Kosovës dhe anëtar nderi i Shoqatës së Shkrimtarëve të Kosovës.

*   *   *

Elsie vdiq në Berlin më 2 tetor 2017 nga sëmundja e neuroneve motorike. Kur vdiq Elsie, u tha në mediume se kishte kërkuar në testamentin e tij të varrosej në Shqipëri. Pas dy jave doli se Elsie nuk kishte shkruar në testamentin e vet se ku do të varrosej. Ka qenë vendim i partnerit të tij të jetës, Stefan Trirueller (Stephan Trierweller) që ai të varroset në Shqipëri për shkak të dashurisë që për tokën arbërore.

Arkivoli i Elsies u soll në Shqipëri dhe u vendos në Bibliotekën Kombëtare në Tiranë ku njerëzit do ta shprehnin respektin e tyre. Ceremonia e lamtumirës për nder të tij u mbajt në Tiranë. Morën pjesë miq, akademikë dhe politikanë nga Shqipëria, Kosova dhe Maqedonia e Veriut.

Gjatë jetës së tij, Elsie manifestoi dashuri për Thethin, duke e parë atë si një "Shangri-La"* shqiptare. Më 18 tetor u varros në atë fshat verior të qarkut të Shkodrës që ndodhet në alpet shqiptare.

Shënim: Shangri-La është bërë sinonim i çdo parajse tokësore, veçanërisht i një utopie mitike për Himalajën - një tokë përjetësisht e lumtur dhe e izoluar nga bota.

*   *   *

Dekorimet: Medalja e mirënjohjes, dekoruar më 15 maj 2013 nga Presidenti i Shqipërisë Bujar Nishani (Durrës, 1966 – Berlin, 2022). Në vitin 2017 Nishani ka qenë në Qabe (Mekë). Është i pari politikan shqiptar që e viziton këtë vend.

Robert Elsie u nderua për kontributin e tij si studiues për më shumë se 35 vjet, duke   promovuar në arenën ndërkombëtare kulturën, gjuhën, letërsinë dhe historinë e shqiptarëve, bashkë me imazhin pozitiv të Shqipërisë në botë. Duke shprehur mirënjohjen e tij, Presidenti Nishani e quajti Elsien "një shqiptar i mirë".

Robert Elsie është dekoruar edhe me “Medaljen e Artë të Lidhjes së Prizrenit”.

*   *   *

VEPRAT - Në albanologji, Elsie ka kontribuar me 150 libra dhe artikuj shkencorë. Elsie botoi rreth 60 libra në anglisht, në shqip dhe në gjermanisht. Botime të hershme të tij janë: “Fjalor i letërsisë shqiptare” (Dictionary of Albanian Literature),Westport, Konektikat 1986 dhe “Histori e letërsisë shqiptare” (History of Albanian Literature), Boulder, Colorado 1995, në dy vëllime.

Kjo vepër e fundit doli në shqip me titullin “Histori e letërsisë shqiptare”, fq. 686; shtypur në NBGL Dukagjini, Pejë, 1997; përkthyer prej anglishtes nga Abdurrahim Myftiu    (Peqin, 1934 - ), i internuar për motive politike, prej datës 31.12.1968 deri më 01.01.1982.

*   *   *

Libri i sipërthënë doli edhe në polonisht me titullin “Pasqyrë e historisë së letërsisë shqiptare” (Zarys historii literatury albanskiej), Torunj 2004.

Ka botuar edhe përkthime letrare në anglisht dhe gjermanisht, siç janë në vëllimin e UNESCO-s “An Elusive Eagle Soars: Anthology of Modern Albanian Poetry” (Një shqiponje e arratisur fluturon: antologji e poezisë bashkëkohore shqiptare), Londër 1993; “Albanian Folktales and Legends” (Përralla dhe legjenda shqiptare), Tiranë 1994.

Pasojnë veprat letrare të Migjenit (1911-1938) përkthyer në anglisht në vëllimin “Free Verse” (Vargjet e lira), Tiranë 1991 dhe në gjermanisht në vëllimin “Freie Verse” (Vargjet e lira), Idshtajn (Idstein) 1987.

