Gjon Keka: Për flamurin e Gjergj Kastriotit nuk dënohesh, për atë osman dënohesh

Për flamurin e Gjergj Kastriotit nuk dënohesh, ndërsa për flamurin e armikut shekullor otoman dënohesh, kjo ndodh vetëm në shtetin laik të Kosovës

Është viti 2026 dhe po të ringjalleshin idealistët, patriotët, heronjtë dhe dëshmorët që derdhën gjak, djersë e dhanë gjithçka për liri, flamur, pavarësi, bashkim dhe rikthim në familjen europiane, sot në këtë shekull shqiptarët e Kosovës që nuk duan që flamuri i një armiku të provokojë ndjenjat e tyre dënohen me burgim e gjobë do të qanin nga dhimbja se për kë luftuan dhe të bindur se nuk do të lejonin asnjë mbetje të tillë otomane jo vetëm në gjykata por në asnjë institucion, madje as në trojet dardane-arbërore.

Ka kohë që përdhoset flamuri ynë kombëtar - flamuri i Gjergj Kastriotit, njollosen kryefigurat apo më mirë të thuhet shtyllat e themelet e kombit dhe identitetit tonë kombëtar europian e humanist sikur janë: Gjergj Kastrioti (Skënderbeu), Pjetër Bogdani, Idriz Seferi, Nënë Tereza etj., dhe as gjykatat e asnjë institucion e as pushtetar nuk i ka dënuar as me burgim e as me asnjë ndëshkim të domosdoshëm për të ndalur një mjerim e njollosje të tillë, por ata kanë vazhduar, sa që edhe sot kur po shkruaj ata ende shajnë e njollosin figurat e tilla dhe flamurin e gjuhën tonë të shenjtë iliro-arbërore.

Ndoshta nuk ka arritur në atë pikë shteti ynë që në gjykata e institucione të tjera të lejojë të futen individë me prirje ideologjike islamike që thërrasin: „dum babën sulltan”, haxhiqamilista që nuk kanë asnjë tjetër mision pos shkatërrimit të kombit tonë, shtetit laik të Kosovës nga brenda.

Nëse ka individë të tillë brenda institucioneve si në gjykata apo institucione të tjera e qeveri që dënojnë shqiptarë për qejfe apo simpati të otomanëve (turqve), është më mirë t’i largoni vetë nga ato institucione sa nuk ka ardhur koha me i largu, ose vetë patriotët e idealistët e vërtetë të kombit bashkë me ndihmën e ShBA-s, NATO/KFOR dhe disa nga vendet mike europiane.

Pra si duket po vjen dita kur ne duhet të kërkojmë ndihmë për me na çliruar jo nga ndonjë armik i jashtëm, por nga ai i brendshëm, nga haxhiqamilët, ballabanët e esatpashtoptanët.

E kuptoj se përdhosja e flamujve të popujve e shteteve të tjera nuk është gjest i hijshëm dhe është mungesë kulture dhe respekti ndaj kombeve e popujve të tjerë, por a nuk do të ishte më mirë që ai individ që e ka bërë një gjest të tillë të ketë pasur në zemër atë dhimbje si dhe ta ketë konsideruar poshtërim për kombin vendosjen e një flamuri të armikut, sepse siç dihet një flamur i tillë i kujton popullit tonë, mendoj për popullin e vetëdijshëm dhe që e njeh historinë, se ai flamur na kujton dhimbjet, gjenocidin e masakrat që na kanë shkaktuar me shekuj sulltanët dhe Perandoria Otomane dhe se politika e sotme turke ka në planin e saj gjeopolitik e gjeostrategjik që ta rikthejë fantazmën e saj otomane (e njohur sot si neo-otomanizëm) në vendet që i ka pushtuar më parë nëpërmjet simboleve ideologjike fetare që ka ngulitur mbi themelet e objekteve të lashta ilire-arbërore, të kishave arbërore e dardane dhe kudo ku ajo ka prekur në trojet tona.

Nga kjo duhet ditur dhe nënvizuar edhe këtë: e kanë të kotë ata që mendojnë se duke dënuar dardano-arbërorë (shqiptarë të Kosovës) po i shërbejnë armiqve shekullorë që e kanë shkatërruar në palcën kurrizore kombin tonë dhe e kanë lënë mbrapa si në mendje, shpirt e zhvillim të përgjithshëm larg dinamikës së kombeve të civilizuara të botës dhe Europës.

Historia na ka treguar se askush, asnjë armik i brendshëm dhe i jashtëm nuk ka mundur t’i gjunjëzojë bijtë dhe bijat e Gjergj Kastriotit (Skënderbeut) dhe as sot ata dardanë apo arbërorë të vërtetë që kanë në venat e tyre gjakun e Gjergj Kastriotit e Idriz Seferit nuk do t’i gjunjëzojnë as renegatët, as ballabanët e as haxhiqamilët e sotëm.

Sepse gjithmonë dhe tani bota e arsyes dhe e civilizuar do të na dalë në ndihmë dhe do ta zgjidhim edhe këtë problem të brendshëm të kombit tonë që po vuan nga mbetjet dhe satelitët e armiqve shekullorë, duke na penguar që të ecim krah kombeve të civilizuara të Europës dhe të bëhemi një ditë pjesë e kësaj familjeje europiane që i takojmë natyrshëm. Me këtë rast ftoj miqtë amerikanë-europianë që të na ndihmojnë të çlirohemi edhe nga armiku ynë i brendshëm dhe t’i përcjellin me vëmendje këto gjykime diskriminuese dhe të panatyrshme ndaj shqiptarëve të Kosovës që nuk duan që ndjenjat e tyre kombëtare të fyhen dhe kujtesa të rëndohet duke vendosur flamur gjigand turk – të një nga armiqtë e kombit tonë, armikut të Gjergj Kastriotit, Pjetër Bogdanit e Idriz Seferit. Por dihet se flamuj të tillë nuk do të vendoseshin aty nëse nuk do të kishte miratim nga ideologët e ideologjisë fetare të pushtuesit dhe pushtetarët qendrorë e lokalë të shtetit të Kosovës. E gjithë kjo po bëhet jo vetëm nga dora e zgjatur e armikut otoman që do ta rikthejë fantazmën e tij, por edhe nga pushtetarët e shtetit laik të Kosovës.