Gani Pllana: Prof. Dr. Niko Pojani – Një emër mjaft i vlerësuar në komunitetin shkencor-inxhinierik

PROF. DR. NIKO POJANI – NJË EMËR MJAFT I VLERËSUAR NË KOMUNITETIN SHKENCOR-INXHINIERIK

NË SHQIPËRI DHE KOSOVË

Nga Gani S. Pllana

Prof. dr. Niko Pojani lindi në Korçë (Shqipëri) në vitin 1949. Shkollën fillore, 7-vjeçare dhe të mesmen të përgjithshme i kreu në Pogradec. është diplomuar me cilësimin «I dalluar» në vitin 1971 në Inxhinieri Ndërtimi, në Universitetin e Tiranës (UT), duke mbrojtur temën e diplomës  me titull “Impianti i pastrimit të ujit të fabrikës së letrës Shkodër”.  Pas një viti pune në Kantierin e bonifikimit Pogradec, emërohet asistent e më vonë pedagog në katedrën e ”Rezistencës së Materialeve” të Fakultetit të Inxhinierisë - UT, ku punoi si efektiv (i brendshëm), fillimisht nga viti 1972 -1979, duke u aktivizuar në dy lëndë mësimore: ”Mekanika teorike” dhe  ”Statika e ndërtimit”. Ndërkohë, më 1977 diplomohet në UT edhe në Inxhinieri elektrike, duke mbrojtur temën e diplomës me titull” “Modelimi (elektrik) i një pllake të inkastruar”, ku përdorej analogjia midis ekuacioneve diferenciale të gjendjes të deformuar në pllaka dhe atyre që rezultojnë në qarqet elektrike analoge përkatëse.

Në vitin 1979, pa ndërprerë mësimdhënien në Universitet, transferohet si punonjës shkencor në institucione kërkimore të Akademisë së Shkencave (ASH), fillimisht në Laboratorin e Hidraulikës, dhe mandej nga viti 1981 deri 1991, në Qendrën Sizmologjike (QS), që më vonë do të  emërtohej Instituti i Sizmologjisë (IS). Në QS, prof. N. Pojani do të ishte punonjësi i parë shkencor i drejtimit të Inxhinierisë Sizmike (i ndërtimeve rezistente ndaj tërmeteve). Gjatë viteve në vijim, edhe ky drejtim konsolidohet aty si sektor, e më vonë si departament i veçantë në përbërje të QS, duke arritur të ketë një personel prej gjashtë punonjësish shkencorë e ndihmës, krahas një numri të konsiderueshëm bashkëpuntorësh të jashtëm. Në këtë sektor/departament prof. N. Pojani ka mbajtur vazhdimisht detyrën e drejtuesit, dhe e ka patur aty një bashkëpunim të frutshëm me kolegët, çka do të konkretizohej edhe në ngritjen e vazhdueshme profesionale, inxhinierike e shkencore, si dhe në rezultatet pozitive në punë.

Specializim jashtë vendit dhe mbrojta e disertacionit

Në periudhën 1983-1984 prof. N. Pojani kreu një specializim 12-mujor në Shkollën Qendrore të  Parisit (ECP), Francë. Pas kthimit në Tiranë, përgatiti disertacionin për gradën shkencore “Kandidat i Shkencave” me temë: “Mbi vlerësimin e forcave sizmike dhe llogaritjen në sizmicitet të ndërtesave shumëkatëshe me skelet prej betoni të armuar”, mbrojtur në vitin 1986 (gradë që u konvertua në “Doktor i Shkencave” më 1993).

Në vitin 1998, prof. N. Pojani qendroi në Shkollën Nacionale të Rrugëve dhe Urave - Paris për katër muaj, për marrje përvoje mësimore-shkencore.

Prof. dr. Niko Pojani ka kryer gjithashtu specializime edhe në disa vende europian, si: në Greqi (Universiteti Teknik i Athinës, Laboratori i Inxhinierisë Sizmike, 4 muaj, më 1990 dhe 1997), në Maqedoni (Instituti i Inxhinierisë Sizmike, 3 muaj, më 1995), etj., si dhe në SHBA (Universiteti i Kalifornisë në Berkeley, 1 muaj, më 2004). Në periudha të ndryshme ka patur gjithashtu bashkëpunime dhe vizita pune në universitete dhe institucione të tjera mësimore-shkencore të vendeve europiane, si: Itali, Gjermani, Angli, Rumani etj.