Pason antologjia në gjermanisht e poezisë shqiptare “Einem Adler gleich: Anthologie albanischer Lyrik vom 16. Jahrhundert bis zur Gegenwart” (Si një shqiponjë: antologji e poezisë shqiptare nga shekulli 16 deri me sot), Hildesheim 1988.

Pasojnë veprat e poetëve kosovarë Ali Podrimja (Gjakovë, 1942 – Lodève, Francë, 2012) në “Who Will Slay the Wolf: Selected Poetry” (Kush do të vrasë ujkun: poezi të zgjedhur), Nju-Jork 2000; Flora Brovina (1949- ) në vëllimin “Call Me by My Name: Poetry from Kosova” (Verma emrin tim: poezi nga Kosova), Nju-Jork 2001; dhe Eqrem Basha (1948- ) në vëllimin “Neither a Wound nor a Song: Poetry from Kosova” (S’është plagë s’është as këngë: poezi nga Kosova), Nju-Jork 2003.

Këto përkthime Elsie i ka bërë në bashkëpunim me poeten, përkthyesen dhe kritiken letrare kanadeze Janis Mati-Hek (Janice Mathie-Heck; Jasper, Alberta, 1950- ).

Kritika e tij e letërsisë shqiptare u botua në vëllimin “Studies in Modern Albanian Literature and Culture” (Studime për letërsinë dhe kulturën bashkëkohore shqiptare), Boulder, Colorado 1996. Vëllim doli në shqip me titullin “Një fund dhe një fillim”, Tiranë & Prishtinë 1995.

Duke marrë parasysh gjendjen e rëndë në Kosovë, kryesisht të panjohur në botën e jashtme, Elsie përpiloi antologjinë e parë të madhe me shkrime lidhur me temën e Kosovës në vëllimin 600-faqesh “Kosovo: In the Heart of the Powder Keg” (Kosovë: në qendrën e fuçisë së barutit), Boulder, Colorado 1997.

Pas kësaj botoi edhe një përmbledhje tekstesh historike për Kosovën me titullin “Gathering Clouds: The Roots of Ethnic Cleansing in Kosovoand Macedonia, Early Twentieth-Century Documents” (Stuhi në horizont: Rrënjët e spastrimit etnik në Kosovë dhe Maqedoni, dokumente të fillimit të shekullit njëzet), Pejë 2002.

Më vonë Elsie u përqendrua më shumë në lëmenjtë e tjerë të albanologjisë, si kultura popullore dhe historia. Ndihmesë e madhe për antropologjinë shqiptare ishte vepra e tij “Dictionary of Albanian Religion, Mythology and Folk Culture” (Fjalor i fesë, i mitologjisë dhe i kulturës popullore shqiptare), Londër 2001. Vepra doli në gjermanisht në vëllimin “Handbuch zur albanischen Volkskultur” (Doracak i kulturës popullore shqiptare),  Wiesbaden 2002 dhe në shqip, në vëllimin “Leksiku i kulturës popullore shqiptare”, Tiranë 2005.

E botoi në gjermanisht Kanunin, “Der Kanun: das albanische Gewohnheitsrecht nach dem sogenannten Kanun des Lekë Dukagjini” (Kanuni: E drejta zakonore shqiptare sipas të ashtuquajturit Kanuni i Lekë Dukagjinit), Pejë 2001.

Në bashkëpunim me antropologjisten Antonia Jung (Antonia Young; 1955- ), Universiteti i Bredfordit (University of Bradford) dhe me fotografen norvegjeze Ann Christine Eek (1948- ) botoi studimin antropologjik të fshatit kosovar nga antropologia norvegjeze Berit Beker (Berit Backer, 1947-1993), “Behind Stone Walls: Changing Household Organization among the Albanians of Kosova” (Prapa mureve të gurta: ndryshime në organizimin familjar ndër shqiptarët e Kosovës), Pejë 2003.

