Sevdail Hyseni: “Kohë pa shpirt” - një thirrje poetike për reflektim në kohët moderne

1h më parë

Përurim libri

“Kohë pa shpirt” - një thirrje poetike për reflektim në kohët moderne

Nga Sevdail Hyseni

Të shtunën, më 25 prill, në ambientet e Bibliotekës “Fan S. Noli” në Gjilan, u përurua libri i parë poetik i autores Makfire Shala, me titull simbolik “Kohë pa shpirt”. Poetja, e cila jeton dhe vepron në diasporë, u paraqit para publikut me një vepër që sjell një zë të ndjeshëm dhe reflektiv në poezinë bashkëkohore shqipe.

Për librin foli redaktori i tij, Sevdail Hyseni, i cili vlerësoi se “Kohë pa shpirt” përfaqëson një udhëtim të thellë shpirtëror në botën e njeriut modern, i cili përballet vazhdimisht me kontrastet e jetës - mes dritës dhe errësirës, shpresës dhe zhgënjimit, besimit dhe dyshimit. Sipas tij, autorja nuk synon thjesht të krijojë poezi si formë artistike, por ndërton ura reflektimi mbi jetën, marrëdhëniet njerëzore dhe raportin e individit me vetveten, me tjetrin dhe me krijuesin.

Duke u ndalur në përmbajtjen tematike të librit, Hyseni theksoi se poezitë e Makfire Shalës trajtojnë tema universale si dashuria për jetën, mirësia, falënderimi, dhimbja, vetmia dhe kërkimi i kuptimit, të cilat ndërthuren natyrshëm për të krijuar një mozaik të pasur përjetimesh njerëzore. “Ky libër nuk lexohet vetëm me sy, por mbi të gjitha me zemër”, u shpreh ai.

Në cilësinë e redaktorit, Hyseni shtoi se në këtë dorëshkrim ka gjetur një zë të sinqertë, të drejtpërdrejtë dhe emocionalisht të ngarkuar, i cili nuk imponon të vërteta, por fton lexuesin në reflektim të thellë personal. Sipas tij, vlera më e madhe e këtij vëllimi qëndron pikërisht në komunikimin e drejtpërdrejtë shpirtëror që krijon me lexuesin.

Në këtë përurim letrar, fjalë rasti mbajti edhe recensenti i librit, ish-kryetari i Kuvendit Komunal, z. Kushtrim Kadriu, i cili çmoi stilin dhe formën e shkrimit të autores. Ai theksoi se Makfire Shala tashmë ishte e njohur për publikun përmes publikimeve të saj në rrjetet sociale, ndërsa me këtë botim ajo konsolidohet si një zë i ri në poezinë shqipe edhe në formën e librit të shtypur.

Kadriu potencoi se “Kohë pa shpirt” paraqet një univers të pasur reflektimesh filozofike dhe shpirtërore, ku autorja ndërton një dialog të vazhdueshëm me jetën dhe njeriun bashkëkohor. Sipas tij, kjo poezi është një poezi meditimi dhe kërkimi, që vjen si reagim ndaj një bote gjithnjë e më të zhurmshme dhe shpesh të zbrazët shpirtërisht. Ai e përmbylli vlerësimin e tij duke e cilësuar këtë vëllim si një zë të qetë, por të qëndrueshëm në poezinë reflektive bashkëkohore, që fton lexuesin të ndalet dhe të rikthehet tek vetvetja.

Në kuadër të këtij manifestimi letrar, u paraqit edhe shkrimtari Shaban Emini, i cili përgëzoi autoren për botimin e librit të saj të parë. Ai interpretoi para të pranishmëve poezinë “Lutja e babës për vajzat e tij”, e cila ngjalli emocione të veçanta në sallë. Në shenjë mbështetjeje dhe inkurajimi, Emini i dhuroi autores një libër të tij, duke e motivuar që të vazhdojë rrugën e saj krijuese.

Në fund të këtij aktiviteti, autorja Makfire Shala falënderoi të gjithë pjesëmarrësit për praninë dhe mbështetjen e tyre, me një mirënjohje të veçantë për redaktorin, recensentin dhe të gjithë ata që kontribuuan në realizimin e këtij botimi. Ajo e cilësoi këtë libër si një hap të rëndësishëm në rrugëtimin e saj krijues dhe një dëshmi të përkushtimit ndaj fjalës së shkruar.

Përurimi i librit “Kohë pa shpirt” u përmbyll në një atmosferë të ngrohtë dhe reflektuese, duke dëshmuar edhe një herë rëndësinë e letërsisë si mjet për të kuptuar më mirë veten dhe botën që na rrethon.