Njohuri të gjuhëve të huaja: frëngjisht, italisht, anglisht dhe rusisht.

Aktivitete tekniko-shkencore në projekte kombëtare, rajonale dhe ndërkombëtare

Prof. dr. Niko Pojani gjatë viteve 1986-1991, me kolegë të tjerë të sektorit si dhe të institucionit (QS) e në bashkëpunim me institute shkencore dhe studimore-projektuese të fushës së ndërtimit, duke u bazuar në përvojat e përparuara europiane dhe botërore punoi për përmirësimin e rregullave teknike të projektimit të ndërtimeve antisizmike në Shqipëri si dhe metodikat e aplikimit të tyre, për mbrojtjen sa më efektive të ndërtimeve nga tërmetet. Gjatë kësaj periudhe, prof. N. Pojani ishte angazhuar edhe në realizimin e disa aktiviteteve tekniko-shkencore në vend duke marrë pjesë aktivisht në projekte kombëtare, rajonale dhe ndërkombëtare të fushës. Në atë periudhë janë realizuar edhe disa analiza inxhinierike me vlera shkencore mbi pasojat e tërmeteve në Shqipëri.

Rikthimi si pedagog efektiv në Fakultetin e Inxhinierisë së Ndërtimit (FIN) në UPT

Në vitin 1991 prof. N. Pojani rikthehet si pedagog efektiv në Fakultetin e Inxhinierisë së Ndërtimit (FIN) – pjesë ky tashmë e Universitetit Politeknik të Tiranës (UPT) - por pa i shkëputur lidhjet me Qendrën Sizmologjike, ku ka kontribuar edhe si anëtar i këshillit shkencor. Në FIN, veç lëndës ”Statika e strukturave” është angazhuar si lektor edhe në lëndën ”Dinamika e strukturave” (përfshirë ”Inxhinierinë sizmike”), e cila kishte filluar të jepej në FIN për herë të parë nga prof. N. Pojani në vitin 1986. Në vitin1987, si bashkautor kryesor del edhe botimi i parë në shqip i kësaj disipline shkencore (ribotuar në vitin 2002). Ndërkohë, në vitin 1991 del gjithashtu një botim i ri në shqip i ”Statikës së strukturave” (me prof. N. Pojanin si një nga bashkautorët), ku janë pasqyruar zhvillimet dhe arritjet e reja që kishte njohur kjo disiplinë gjatë njëzet viteve të fundit.

Në vitin 1992 prof. N. Pojani fitoi titullin  shkencor “Docent”, kurse në vitin 1997 fitoi titullin akademik “Profesor”.

Prof. N. Pojani, pjesë e trupit diplomatik në Ambasadën e Shqipërisë në Romë

Prof. N. Pojani në periudhën 1993 - 1995 punoi si pjesë e trupit diplomatik të Ambasadës të Shqipërisë, në Romë, Itali.

Rikthimi në Fakultetin e Inxhinierisë së Ndërtimit (FIN) në UPT

Pas rikthimit në FIN, UPT, në vitin 1995, në periudhën vijuese, nga viti 1995 deri në vitin akademik 2019-2020 vazhdoi pa ndërprerje punën mësimore-shkencore si pedagog në FIN. Gjatë asaj periudhe, nëpërmjet projekteve të ndryshme bëhet nismëtar për të krijuar, sidomos në fushën e Inxhinierisë Sizmike, kontakte, vizita pune reciproke dhe bashkëpunime me vlerë të FIN-it me institucione mësimore-shkencore analoge në botë.

