Kolec Traboini: Për Xhaferin gegnishtja është rrënuese

PER ARBER XHAFERIN GEGNISHTJA ESHTE RRENUESE

Nga Kolec Traboini

Hama dreq oren nuk e mora vesh çka desh me thanë ky politiku i kulisave të Shkupit që e tjerr aq gjatë intervisten dhënë për gazeten "Shqip" më 17 korrik 2012, veç për me hedh poshtë gegnishten. Ku e ka hallin ky,  a din kush gja? Na, mor zotni, nuk kena dalë me rrzue standartin, nuk po thona me rrzue e me vue një tjetër Standart,  as me hjek një Kostallar e me vue një tjetër, por veç me e pasunue këtë gjuhë që asht katandis si mo Zot ma keq, me një leksik prej ndoshta 5.000 fjalë se nja 4.000 të tjera janë turko-greke.

Qe të bindesh për turqizmat tona në gjuhë, shiko  serialët televizivë me Sulejman të madhërishëm që jep Tirana për natë- e lexo përzishëm  se në fund, ky  “vlla gjaku” qeveritar, ka me i pre kokën vezirit shqiptar Pargali. Flasim e shkruajmë pra, me e shikue mundësinë e paskajores, apo që mos me e përdor rotacionin strikt deri në vandalizëm se po na e shpif të folmën, që siç thuhet ranishte të thuhen edhe fjalë të tjera të cilat gërma n i zbut si fjalë i ban ma poetike, dhe gjuhën e zbukuron, e largon prej greqizmave dhe turqizmave, bash kjo gegnishtja jonë.

Na nuk po thona me nda por me bashkue e ti pse je kundër bashkimit?! Për ma tepër ti zotnia politik i Shkupit, nëse nuk merr vesh nga gjuha siç po thue, pse po shprush zjerm? Pse po i qet telashe vedit? Pse flet? Se ky nga politika e ka ndrit fare,  e dimë. Po fare po ju them, qysh në gusht te vitit  2001 me Marrveshjen e Ohrit në të cilën shqiptarët që ishin në avantazh luftarak dhe kishin arritur që me forcat e veta të UÇK-së të afroheshin deri Haraçinë, 7 km nga Shkupi, ky farë politiku,  ky shkoi e firmosi një Marrveshje që nuk i ka mbet kurrgja veç nuanca e tradhtisë së interesave të shqiptarëve për hir të kolltukut politik e shtetnor që ky gëzoi. Po ky nuk e tundi fare kur 5 djem shqiptar luftëtarë të UÇK-së si sot njëmbëdhjet vjet ma parë,  më 7 gusht 2001, u masakruan në gjumë. Mirë kur nuk u tha sllavëve ju lumtë se për pak këta djem atdhetarë na e prushën marrveshjen e tradhtisë se unë nuk kam pa që shqiptarët si popull të kenë fitue diçka prej saj,  veç përfitimit të politikanëve të kolltukëve.

Ma mirë u kish dashtë mos me folë fare për punë të gjuhës se ky nuk ban dot politikë përçarëse ndaj Gegnishtes.

Nuk asht në Oher e nuk ka të bajë me gëge syleshë. Ky ha bukë me sllavo-maqedonët, flet maqedonisht me politikanët sllav, pin edhe venë( atij i pelqen me i thanë verë mirëpo harron se verrë i thuhet edhe diçkaje tjetër në jug  që fillon e nuk pushon, lum Arbëri),  pinë venë me ta pra, ban edhe aleanca,  dhe Gegnishten Letrare te Shkodrës po e sheh me sy tinzar. Atëherë edhe na kështu thona për ty, lum Arber Xhaferi. Na vjen keq,  o mik politik, por gja në dritë nuk je tue qit as në politikë e si po na kullandris punët e Gjuhes Standart  që e vendosi me diktat Byroja Politike dhe e mbrojnë profesorat që kanë qënë të shumtë antarë të PPSH( partisë së diktaturës).

A ke lexue gja mor zotni nga jeta e vepra e studiuesit të madh Nikoll Daka, që ka reague bash në ditët që vendosej Standarti. Hiç nuk ke lexue. Se atë e ka fut në burg diktatura dy herë,  sa ja mori shpirtin nga dashnija për gegnishtën. Po ti lexon veç gazetat  "Dnevnik","Nova Makedonija", "Utrinski Vesnik", "Vecer" sigurisht dhe fletushkat e Beogradit për tu kthjellue në politikën kozmopolite larg “arkaizmit” kombëtar.

Me këtë intervistë të fundit që ke dhanë, ti kjosh vetë o Arbër Xhaferi, se ora e politikës së vjetër me çarkisufin e Sulltan Hamitit, ka mbarue. Ti të paktën pshto vedin, pshto emrin e bukur  shqip që kë, e mos shko me turp si Androkli Kostallari e kompania e Lal Krosave të Enver Hoxhës që edhe në paçin frymue deri më tash, krahthatët  janë në të shuem.