Rexhep Shahu: Për çfarë do të mbetet në histori z. Kurti

Për çfarë do të mbetet në histori z. Kurti

Askush në politikë nuk ka në dispozicion kohë pa mbarim për të udhëheqë, asnjë mbret as diktator apo udhëheqës çfardo.

As Enver Hoxhës zoti nuk i la kohë më shumë edhe pse nuk bënte zgjedhje.

Kryeministri Kurti mjaftueshëm tregoi se është i aftë të zhvillojë zgjedhje të lira e demokratike në Kosovë edhe tri herë vit, por duket nuk po tregohet a nuk është i aftë të drejtojë Kosovën, të udhëheqë dialog politik vizionar në tavolinë, të sillet me qetësinë e sigurinë e fituesit real e moral të zgjedhjeve. Duket fitimtar i paqetë i pa sigurtë në atë që ka fitue.

Kryeministri Kurti nuk po tregon aftësi e qetësi të dialogojë me veten e tij, të bëhet një me veten e tij në mjes, drekë, darkë dhe po u kërkon drejtuesve të opozitës të bëhen një mendje dhe urgjent të sjellin tre emra për president jashtë politikës. Tre të bëhen një mendje e një nuk bëhet një mendje.

Edhe pse fitues real z. Kurti nuk e ka qetësinë, sigurinë, zemërgjërësinë e fituesit që të udhëheqë proceset. Posti i presidentit nuk e cënon në asgjë një kryeministër me aq vota sa ka z. Kurti. Pse ka kontraktim politik e mëni në ligjërim z. Kurti kur askush aktiv në skenën politike nuk i ka arritë fitoret e tij.

Askush në Kosovë nuk bëhet Rugovë, askush nuk i fiton betejat e Rugovës.

Po mendoj  se votuesit e z. Kurti janë votues inati sezonal,  jo shtam i VV, janë njerëz të revoltuar të zemëruar me një stinë a një tjetër me një parti a një tjetër me një lider a një tjetër, nuk janë tradicionalistë të VV se VV duket do të jetë jo parti lumë por rrëke që fryhet në mot të keq.

Mund të bëjmë poema dashurie e urrejtje, mund të rrinë  mbi kuaj inatesh politikanët e sotëm  të Kosovës por nuk po krijon asnjëri profil udhëheqësi që mendon për Kosovën, të gjithë pa përjashtim po mendojnë për bythën e tyre, për interesin e tyre personal, për partinë e tyre për fansat e tyre të rrjeteve sociale  jo për Kosovën as të ardhmen e saj.

Nuk them të ndjekin Rugovën se një shekull larg tij janë dhe kostumi i tij u rri shumë i madh ani se guxojnë ta gjykojnë e qortojnë.

Por them të mendojnë për aleancat e domosdoshme të Kosovës, të mos ftohin Amerikën që na çliroi me Kosovën. Të jenë dinjitozë sado pak me historinë.

Nuk vdesin shqiptarët e Kosovës edhe me u përmbysë liria e pavarësia, shpirtin nuk ua mban asnjë politikan por regresi është i pafalshëm se është bërë sakrificë e madhe për Kosovën që është dhe nuk është bërë se ka pasë Amerika interesat e veta siç thonë komunistët, por është bërë për ta bërë Kosovën shtet, “që të shpëtojmë dy milionë shqiptarët”.

Kryeministri Kurti shumë thjeshtë mund t’ia kursejë Kosovës stresin dhe shfaqjet banale poltike të inatit, mund të ulet pa asnjë paragjykim e frikë me kafe para me tre kryetarët e partive LDK, PDK, AAK dhe të gjejnë në tavolinë  një intelektual të ndershëm jo partizan që i ka Kosova.

Presidenti nuk e ka në dorë shpirtin e Kosovës, është një hallkë, proçedurë, nuk është i dërguar i zotit në tokë.

Zoti Kurti mund ta çojë vendin në zgjedhje e prapë e prapë në zgjedhje, mund t’i fitojë zgjedhjet në çdo stinë, mund të bëhet kryeministër sa herë të dojë e kurgjo kërkujt, kujt po i hy në punë. Kosova nuk fiton, bën një hap para dy hapa pas.

Kështu me këtë politikë katuni, për inat të kojshisë… kryeministri Kurti do të hyjë në histori si kryeministër që di e mundet të organizojë zgjedhje të pranueshme edhe tri herë në vit  dhe kaq,  vetem kaq, jo më tej.

Kosova ka nevojë për udhëheqës, për burrë shteti, jo për nëpunës zgjedhjesh,  jo për burrë as grua pushteti.