Prof. Niko Pojani udhëheqës shkencor për punime të diplomave, temave të masterit dhe disertacioneve

Prof. Niko Pojani ka udhëhequr një numër të konsiderueshëm punimesh të diplomave, të nivelit Master shkencor si dhe një sërë doktoraturash të orientuara në fushën e Shkencës së konstruksioneve në përgjithësi dhe të Inxhinierisë Sizmike në veçanti. Ndër to ka patur edhe punime  cilësore të kryera prej kandidatëve Master dhe Doktor i shkencave nga Fakulteti i Inxhinierisë së Ndërtimit të Universitetit të Prishtinës, me të cilin prof. Niko Pojani ka filluar bashkëpunime që nga viti 1995.

Studimet dhe punimet  shkencore të prof. Niko Pojanit janë paraqitur në auditorë, lektoriume, seminare, simpoziume dhe konferenca kombëtare, rajonale dhe ndërkombëtare, disa prej të cilave të organizuara në Kosovë. Midis të tjerave përmendim një ligjëratë të hapur, mbajtur në dy seanca në prill 2023, në Fakultetin e Inxhinierisë së Ndërtimit të Prishtinës, me tematikë përdorimin e tenzorëve dhe matricave në Mekanikën e materialeve, e cila u mirëprit dhe vlerësua nga auditori.

Detyra udhëheqëse në Fakultetin e Inxhinierisë së Ndërtimit (FIN) në UPT

Në vitin 1992 prof. N. Pojani është emëruar  zv/dekan i FIN dhe përgjegjës i Departamentit të Mekanikës së Strukturave (DMS), i cili u krijua mbi bazën e ish-katedrës të “Rezistencës së Materialeve”.

Gjatë periudhën 1996-2008 ishte anëtar i Senatit të UPT (gjatë mandatit 2003-2008 - n/kryetar i tij);

Gjatë periudhën 1998-2000 dhe 2003-2008 ishte përsëri përgjegjës i Departamentit DMS, duke mbajtur gjatë viteve 1998-2007 edhe detyrën, si bashkëpuntor i jashtëm, e përgjegjësit të Departamentit të Inxhinierisë së Tërmeteve (Inxhinierisë Sizmike) në Institutin e Sizmologjisë;

Një kohë të shkurtër gjatë vitit 2000 ka kryer detyrën e dekanit të FIN;

Gjatë periudhës 2007-2009 është zgjedhur krye-redaktor i revistës “Buletini i Shkencave Teknike” - UPT;

Nga viti 2008 e deri në pension - anëtar i Këshillit të Profesorëve, FIN;

Gjatë periudhës 2008-2012, anëtar i Këshillit të Administrimit, UPT.

Nga viti 2001 deri 2019, anëtar i Komitetit Kombëtar të Digave të Mëdha (KKDM) të Shqipërisë ose i Këshillit Teknik të tij;

Nga viti 2006 deri 2013, anëtar i Komisionit të Vlerësimit të Titujve Akademikë (KVTA), organ vendimmarrës pranë Ministrisë së Arsimit dhe Shkencës;

Në periudhën e viteve ‘2010 ka qënë anëtar i Këshillit të Profesorëve të Universitetit “Epoka”- Tiranë.

Gjatë punës së tij shumëvjeçare me dijen dhe përvojën e tij prof. Niko Pojani ka kontribuar edhe në komisione, këshilla teknike e shkencore në institucione të tjera të vendit.

Veprimtaria e gjerë botuese e prof. Niko Pojanit

Prof. Niko Pojani, ka një veprimtari të gjerë si autor dhe bashkautor, duke botuar një sërë artikujsh teknikë dhe shkencorë në revista, buletine të vendit dhe të huaja.

Prof. Niko Pojani me bashkautorë ka botuar pesëmbëdhjetë tekste universitare dhe dispensa shkencore-inxhinierike. Nga këto tekste, njëri u përgatit në bashkëpunim me kolegun e paharruar Prof. dr. Musa Stavilecin (Prishtinë), kurse një tjetër (në proces botimi) ka të njëjtën tematikë me atë të ligjëratës të sipër-përmendur në FIN-Prishtinë (përdorimi i tenzorëve) është përgatitur në katër vitet e fundit, në bashkëpunim me kolegët nga Prishtina: Prof. asoc. Misin Misini dhe Prof. asoc. Arton Dautaj.