Pas kësaj, botoi dorëshkrimin e hershëm në gjermanisht të shqiptarit Bajazid Elmaz Doda* (rreth 1888-1933), “Albanisches Bauernleben im oberen Rekatal bei Dibra, Makedonien” (Jeta fshatare shqiptare në Rekën e Epërme pranë Dibrës së Maqedonisë), Vjenë 2007.

Shënim: Bajazid Elmaz Doda (Shtirovica, 1888 – Vjenë, 25.04.1933) - shkrimtar dhe fotograf etnografik shqiptar, autor i librit historik-kulturor “Albanisches Bauerleben im oberen Rekatal bei Dibra” (Jeta e fshatarëve shqiptarë në grykën e Rekës së Epërme, Dibra e Madhe; Maqedoni); Vjenë 1914.

*   *   *

Në fushën e historisë me të cilën është marrë më shumë gjatë dhjetëvjeçarit të parë të shekullit njëzet, në bashkëpunim me Robert Dankoff (1943- )*, Elsie ka botuar dhe ka përkthyer nga osmanishtja pjesë të veprës “Sejahatname“ (Udhëpërshkrim) të udhëtarit osman Evlija Çelebi (1611-1683) që flasin për trevat shqiptare: “Evliya Çelebi in Albania and Adjacent Regions” (Evlija Çelebi në Shqipëri dhe në viset fqinje), Leiden 2000. Kjo vepër doli në shqip në vëllimin “Evlija Çelebiu në Shqipëri dhe në viset fqinje”, Tiranë 2008.

Shënim: Robert Dankoff (Rochester, Nju-Jork, 1943- ) profesor Emeritus i Studimeve Osmane dhe Turke, Departamenti i gjuhëve dhe i qytetërimeve të Lindjes së Afërt në Universitetin e Çikagos.

*   *   *

Përveç kësaj, ai e zbuloi dhe e botoi dorëshkrimin e historisë së parë të Shqipërisë, të shkruar prej priftit llazarist francez, Zhan-Klod Faverial (Jean-Claude Faveyrial, 1817-1893), “Histoire de l’Albanie” (Historia e Shqipërisë), Pejë 2001 që doli në shqip në vëllimin Më e vjetra “Histori  e Shqipërisë”, Tiranë 2004.

Elsie e zbuloi dhe botoi dorëshkrimin në gjermanisht të albanologut hungarez, baronit Franc Nopça (Franz Nopcsa, 1877-1933) në “Reisen in den Balkan” (Udhëtime në Ballkan), Pejë 2001, që doli në shqip në vëllimin “Udhëtime nëpër Ballkan”, Tiranë 2007.

*   *   *

- Robert Elsie (2016). “Përkthime të hershme të Biblës në shqip në shkrimin Todhri”. Platforma e botimeve të pavarura Create Space.

- Robert Elsie dhe Bejtullah D. Destani, red. (2018). “Kosova, Një histori dokumentare: Nga luftërat ballkanike deri në luftën e dytë botërore”. I. B. Tauris.

- Robert Elsie (2019). “Bektashinjtë shqiptarë: Historia dhe kultura e një urdhri dervish në Ballkan”. Bloomsbury Publishing.

Në bashkëpunim me studiuesin shqiptaro-britanik Bejtullah D. Destani (Prizren, 1960- ), Londër, Elsie botoi ditarin e poetit dhe të piktorit anglez Eduard Lir (Edward Lear, 1812-1888), në vëllimin “Edward Lear in Albania: Journals of a Landscape Painter in the Balkans” (Eduard Lir në Shqipëri, ditari i një piktori të peizazheve), Londër 2008, që doli shqip në vëllimin “Eduard Lir në Shqipëri: ditar udhëtimesh, 1848-1849”, Tiranë 2008.

U botua një përmbledhje tekstesh të hershme historike për Shqipërinë, të përkthyera nga gjuhë të ndryshme, “Early Albania: A Reader of Historical Texts, 11th-17th Centuries” (Shqipëria e hershme: antologji tekstesh historike, shekujt XI - XVII), Wiesbaden 2003.

