Blerim Latifi: Mjerimi i gjuhës

“Kufijtë e gjuhës sime janë kufijtë e mendjes sime”, thotë Ludwig Wittgenstein, një nga më të mëdhenjtë e filozofisë bashkëkohore.

Gjuha dhe mendimi nuk janë të ndara nga njëra-tjetra. Gjuha është mediumi ku ndodh të menduarit. Nuk ka mendim jashtë gjuhës. Nuk ka lëvizje të mendimit jashtë strukturave gjuhësore. Ne mendojmë me koncepte, emra, dallime, kategori dhe të gjitha këto janë produkte të gjuhës.

Prandaj, varfëria e gjuhës është njëkohësisht edhe varfëri e mendimit. Sa më i ngushtë të jetë horizonti gjuhësor, aq më i ngushtë bëhet edhe horizonti i të menduarit.

Shikoni hapësirën tonë publike: mjerimi i gjuhës në të është pasqyra më e qartë e mjerimit të të menduarit politik. Dhe aty ku ka mendim të mjerë politik, nuk duhet të prisni qeverisje të mirë, as fuqizim të shtetit e as zhvillim ekonomik. Duhet të prisni vetëm vazhdim e thellim të mjerimit.

_________

Meqë plehu gjuhësor sot është bërë prodhimi dominues në hapësirën publike, kritikët po flasin për lindjen e një "shkence të re", e cila ka për objekt studimi pikërisht këtë fenomen.

Kjo shkencë quhet shitologji. Vetë emri i saj është një kompozitë ironike, por fort domethënëse, e fjalës angleze “shit” dhe e së famshmes fjalë greke “logos”.

Padyshim, Kosova ka material të bollshëm për të qenë një rast i shquar studimor në shitologjinë globale.

_________

Sekretari i Shtetit Marco Rubio, kujtoi figurën e Nënë Terezës gjatë një vizite te Misionaret e Bamirësisë, ku bëri homazhe për trashëgiminë e saj.

Eric Wendt, gjenerali amerikan i emëruar nga Trump për ambasador në Tiranë, deklaroi para Senatit amerikan: “Forcat speciale shqiptare kanë frymën e Skënderbeut”.

Pra, bota e qytetëruar vazhdon t’i njohë dhe t’i respektojë shqiptarët përmes këtyre dy figurave. Por ç’e do se shumëkujt prej tyre u ka hyrë dreqi n' bark dhe duan të njihen si puthadorë e puthakëmbë të sulltanëve e zhuganëve.