Një botim i rëndësishëm është libri me katër vëllime ”Teoria e strukturave” (viti 2016), ku janë trajtuar të tri drejtimet kryesore të kësaj shkence: “Statika”, “Qendrueshmëria (Stabiliteti)” dhe “Dinamika e strukturave”, duke përfshirë si pjesë të veçantë edhe “Inxhinierinë sizmike”.

Prof. Niko Pojani ka patur interes edhe për historinë e shkencave të ndërtimit dhe ka botuar në 2013 librin me dy vëllime: ”Shkenca e konstruksioneve përgjatë historisë të saj”.

Përveç librave, numërohen me dhjetëra artikuj të publikuar në revista, buletine dhe përmbledhje studimesh, në Shqipëri dhe jashtë vendit. Disa prej artikujve, gjithashtu janë në bashkautorësi me kolegë të Kosovës (Misin Misini, Florim Grajçevcin dhe Feti Selmanin). Ndërkaq, një punim i përbashkët me prof. Shyqyri Aliaj (Tiranë) i vitit  2002, është botuar në revistën ”Ndërtuesi” (Shqipëri), ka patur për  tematikë analizën sizmo-tektonike dhe inxhinierike të tërmetit të Gjilanit të 24 prillit 2002. Punimi është botuar edhe në gjuhën angleze në përmbledhjen e një Konference ndërkombëtare mbi Inxhinierinë sizmike, gusht 2003, me titull: “ The Gjilan Earthquake of April 24, 2002”, Proc. of Intl. Conference on “Earthquake Engineering in 21^st Century”, Skopje and Ohrid, August 2003, Maqedoni e Veriut.

Prof. dr. Niko Pojanit, kontributor i rëndësishëm në adoptimin e rregullave teknike bashkëkohore europiane të analizës dhe projektimit në fushën e ndërtimit

Një ndër objektivat kryesore të punës së prof. dr. Niko Pojanit ka qënë adoptimi i rregullave teknike bashkëkohore europiane të analizës dhe projektimit në fushën e ndërtimit, më konkretisht adoptimin për projektimin në Shqipëri të paketës së Eurokodeve strukturorë dhe në veçanti të Eurokodit 8, që trajton strukturat rezistente ndaj tërmeteve. Në këtë kuadër, prof. Niko Pojani ka qënë autor/bashkautor dhe nismëtar i mjaft punimeve dhe aktiviteteve të rëndësishme mbi Eurokodet dhe Inxhinierinë Sizmike të realizuara nga viti 2000 e në vazhdim.

Moment i rëndësishëm i veprimtarisë së prof. dr. Niko Pojanit ka qënë veçanërisht përgatitja dhe botimi prej tij si material mësimor, teorik dhe aplikativ në ndihmë të projektimit, i librit “Inxhinieria Sizmike” (viti 2003). Ky publikim vinte pas një libri të mëparshëm me të njëjtën tematikë, të titulluar “Veprimi i tërmetit mbi konstruksionet e ndërtimit”, botuar në Tiranë më 1982 nga Akademia e Shkencave (me prof. Niko Pojanin autor kryesor). Por “Inxhinieria Sizmike” e vitit 2003 përmban një material  mjaft më të plotë dhe të azhurnuar me të rejat e kësaj fushe, më konkretisht me përcaktimet dhe kërkesat e versioneve të kohës të Eurokodit 8. Libri ka shërbyer dhe shërben për ngritjen e kulturës sizmike, jo vetëm të studentëve por edhe të inxhinierëve projektues konstruktorë, dhe është e mirëpritur nga komuniteti inxhinierik në Shqipëri dhe në Kosovë. Kontributet e prof. Niko Pojanit në këtë fushë vazhduan me efektivitet edhe gjatë vitit 2010 kur është angazhuar si pjesë e një ekipi pune të ngritur pranë kompanisë konsulente UTS-01 - Tiranë, në realizimin e komponentit III “Rishikimi dhe përmirësimi i kodeve të ndërtimit në Shqipëri” të projektit “Përballimi dhe mbrojtja nga fatkeqësitë”, menaxhuar nga Ministria e Brendshme dhe financuar nga Banka Botërore. Një arritje e rëndësishme e ekipit ka qënë edhe organizimi i seminareve trajnues mbi zbatimin e Eurokodeve, sidomos të Eurokodit 8, duke patur për auditor komunitete inxhinierike nga të gjitha prefekturat e Shqipërisë. Produktet e ekipit, krahas dhe atyre të ekipeve të tjera që u angazhuan me Eurokodet, shërbyen efektivisht për arritjen e objektivit të adoptimit të tyre në Shqipëri.

