Kalosh Çeliku: Beqaresha partiake

19.09.2009, 05:28 PM (GMT+1)

Kalosh Çeliku

BEQARESHA PARTIAKE

         Hanëm Firdesi është një grua e rreth viteve të dyzeta. Nuk e di a ka të kryerë ndonjë shkollë fillore katërvjeçare. Vetëm e di se, nuk ka shkollë të mesme. Nuk ka rëndësi kjo stoli partiake. E rëndësishme është se, e ke në Qeveri... Ministri... Universitet... Redaksi...
         Hanëm Firdesin e njohin të gjithë. E njoh edhe unë, më ka pri disa herë me radhë te zyrat e Partisë... Ministri... Universitet... Redaksive, për ndonjë intervistë në emisionet kulturore. Shkurt, ajo e kryen detyrën për mrekulli: mysafirët, secilin e dërgon në kohë dhe vend të duhur, te zyrat e sheficave dhe shefave të redaksisë.
         E çuditshme është se, Hanëm Firdesi kurrë nuk vonohet në punë. Nuk shet mend si shoqet tjera asgane. Nuk zihet me kolegët e punës. Nuk e shanë Qeverinë... Partinë.. Vetëm se, edhe Hanëm Firdesi e ka një të metë, nuk është e përkryer. Punemadhe, do të thoni ju: edhe Shkespiri nuk është i përkryer. E ku më, Hanëm Firdesi. Megjithatë, Hanëm Firdesi me këtë ves së paku nuk është e dëmshme për shoqërinë... Qeverinë... Shtetin... Hanëm Firdesi i sheh sheficat e saja se si përdridhen korridoreve dhe do t’i imitojë, do të vishet si ato zonja të rënda të salloneve. Fustane mini... Frizura bjonde... Grime lloj-lloj ngjyrash. Thonj të gjatë e të ngjyrosur. Dhe, gji na, hakaret pak të nxjerrë për mejdani. Pse jo, edhe ajo të mos ketë një dashnor si sheficat e saja asgane?!... Edhe dashnorët kohën e fundit janë në modë. E sidomos ata partiakë me poste: ministra, deputetë, drejtorë, partizanë partie...
          E takova një ditë, përsëri Hanëm Firdesin në Ministri. E hijshme dhe e pispilosur ashtu siç di Hanëm Firdesi më, sipas modës së fundit të sheficave. E lyer dhe e përlyer alla shefice partiake.
          Një ditë tjetër, përderisa më printe për në zyrat e Ministrisë, mora guximin dhe e pyeta:
          - Cilën modë të fundit e ndjek ti Hanëm Firdes?!
           - Modën artistike të sheficës sime partiake bjonde, m’u përgjigj. Të pëlqen, ë?!
           - Po, edhe atë shumë. Patjetër.
            - Është moda më e re e fundit e sheficës sime partiake. Qeshi. Rrush i tharët do të thuash ti për veteranët e luftës?!
            - Jo, po çuditem në cilat vreshta të Atdheut e vjelë Partia këtë rrush të zi kokërrmadh?!
            - Te Çifligu i Xha Derallës... Qeshet. Përdridhet, Hanëm Firdesi.
            - Mos mendon edhe ti të bëhesh sheficë, e pyes me ironi?
             - Po, më përgjigjet plumb. Ta merr mendja, zoti shkrimtar. Çka kanë ato kokone më shumë se unë si grua?!... Shkollë?!... Tru?!... Pasuri të tundshme?!... Apo, përvojë partiake?! ... Qesh.
             - Po, Hanëm Firdes ato shefica i kanë nga njëzetepesë - tridhjetë vjet. E ti i ke klauar të dyzetat?!...
              - E di, më përgjigjet. Po, ato kanë burra, unë jam e pamartuar. Nuk kam burrë. Ende jam beqareshë. E pres Partinë, “demokratike” pasi më gjeti punë, të ma gjejë më në fund edhe një burrë!...
         Hi-hii-hiii...