Gjon Keka: Gjergj Kastrioti, i vetmi që diti të bëjë, të mbajë shtet dhe ta bëjë atë me famë

Gjergj Kastrioti, i vetmi që diti të bëjë, të mbajë shtet dhe ta bëjë atë me famë

Vetëm kryeheroi, strategu dhe burrështetasi i papërsëritshëm i Arbërisë, Gjergj Kastrioti (Skënderbeu), ka arritur që me urtësi, trimëri e vizion të bëjë shtet, ta mbajë shtetin dhe të ruajë aleanca të natyrshme strategjike, sikur ishin ato me Huniadin, Alfonsin e Aragonit, me Papët e kohës etj.

Ai nuk doli të kërkonte vota, as të premtonte asgjë, por erdhi si një shpëtimtar për ta bërë atdheun e tij të lirë, të pavarur dhe me famë në mbarë kontinentin europian të kohës dhe në botë, duke mbetur në analet e historisë si një shembull i papërsëritshëm i trimërisë, burrështetit dhe i mbrojtësit të civilizimit të përbashkët europian.

Dëshmia më e mirë se ai e kishte miratimin e popullit të tij ishte ajo kur ai nënvizoi fjalët: „Lirinë nuk ua solla unë, atë e gjeta në mesin tuaj...“. Kjo ishte vota mbështetëse për të, sepse arbërorët e kohës së tij e kishin lirinë në zemrat dhe mendjet e tyre dhe e kishin ndarë mendjen që në krye të vendit ta zgjidhnin shpëtimtarin dhe arkitektin e Arbërisë europiane, atë që do ta ngrinte flamurin me shqiponjë në dritën e diellit të ri të fitoreve dhe lavdisë së veprave të pavdekshme për të mirën e Arbërisë dhe Europës.