Vlerësime për rezultatet mësimore e shkencore-inxhinierike

Në vazhdim po paraqesim disa nga vlerësimet për prof. dr. Niko Pojanin:

Me rastin e 55-vjetorit të krijimit të Institutit të Lartë Politeknik – Tiranë, në vitin 2006 prof. Niko Pojani nderohet me “Pllakë Mirënjohje” për “Kontribut në Zhvillimin e Arsimit të Lartë Inxhinierik”;

Në vitin 2013, në kuadrin e aktiviteteve të një Konference shkencore ndërkombëtare në fushën e Inxhinierisë së Ndërtimit i jepet një “Certifikatë Vlerësimi” (“Certificate of Appreciation”) nga Universiteti “Epoka” – Tiranë;

Në vitin 2018, me rastin e 35-vjetorit të Fakultetit të Inxhinierisë së Ndërtimit - Tiranë i jepet “Certifikatë Mirënjohje” me motivacionin ”Për kontribut të shquar në mësimdhënie dhe kërkim shkencor”.

Prof. dr. Niko Pojani, autor dhe bashkautor në libra dhe tekste universitare e shkencore-inxhinierike

Në vijim paraqiten  tituj të teksteve universitare e shkencore-inxhinierike të publikuara, me autor/bashkautor Prof. dr. Niko Pojani:

Pojani, N.; Softa, F.: “Probleme të Mekanikës së Ndërtimit”, Botues: SHBLSH, Tiranë, 1980;

Pojani, N.; Poloska, R.: “Veprimi i tërmetit mbi konstruksionet e ndërtimit”, Botues: ASHSH, Tiranë, 1982;

Skënderi, S.; Lako, N.; Pojani, N.; Softa, F.: “Teoria e strukturave - Statika”, Botues: SHBLU, Tiranë, 1991;

Pojani, N. etj. (Grup autorësh): “Udhëzues metodik për llogaritjen në sizmicitet të konstruksioneve ndërtimore”, në 5 (pesë) pjesë, Botues: ASHSH dhe MN, Tiranë, 1990-1991;

Pojani, N.; Myslimaj, B.: “Teoria e strukturave – Dinamika - Shëmbuj dhe Ushtrime” (botimi II), Botues: SHBLU, Tiranë, 2001;

Pojani, N.: “Shembuj numerikë në Statikën e strukturave”, Botues: SHBLU, Tiranë, 2001;

Pojani, N.; Lako, N.: “Teoria e strukturave – Dinamika”, Botimi II” (botimi I në vitin 1987), Botues: SHBLU, Tiranë, 2002;

Pojani, N. : “Inxhinieria sizmike”, Botues: “Toena”, Tiranë, 2003;

Pojani, N. ; Stavileci, M.: "Metoda e Elementëve të Fundëm në Mekanikën e Stukturave", Botues: Universiteti i Prishtinës, FN, Prishtinë, m 2006);

Hoffer, R.; Pojani, N. (editors): “Proceedings of Vlora Workshops: I.–For Young Engineers; II. – Harmonizing in Teaching”, DAAD-DYNET Programme, Tirana, 2006;

Pojani, N.; Cullufi, H.; Lako, N.; Baballeku, M.; Luka, R.: “Metodat energjitike në Statikën e strukturave”, Bo0ues: “Toena”, Tiranë, 2009;