Duke qenë se Shqipëria dhe Kosova vazhdonin të ishin relativisht të panjohura nga  lexuesit perëndimorë, për këto vende Elsie botoi dy manualë informativë: “Historical Dictionary of Albania” (Fjalor historik i Shqipërisë), Lanham, Maryland 2004; dhe “Historical Dictionary of Kosova” (Fjalor historik i Kosovës), Lanham, Maryland, 2004. Këto vepra, përkundër titullit ‘historik’, janë libra të përgjithshëm informativë.

Sërish në fushën e letërsisë, Elsie botoi një vëllim të ri të historisë së letërsisë, më të përmbledhur dhe më të shkurtër, në vëllimin “Albanian Literature: A Short History”, Londër 2005, që doli në shqip në vëllimin “Letërsia shqipe: një histori e shkurtër”, Tiranë 2006.

Ka bërë edhe përkthime të tjera letrare, përsëri me Janis Mati-Hek (Janice Mathie-Heck), vepra të zgjedhura të këngëve epike të veriut, në vëllimin “Songs of the Frontier Warriors”: (Këngë Kreshnikësh), “Albanian Epic Verse” (Këngë kreshnikësh, poezia epike shqiptare),  Wauconda, Illinois 2004;

- tregime të shkrimtarëve të veriut, Ernest Koliqi (1903-1975) dhe Migjeni (1911-1938), në vëllimin “Tales from Old Shkodra: Early Albanian Short Stories” (Rrëfime nga Shkodra e vjetër: tregime të hershme shqiptare), Pejë 2004;

- vepra poetike të Visar Zhitit (1952- ) në “The Condemned Apple” (Molla e dënimit), Los Anxhelos 2005;

- antologjinë e parë në anglisht të prozës bashkëkohore shqiptare në vëllimin “Balkan Beauty, Balkan Blood: Modern Albanian Short Stories” (Bukuria e Ballkanit, gjaku i Ballkanit: tregime bashkëkohore shqiptare), Evanston, Illinois 2006;

- romanin e Fatos Kongolit (1944- ) “The Loser” (I Humburi),  Bridgend, Uells 2007;

-  veprat poetike të Azem Shkrelit (1938-1997) në vëllimin “Blood of the Quill: Selected Poetry from Kosovo” (Gjaku i penës: poezi të zgjedhur nga Kosova), Los Anxhelos 2008;

- një antologji të plotë historike të poezisë shqipe “Lightning from the Depths: An Anthology of Albanian Poetry” (Se fund’i ujit vetëti: antologji e poezisë shqipe), Evanston, Illinois 2008;

- romanin e Ornela Vorpsit (1968- ) “The Country Where No One Ever Dies” (Vendi ku nuk vdes askush), Champaign, Illinois 2009; dhe

- përkthime të mëtejshme të poezisë gojore në librin “The Battle of Kosovo, 1389, An Albanian Epic” (Beteja e Kosovës, 1389, një epos shqiptar), Londër 2009, të sociologes, gazetares dhe ish-konsulentes së Kombeve të Bashkuara, të lindur në L’Aquila të Italisë Anna Di Lellio-s;

Shënim: Sipas historianit dhe diplomatit serb Dushan Batakoviq (Dušan Batakovi?, 1957- ), “Di Lellio në shkrimet e saj mban qëndrim pro-shqiptar”. Anna Di Lellio ka shkruar për një sërë temash që lidhen me praninë e Kombeve të Bashkuara në Kosovë dhe në Irak. Është redaktore e librit ”Kauza e Kosovës: Rruga drejt pavarësisë” (The Case for Kosova: Passage to Independence, 2000), një antologji esesh mbi të ardhmen e Kosovës.

