Blerim Latifi: Personazhet mbeten të njëjtit, por maskat ndërrohen vazhdimisht

Prej të gjitha “kafshëve politike”, militantët janë më të vëmendshmit. Ata e hetojnë të parët çdo lëvizje në frontin politik dhe të parët i riorientojnë sulmet me artilerinë e fyerjeve digjitale dhe duartrokitjet.

Kêshtu atë që dje e ngrinin në qiell, sot e përbaltin, dhe anasjelltas, atë që dje e përbaltnin, sot e duartrokasin.

Atij që dje ia vinin në pah virtytet, sot ia nxjerrin në shesh veset, dhe anasjelltas, atij që dje ia përplasin në fytyrë veset, sot ia mbulojnë ato me dekorata virtytesh.

Si ta quajmë këtë teatër etiketash?

A mund të na ndihmojnë Albert Kamy, Samuel Beketi apo Ezhen Jonesko me teatrin e absurdit?

Mbase po. Sepse këtu, në skenën politike kosovare, nuk kemi të bëjmë me bindje të qëndrueshme politike, por me role që ndërrohen sipas ritmit të betejës politike. Personazhet mbeten të njëjtit, por maskat ndërrohen vazhdimisht. Si të "Anarkitë" e Nolit:  Heroi i djeshëm bëhet tradhtari i sotëm, ndërsa armiku i djeshëm shpallet shpëtimtari i ri.

Në këtë skenë të zhurmshme, fjalët nuk përdoren më për ta thanë të vërtetën, por për të organizuar duartrokitjet dhe linçimet. “Virtyti”, “ndershmëria”, “tradhtia”, “patriotizmi” , të gjitha këto shndërrohen në etiketa të lëvizshme, që ngjiten dhe hiqen sipas nevojës së momentit. Dhe militantët, si aktorë të përhershëm të këtij teatri etiketash, janë mjeshtrit më të zotë tê kësaj metamorfoze pothuajse kafkiane.