Pojani, N.; Baballëku, M. etj. (Ekip pune pranë kompanisë konsulente UTS-01, Tiranë): “Pjesë të adoptuara nga Eurokodet strukturore, në veçanti nga Eurokodi 8, dhe një material  trajnues për aplikimin e tyre në ndërtesat prej betoni”, Drejtoria e Përgjithshme e Standardeve - DPS, Tiranë, 2010;

Pojani, N.; Baballëku, M.; Luka, R.: “Analiza matricore e strukturave”, Botues: “Pegi”, Tiranë, 2013;

Pojani, N.: “Shkenca e Konstruksioneve përgjatë historisë të saj”, në dy vëllime, Botues: “Toena”, Tiranë, 2013;

Pojani, N.; Lako, N.; Baballëku, M.; Luka, R.: “Teoria e strukturave”, në katër vëllime, Botues: “Toena”, Tiranë, 2016;

Pojani N.; Misini, M.; Dautaj, A.: “Tenzorët kartezianë dhe matricat në Mekanikën e Materialeve dhe Teorinë e Elasticitetit”, Universiteti i Prishtinës FN, (në proces botimi), Prishtinë, 2026.

Disa artikuj shkencorë të botuar me autor/bashkautor Prof. dr. N. Pojani

Në vijim paraqiten tituj të disa artikujve dhe punimvee shkencore të të publikuara, me autor/bashkautor Prof. dr. Niko Pojani:

Pojani, N.; Lako, N.; Nano, F.: “The employement of mode superposition method in earthquake response problem of structures”, Proceedings of the Seminar on Earthquake Risk Reduction in the Balkan Region, UNDP Project – RER/79/014, Working Group E, Skopje – Macedonia, March 1982, pp. 236-240, Skopje, 1982.

Pojani, N.; Bozo, L.; Lako, N.; Myslimaj, B.: “Mbi përcaktimin e kurbave të koeficientit dinamik për llogaritjen në sizmicitet të konstruktcioneve të ndërtimit”, Buletini i shkencave teknike, Nr.3, f. 45-58, Universiteti Politeknik, Tiranë, 1987.

Pojani, N.; Myslimaj, B.; Prodani, E.: “Mbi ndikimin e ngurtësisë së rigelave në reagimin sizmik të ramave plane”, Buletini i Shkencave Teknike Nr. 1, f. 47-60, Universiteti i Tiranës, Tiranë, 1988;

Pojani N.; Lako, N.: “Parameters on the design seismic loading according to the provisional aseismic rules - Response spectra – Design seismic loading- Constructions of silos”, RER/85/002 Earthquake Risk Reduction Network in the Balkan Region Project, Task Group 6A, Sofia, May 1991, pp. 58-74, Sofia, 1991;

Pojani, N.; Softa, F.: “Some preliminary evaluation of seismic risk in Tirana city”, Proceedings of XI European Conference on Earthquake Engineering - ECEE, Paris - France, September 1998 (abstact, p. 495), 5 pages, Paris, 1998;

Pojani N.: “Discussion on free vibrations of bridges”, Albanian Journal Nat.&Techn. Sciences - AJNTS (4), pp. 109-112, Academy of Sciences, Tirana, 1998;

Pojani, N.: “Some aspects of the possible adoption of EC8 in Albania”, Albanian Journal of Natural & Technical Sciences - AJNTS (1), pp. 125-130, Academy of Sciences, Tirana, 2001;

Pojani, N.; Baballëku, M.: “Veçori të aplikimit të analizës sizmike të ndërtesave sipas konceptimeve dhe standardeve të sotme europiane”, Buletini i Shkencave Teknike Nr. 1, f. 55-65, Universiteti Politeknik, Tiranë, 2005;

Pojani N.; Baballëku, M.; Luka, R.: “On the application of seismic analysis procedures related to the EC-8 requirements 8”, pp.377-393, Acta Geodaetica et Geophysica Hungarica - A Qurterly of the Hungarian Academy of Sciences, ISSN 1217-8977, Akademia Kiado, Vol. 41, Nr. 3-4, Budapest, September 2006, Budapest, 2006;

Baballëku, M.; Pojani, N.: “Fragility evaluation of existing typified school buildings in Albania”, Acta Geodaetica et Geophysica Hungarica - A Qurterly of the Hungarian Academy of Sciences, ISSN 1217-8977, Akademia Kiado, Vol. 43, Nr. 2-2 (18 pages), June 2008, Budapest, 2008;

Misini, M.; Pojani, N.: “Reagimi sizmik i sistemit truall-strukturë.” [Seismic Reaction of Soil-Structure Systems], Revista: “Kërkime”, f. 105-116, ASHAK, Prishtinë, 2010.