*   *   *

Puna më ambicioze letrare e Elsies është përkthimi në anglisht, në bashkëpunim me Janis Mati-Hek (Janice Mathie-Heck), nga gegërishtja, i eposit letrar të Gjergj Fishtës (1871-1940), “The Highland Lute: The Albanian National Epic” (Lahuta e Malcis: eposi kombëtar shqiptar), Londër 2005, vepër kjo me 30 këngë dhe 15,613 vargje. Rishfaqja në publik e këtij eposi, të ndaluar me vite nga regjimi komunist në Shqipëri, u prit me gëzim, sidomos në veriun e vendit.

*   *   *

Në lëmin e fotografisë së hershme shqiptare Elsie ka botuar dy albume të mëdha: “Dritëshkronja: Fotografia e hershme nga Shqipëria dhe Ballkani”, Prishtinë 2007, që i përfshin fotografitë e para të bëra ne Shqipëri. Janë 50 fotografi të fotografit vjenez Dr. Jozef Sékeli (Josef Székely, 1838-1901) prej vitit 1863 dhe koleksionet e albanologut hungarez, baronit Franc Nopça (Deva, Rumani, 1877 – Vjenë, 1933), të Bajazid Elmaz Dodës (1888-1933), të albanologut austriak Maksimilian Lamberc (Maximilian Lambertz,1882-1963) dhe të ushtarakëve të misionit ushtarak holandez të viteve 1913-1914.

Shënim: Përkthimi i “Lahutës së Malcís” të At Gjergj Fishtës në gjermanisht u realizua nga albanologu austriak Maksimilian Lamberci (Maximilian Lambertz). Përkthimi u krye në vitin 1958. Lamberci e quajti Fishtën poet gjenial, kurse kryeveprën epike të tij e konsideronte monument të vërtetë të letërsisë

*   *   *

Ka botuar gjithashtu, në një vëllim trigjuhësh – anglisht, frëngjisht, shqip - fotografitë e para me ngjyra në Shqipëri dhe Kosovë të bankarit dhe bamirësit francez Alber Kan (Albert Kahn, 1860-1940) në Paris, me titullin “Shqipëria dhe Kosova në ngjyra 1913”, Tiranë 2010.

Së fundi janë botuar për herën e dytë, të përditësuar dhe dukshëm të zmadhuar: “Historical Dictionary of Albania” (Fjalor historik i Shqipërisë), Lanham, Maryland 2010, me 660 faqe; dhe “Historical Dictionary of Kosovo” (Fjalor historik i Kosovës), Lanham, Maryland 2010, me 451 faqe.

Këta dy libra janë përkthyer edhe shqip. Puna studimore e Elsies ka qenë e përqendruar kryesisht në albanologji, ai ka botuar edhe vepra të tjera: “Dialect Relationships in Goidelic: A Study in Celtic Dialectology” (Marrëdhëniet dialektore në goidelishten: një hulumtim në dialektologjinë keltike), Hamburg 1986; antologjitë poetike “The Pied Poets: Contemporary Verse of the Transylvanian and Danube Germans of Romania” (Poetë të shumëngjyrshëm: poezia bashkëkohore të gjermanëve të Transilvanisë dhe të Danubit në Rumani), Londër 1990; dhe “An Anthology of Sorbian Poetry from the 16th-20th Centuries” (Antologjia e poezisë serbe në shekujt XVI - XX), Londër 1990, si dhe një përkthim në gjermanisht të poetit të njohur grek Konstantin Kavafis (1863-1933) në vëllimin “Konstantinos Kavafis: Das Gesamtwerk, griechisch und deutsch” (Konstantin Kavafis: Veprat e plota, greqisht dhe gjermanisht), Cyrih 1997.

Pas viteve 1990, me faqet e tij në internet, Elsie jep të dhëna të hollësishme për shqiptarët. Veprat që s’i botoi në të gjallë, do të botoheshin post mortem.

