Florim Zeqa: President me 'rotacion' për zgjidhjen e 'Nyjes Gordiane'!

President me 'rotacion' për zgjidhjen e 'Nyjes Gordiane'!

Sikurse në të kaluarën e shekullit 19-të, edhe tani Kosova është në rrezik që të kthehet në figurë shahu dhe monedhë për kusuritje në tavolinën e fuqive të mëdha për ndaljen e luftërave shkatërrimtare!

Të ndalen abuzimet me mërgimtarët

Kombi shqiptarë akoma po vuan nga plaga e vjetër e ndarjeve të trojeve etnike, ku më tepër se gjysma tyre ende janë nën sundimin e shteteve fqinjë!

Bashkësia ndërkombëtare e di mirë faktin se Kosova është një vend i vogël me shumë plagë nga lufta e fundit çlirimtare.

E di mirë se Kosova dhe shqiptarët kanë kaluar nëpër të gjithë rrathët e ferrit për të ardhur deri tek liria. Kanë përjetuar maltretime dhe dhunë sistematike, burgje, dëbime, masakra, varreza masive, shtëpi të djegura e familje të shpërndara gjithandej botës në kërkim të shpresës për një jetë më të mirë!

E di mirë se dy shtetet shqiptare, Shqipëria dhe Kosova nuk po bëjnë asgjë për riatdhesimin e bashkombasve të tyre!

E di mirë edhe si i trajtojnë bashkatdhetarët me përbuzje, "erdhën këta të jashtit", por jo edhe në fushata zgjedhore, të cilët i përdorin si "mish për topa" (numra për vota) të partive politike!

E di mirë se ështu bëjnë dhe veprojnë politikanët e papërgjegjshëm të dy shteteve shqiptare!

Shtetet shqiptare në prag të pushimeve verore bëjnë lojë me mërgimtarët duke organizuar maskarada mashtruese siq është i ashtuquajturi "Samiti i Diasporës" në Tiranë apo "Mirë se vini bashkatdhetarë" në Kosovë!

Qeveritarët në Prishtinë për çdo vjet për tre ditë rresht po i hapin dyert e Parlamentit për mërgimtarët, por kësaj radhe më mirë të mos i kishin hapur fare, çfarë përjetuan dhe panë bashkatdhetarët!

Një shtet i fituar me luftë rrezikon të humbet në paqe

Kur sakrifica dhe gjaku i derdhur për liri përdoret për interesa personale, atëherë ndodhë vrasja e dytë nga politikanët e atyre që ranë në altarin e lirisë!

Dëshmorët dhe martirët po përdorën nga politikanët vetëm gjatë fushatave zgjedhore, kurse familjarët e tyre i kanë lënë në harresë të plotë!

Kjo për më tepër se padrejtësi, paraqet abuzim me ata që ranë në altarin e lirisë.

Asnjëherë nuk duhet harruar se liria është amanet i dëshmorëve, kurse invalidët që lanë gjymtyrët e trupit në fushat e betajave janë testament i lirisë dhe pavarësisë së fituar me gjak dhe sakrifica të panumërta!

Një pjesë e politikanëve të sotëm shtetin e trajtojnë si pronë të partisë, Kuvendin arenë gladiatorësh për hakmarrje politike, kurse qeverinë si trofe të fitores së pamerituar, duke e trajtuar shtetin si plaçkë lufte e jo si atdhe të tyre!

Diskriminimi shoqëror e dëshmon se shtetarët nuk janë të barabartë për të gjithë qytetarët e vendit!

Si pasojë e kësaj, shteti për dikë është bërë nënë e për dikë tjetër njerkë!

Nënë për të pamerituarit që nuk kanë dhënë asgjë nga vetja e tyre për lirinë e vendit, kurse njerkë për ata që kanë lënë pjesët e trupit në fushat e betejave të lavdishme çlirimtare!

Të marrin fund barrikadimet në Kuvend

Ngërçi politik është është kthyer lak në fyt për shtetin e Kosovës, ku pas çdo procesi zgjedhor, pavarësisht rezultatit, partitë në vend të formimit të institucioneve, po barrikadohet kundrejt njëra-tjetrës, duke e kthyer rivalitetin politik në armiqësi që po i ndan dhe përqan qytetarët.

Marrëveshja politike për zgjedhjen e Presidentit është kthyer në 'Nyje Gordiane' mes liderëve të partive politike!

Sa më shumë kohë e humbur aq më i mundimshëm po bëhet pazari politik për postin e Presidentit!

Meqë në karrigën e Presidentit nuk ka vend për të gjithë në të njëjtën kohë, do të ishte mirë të gjendet një zgjidhje përmes 'rotacionit', që në çdo gjashtë muaj të ndërrohen Presidentët për kënaqjen e egove personale, e cila mbase do t'na çonte në paqe sociale edhe mes komuniteteve tjera jo shqiptare!

Ndryshe nuk po shihet fundi i zgjidhjes së 'Nyjes Gordiane'!

Qytetarët e lodhur dhe të frustruar nga zgjedhjet e shpeshta, gjithnjë e më shumë janë duke i bojkotuar proceset zgjedhore!

Pas zgjedhjeve të 7 qershorit, rezultati ishte 64:36 në favor të bojkototit!

Kush e di, sa do të ngritet kjo distancë në zgjedhjet e 27 dhjetorit!

Të shtrihet dora e pajtimit

Përderisa partitë politike që kanë marrë besimin e qytetarëve për përfaqësimin e tyre në Parlament, nuk po arrijnë dot të ulen në tavolinën e bisedimeve për gjetjen e zgjidhjes optimale, qoftë edhe përmes 'rotacionit'!

Në të kundërtën, distanca mes bojkotit qytetar dhe militantëve partiakë do të ngritet akoma më lartë, saqë zgjedhjet përfundimisht do ta humbin kuptimin!

Përderisa partitë politike nuk binden se rivaliteti politik është vlerë e demokracisë e jo armiqësi, shteti i Kosovës rrezikon të rrëshqas në anarki!

Zgjidhjen e ngërçit politik duhet kuptuar si fitore për Kosovën, e jo kush do të fiton më shumë e kush tjetër më pak nga marrëveshja politike!

Kompromisi mes forcave politike për Presidentin duhet të bëhet për shtetin e jo për intersa partiake, klanore apo personale!

Zgjatja e dorës së pajtimit mes forcave politike nuk e poshtëron partinë fituese dhe as nuk i ulë më poshtë partitë humbëse, por e forcon shtetin dhe rritë besimin e qytetarëve në institucionet e shtetit.

Një gjë duhet ta kuptojmë të gjithë, liria e Kosovës është produkt i një rezistence të gjatë paqesore dhe e një lufte të lavdishme çlirimtare, por edhe meritë e ndihmës së madhe dhe të pakursyer të bashkësisë ndërkombëtare, të cilën jemi duke e zhgënjyer me veprimet tona!