Përfundime

Profesor dr. Niko Pojani, gjithmonë pedant, siç i ka hije një punonjësi të  mirëfilltë universitar, i etur për dituri, pedagog i zoti dhe i aftë në mësimdhënie në fushën e ndërtimit. Drejtues e vizionar në udhëheqje të institucioneve arsimore dhe shtetërore. Njeri përherë me buzëqeshje, i dashur, korrekt, i drejtë gjatë vlerësimit të punimeve të studentëve, i afërt me studentë, komunikues, pozitiv dhe i gatshëm për të këshilluar studentët dhe kolegët, parimor dhe i përkushtuar ndaj profesionit. Gjatë punës me studentë, deri në pensionim, dallohej për kompetencë të shumanshme, takt pedagogjik, dhe në qartësimin e lëndëve mësimore dhe të projekteve të ndryshme profesionale-shkencore. Studentë i edukoi me dashurinë e shpirtit dhe durimin e karakterit, me shembullin vetjak të një jete të pastër qytetare, me autoritetin e vetvetishëm që rridhte nga niveli kulturor e pedagogjik.

Puna dhe rezultatet mësimore e shkencore-inxhinierike të arritura nga prof. Niko Pojani në fushën e Shkencës së konstruksioneve dhe Inxhinierisë Sizmike janë vlerësuar nga studentët dhe kolegë të shumtë, si edhe nga institucionet ku ka punuar apo bashkëpunuar me përkushtim.

Prof. Niko Pojani njihet dhe vlerësohet si pedagog i shkëlqyer, autor dhe bashkautor me kolegë në Tiranë e Prishtinë, me botime të teksteve universitare dhe artikujve shkencorë në vend dhe në botën e jashtme.

Prof. Niko Pojani ka dhënë kontribute të rëndësishme  për adoptimin e Eurokodeve strukturorë, të cilët tashmë aplikohen gjerësisht në fushën e ndërtimit në Shqipëri.

Tekstet univeristare dhe shkencorë të botuara nga Prof. dr. Niko Pojani janë vlerësuar gjerësisht nga studentë, inxhinierë e pedagogë të Inxhnierisë së ndërtimit.

Bibliografia

Pojani, N.; Softa, F.: “Probleme të Mekanikës së Ndërtimit”, Botues: SHBLSH, Tiranë, 1980;

Pojani, N.; Poloska, R.: “Veprimi i tërmetit mbi konstruksionet e ndërtimit”, Botues: ASHSH, Tiranë, 1982;

Skënderi, S.; Lako, N.; Pojani, N.; Softa, F.: “Teoria e strukturave - Statika”, Botues: SHBLU, Tiranë, 1991;

Pojani, N.; Myslimaj, B.: “Teoria e strukturave – Dinamika - Shëmbuj dhe Ushtrime” (botimi II), Botues: SHBLU, Tiranë, 2001;

Pojani, N.: “Shembuj numerikë në Statikën e strukturave”, Botues: SHBLU, Tiranë, 2001;

Stavileci, M.; Pojani, N.:“Metoda e Elementëve të Fundëm në Mekanikën e strukturave”, Universiteti i Prishtinës, FN, Prishtinë, 2006;

Pojani, N.; Baballëku, M.; Luka, R.: “Analiza matricore e strukturave”, Botues: “Pegi”, Tiranë, 2013;

Pojani, N.: “Shkenca e Konstruksioneve përgjatë historisë të saj”, në dy vëllime, Botues: “Toena”, Tiranë, 2013;

Pojani, N.; Lako, N.; Baballëku, M.; Luka, R.: “Teoria e strukturave”, në katër vëllime, Botues: “Toena”, Tiranë, 2016