*   *   *

Studiues të huaj të njohur të gjuhës, të historisë dhe të kulturës shqiptare kanë qenë:  albanologu gjerman Johan Georg fon Han (Johann Georg von Hahn, 1811-1869);  albanologu austriak me prejardhje hebraike Norbert Jokli (1877-1942); albanologu austriak Maksimilian Lamberc (Maximilian Lambertz, 1882-1963); albanologia ruse Agnja Vasiljevna Desnickaja (1912-1953); albanologu austriak Gustav Majer (Gustav Meyer, 1850-1900); albanologu kroat Milan Shuflaj (1879-1931); albanologu danez Holger Pedersen (1867-1953) etj.

*   *   *

Robert Elsie, krahas kontributit të tij të çmuar si albanolog, studiues dhe përkthyes do të kujtohet me respekt dhe mirënjohje nga publiku shqiptar edhe për vetëdijen dhe kujdesin e veçantë që tregonte për pasurimin e arkivave të Bibliotekës Kombëtare të Shqipërisë me dhurimet e veprave dhe artikujve të tij të shumtë studimorë. Ato përbëjnë sot një fond të vyer në fushën e albanologjisë dhe të studimeve mbi letërsinë dhe kulturën mbarëshqiptare. Në fondet e Bibliotekës Kombëtare ruhen mbi 150 libra dhe artikuj shkencorë, kryesisht në fushën e albanologjisë, të antropologjisë, të përkthimeve nga thesaret e folklorit shqiptar, por edhe përkthime të autorëve të letrave shqipe, ku spikat kontributi i rëndësishëm nëpërmjet  përkthimit të veprës epike të Gjergj Fishtës “Lahuta e Malcís”.

Tashmë Biblioteka Kombëtare, në homazh të këtij personaliteti të shquar, ka çelur një ekspozitë me kontributin e tij të jashtëzakonshëm. Tituj të caktuar të Elsies meritojnë vëmendje të veçantë, si: Botimet e veprës së tij studimore kushtuar Shqipërisë – dashurisë së tij të madhe – zënë fill me botimin në vitin 1986 të “Dictionary of Albanian literature”, “Albanian literature in Greek script: the eighteenth-and early nineteenth-centry orthodox tradition in Albanian weriting” (1991) (“Fjalor i letërsisë shqipe”, “Letërsia shqipe me alfabet grek: tradita ortodokse në shkrimin shqip të shekullit të tetëmbëdhjetë dhe fillimit të shekullit të nëntëmbëdhjetë”); “Historia e letërsisë shqiptare” (1997); “Albanian alphabets: borroëed and invented” (2017) (“Alfabetet shqipe: të huazuara dhe të shpikura”) etj.

Njohës i shkëlqyer i shqipes dhe i kulturës shqiptare, Robert Elsie ka përkthyer në gjuhën angleze autorë dhe poetë të rëndësishëm shqiptarë, si Gjergj Fishta (1871-1940), Migjeni (1911-1938), Ali Podrimja (Gjakovë, 1942 – Lodève, Francë, 2012), shkrimtari dhe matematikani Fatos Kongoli (Elbasan, 1944- ), poeti dhe prozatori Azem Shkreli (Lindi në Rugovë të Pejës në vitin 1938; vdiq në vitin 1997); poetja dhe pediatrja Flora Brovina (Skenderaj, 1949- ), shkrimtari dh epoeti nga Kosova, Eqrem Basha (Dibër, 1948- ), fotografja, piktorja dhe shkrimtarja Ornela Vorpsi (Tiranë, 1968- ).

Është autor i shumë recensioneve për veprat e Ismail Kadaresë (Gjirokastër, 1936 – Tiranë, 2024), të poetit Xhevahir Spahiu (f. Malind, ish-komunë e Çepanit në qarkun e Berattit, të poetit Shaip Beqiri (1954- ), të shkrimtarit Kasem Trebeshina (Berat, 1926 – Ankara, 2017) etj.

