Shefqet Dibrani: Libër me porosi për jetën dhe shëndetin e njeriut

Vitrina e librit:

LIBËR ME POROSI PËR JETËN DHE SHËNDETIN E NJERIUT

Idriz (Ibrahim) Shabani, "SI TA PËRTËRIJMË JETËN", meditime dhe frymëzime, botoi Shtëpia Botuese "DritaPress", Prishtinë, 2026. Libri ka 130 faqe dhe ISBN 978-9951-825-76-4.

Këto ditë, Shtëpia Botuese "DritaPress", e drejtuar nga Naser Vitija, nxori nga shtypi librin e mësuesit veteran Idriz (Ibrahim) Shabani, "SI TA PËRTËRIJMË JETËN", meditime dhe frymëzime. Ky libër është botuar falë humanizmit të kushërinjve të autorit dhe vjen në kuadër të 90-vjetorit të mësuesit të parë në fshatin Gërdoc të Llapit, Idriz Ibrahim Shabani, i cili është edhe banori më i moshuar i këtij fshati. Në proces botimi është edhe një libër tjetër me kujtime për fshatin e tij të lindjes, Gërdocin.

Idriz Shabani ka lindur më 7 nëntor 1936 në fshatin Gërdoc, Komuna e Podujevës. Shkollën fillore e kreu në fshatin Halabak, gjimnazin e ulët në Podujevë, ndërsa Shkollën Normale në Prishtinë. Gjatë gjithë jetës së tij profesionale punoi si mësues, duke i kushtuar arsimit rreth dyzet vjet, deri në pension.

Mësuesi Idriz, sivjet nëntëdhjetëvjeçar, është mësuesi dhe intelektuali i parë në fshatin Gërdoc. Gjatë viteve shtatëdhjetë të shekullit XX është shpërngulur në Podujevë, ndërsa pas luftës, së bashku me familjen, është vendosur në Prishtinë.

Dy librat e tij, që mund të cilësohen si vepra me vlerë të veçantë, dëshmojnë se puna e pedagogut shkon përtej angazhimit të përditshëm me ditar në dorë. Njëri libër përmbledh kujtime për fshatin e lindjes, ndërsa ky i botuari, synon të stimulojë imagjinatën dhe të theksojë rëndësinë e saj në jetën e njeriut. Këto vepra, pa dyshim, përbëjnë një kontribut të çmuar në kulturën e librit në Kosovë.

"Jeta nuk është luftë, por është lojë!", ka shkruar vetë autori, duke e cilësuar atë si një "lojë të dhënies dhe marrjes". Sipas tij, "çfarëdo që të thotë ose të bëjë njeriu, do t'i kthehet në jetë; atë që e jep, atë do ta fitojë". Në shënimet e tij, vendosur në përmbyllje të librit ai thekson: "Nëse jep dashuri, do të fitosh dashuri; nëse jep urrejtje, do të fitosh urrejtje; nëse gënjen, do të të gënjejnë". Prandaj, libri na mëson se fuqia e imagjinatës është thelbësore në rrugëtimin jetësor. "Atë që e imagjinon njeriu, herët a vonë do ta realizojë", shprehet autori, duke shtuar se "nëse mendojmë mirë, atëherë mund të sjellim në jetën tonë çdo dëshirë të arsyeshme: shëndetin, mirëqenien, dashurinë, miqtë dhe vetërealizimin".

Autori është mbështetur edhe në literaturë të ndryshme dhe, së bashku me librin tjetër që pritet të botohet në këtë jubile, falë përkrahjes së kushërinjve të tij: Nazmiut, Shemsiut, Shaipit, Beqirit, Ujupit dhe Fehmiut, Mësuesi Ynë Idriz Shabani, po e realizon ëndrrën e tij për botimin e këtyre veprave. Sipas tyre, gjatë kësaj vere do të organizohet një manifestim për të shënuar 90-vjetorin e lindjes dhe promovimin e librave.

Redaktor dhe lektor i librit është Sulejman Dërmaku, ndërsa recensent Ilir Prapashtica. Libri është përgatitur nga Shefqet Dibrani, i cili ka shkruar edhe parathënien. "Guximi bart në vete gjenialitetin dhe magjinë. Të gjitha sëmundjet dhe fatkeqësitë nxiten nga shkelja e ligjit të dashurisë". Prandaj, "ky libër frymëzues na tregon se si secili nga ne mund ta ndryshojë gjendjen e vet, nëse mendon mirë...".

Të gjithë ata që e njohin Mësuesin Idriz i gëzohen këtij suksesi dhe i dëshirojnë jetë të gjatë autorit.

Prishtinë, 22 prill 2026

Shefqet Dibrani