Vullnet Mato: Vdekja e fjalës

Vullnet Mato

VDEKJA E FJALËS

Jeta mijëravjeçare

tregon se fytyra,

formohet nga fjala

që pjell mendja.

Fjala te çdo njeri

ka mbetur pasqyra

që tregon ç’ka truri

fshehur përbrenda.

Kushdo që zbraz

fjalë pareshtur,

e njerëzit nuk shohin

mirësi në realitet,

apo zbardh të zezat

duke u përpjekur

të pasqyrojë veten

si nuk është vërtetë;

Fjala i ka vdekur

dhe ka ikur nga jeta,

ndonëse mbi këmbë

mund të vij vërdallë.

Por në opinion fytyrën

ia ka fshirë urrejtja,

dhe ka mbetur vetëm

një kufomë e gjallë.

Sot kemi mes nesh

shumë fjalëvdekur,

kufoma të gjalla

që na sillen përqark.

Ekranet janë bërë

me thumba të hekurt,

që na shpojnë sytë

nga mëngjesi në darkë...