*   *   *

Me rastin e vdekjes së Elsies, prononcohen personalitete të ndryshme të kombit. Ai la pas një vepër të jashtëzakonshme dhe të pazëvendësueshme. Ne shqiptarët e sotëm mbase nuk do ta dimë mjaftueshëm kush ka qenë Robert Elsie. Letrat shqipe sot, mbase prej moskujdesi, nuk kanë treguar vëmendje të duhur për këtë titan të letrave, por brezat që do të vijnë, do ta kuptojnë që ky njeri i thjeshtë dhe tejet punëtor, i ka bërë shërbim të jashtëzakonshëm kulturës shqiptare. Vepra e këtij njeriu modest ka qenë engjëlli i vërtetë mbrojtës i kulturës shqiptare.

Poetja dhe shkrimtarja Flutura Açka (Elbasan, 1966- ) flet për amanetin e Elsies: “Dua të prehem në Shqipëri!”

Ministrja e Kulturës Mirela Kumbaro Furxhi (Tiranë, 1966- ), midis tjerash shkruan: “Ne lindëm shqiptarë, ty të bëri pasioni të tillë!” Prononcohet edhe kreu më i lartë i qeverisë: “Robert Elsie dëshironte të prehej në Shqipëri, bëjeni të mundur këtë! Dhe me të gjitha nderimet që meriton.”

Prend Buzhala (Çabiq i Klinës, 1951- ): Tri punë monumentale të Elsies për shqiptarët Prej vitit 1990 e këndej ne nuk ishim në gjendje ta hartojmë një histori të letërsisë shqipe dhe këtë e bëri Robert Elsie me veprën “Histori e letërsisë shqiptare” 1997 (botimi II më 2001). Akademitë tona, katedrat tona albanologjike ende bëjnë gjumin dimëror “demokratik”, mbasi paguhen me paga të majme… Fillimisht, e kishte nisur me veprën studimore “Një fund dhe një fillim” 1995, me të cilën ai sintetizon për herë të parë studimet për letërsinë e çliruar nga prangat ideologjike të pushtetit. Në fakt, kjo vepër përfshin studime që fillimisht u shkruan për të huajt, e mandej erdhën edhe në versionin shqip.

Veprat kushtuar Kosovës - Vjen tema e madhe e Kosovës me disa vepra, si ajo me 600 faqe, “Kosovo: In the Heart of the Poëder Keg” (Kosovë: në qendrën e fuçisë së barutit), Boulder, Colorado 1997; dhe vepra me shkrime historike “Gathering Clouds: The Roots of Ethnic Cleansing in Kosovo and Macedonia, Early Tëentieth-Century Documents (Stuhi në horizont: Rrënjët e spastrimit etnik në Kosovë dhe Maqedoni, dokumente të fillimit të shekullit të njëzetë), Pejë 2002. Lexuesve të pasionuar nuk u ka shpëtuar vepra “Leksiku i kulturës popullore shqiptare”, Tiranë 2005, sidomos dy leksikonët: “Fjalor historik i Kosovës” 2011, dhe “Fjalori historik i Shqipërisë” 2011. Vjen përkthimi i tij i veprave monumentale në anglisht “The Highland Lute: The Albanian National Epic” (Lahuta e Malcís: eposi kombëtar shqiptar), Londër 2005) dhe i prozatorëve e poetëve të tjerë.

Të shumta janë edhe veprat dhe shkrimet e tjera nga gjuhësia, dialektologjia, historia, nga fusha e përkthimeve dhe e botimeve, në anglisht dhe në shqip.

Arben Llalla (Elbasan, 1972- ) - Vdekja e tij e parakohshme është një humbje e madhe për shkencën shqiptare. Me Robert Elsien kemi bashkëpunuar rreth çështjeve të historisë së shqiptarëve për më se 15 vjet, në veçanti për çështjen Çame. Në botim e fundit të librit tim “Për gjenocidin grekë mbi popullsinë shqiptare në Çamëri në vitet 19944 - 1945”, u këshillova me Elsien për paqartësinë e disa fotografive të viteve 1943. Për njerëzit në fotografi, grekët shkruajnë se janë çamë, por në të vërtetë bëhej fjalë për boshnjakë dhe serbë.