Selman Etemi: Në njëvjetorin e zbulimit të bustit të Azem Bejtës në Grabanicë të Klinës

2h më parë

NË NJËVJETORIN E ZBULIMIT TË BUSTIT TË AZEM BEJTËS NË GRABANICË TË KLINËS

Shkruan: Selman Etemi

Kur dëshira e kahershme bëhet e realizuar, qetësia shpirtërore mbledh në vete të gjitha ato kujtime, qofshin edhe ato që na rënduan dhe na munduan në kohë. Tani ato më bëjnë krenar që, bashkë edhe me të tjerët, i kemi dëshmi të një rezistence të pathyeshme në kohë dhe rrethana të caktuara.

Sikur me stuhitë dhe rrebeshet e luftës me të cilat u përball heroi i kombit Azem Bejta, edhe ne ishim në përballje për mbrojtjen e emërtimit të shkollës në Grabanicë me emrin e tij. Këtë dëshirë ia kisha vënë vetes obligim që patjetër kjo vatër e diturisë ta ketë bustin e këtij heroi, flakadan i çlirimit dhe bashkimit të trojeve shqiptare.

Një vit para se të vendosej busti, shfaqa idenë dhe gatishmërinë që busti i këtij heroi të bëhej realitet. Këtë ua paraqita edhe përfaqësuesve të komunitetit të fshatit Grabanicë, kryesisht Sejdi Balecit dhe të tjerëve, me të cilët bashkëvepruam edhe gjatë viteve të stuhishme të ’90-ave, sidomos për mbijetesën e shkollës në atë kohë.

Një ide e tillë iu komunikua edhe drejtorit aktual të shkollës, i cili në parim u pajtua të angazhohej, por duke thënë se “në këtë vit (2025) nuk mund të besoj se do ta kremtojmë Ditën e shkollës, sepse i kemi disa prioritete”.

Fillimisht parashtruam kërkesën me shkrim tek organet komunale, ku Asambleja e miratoi dhe na u lejua vendosja e bustit në shkollën e Grabanicës.

Pas kontaktit me skulptorin e njohur Ylber Krasniqi, u përcaktuan format e punës dhe kostoja e përafërt (7000 deri 9000 euro).

Filloi grumbullimi i mjeteve financiare nga qytetarët e Grabanicës. Për këtë u autorizuan përfaqësuesit e fshatit: Sejdi Baleci, Halil Sahiti dhe të tjerë.

Me kalimin e kohës, faktori komunal, e sidomos Drejtoria Komunale e Arsimit me në krye drejtorin Qemajl Sejdija, shprehu gatishmërinë që punimi i bustit të financohej nga komuna.

Falë angazhimit të përfaqësuesve të fshatit Grabanicë, të gjitha punët u kryen me sukses dhe në kohë, dhe busti u bë gati për t’u vendosur më 15 maj 2025, datë që tradicionalisht shënon Ditën e shkollës që nga viti 1972.

Shumë ngjarje lidhen me këtë datë; edhe përkundër pengesave dhe kërcënimeve gjatë kohës së okupimit, kjo ditë është kremtuar. Pikërisht më 15.05.1992, heroi i kombit Tahir Berisha, pas një përballjeje me policinë serbe, më vonë vrau një polic dhe plagosi tjetrin, ndërsa vetë ra në altarin e lirisë.

Megjithatë, zbulimi i bustit u bë në mënyrë madhështore, falë qytetarëve, nxënësve dhe faktorit përkatës të shkollës dhe komunës, me pjesëmarrje dinjitoze.

Falënderojmë të gjithë ata që kontribuuan në realizimin e këtij projekti me përmasa historike. Falënderoj qytetarët e Grabanicës që ndihmuan financiarisht, ndonëse në fund, me vendim të përfaqësuesve të lokalitetit, mjetet e grumbulluara u përdorën për organizimin e drekës për pjesëmarrësit në restaurantin “Gëzimi” në Klinë, si dhe për disa shpenzime organizative.

Mendoj se, sadopak, e kryem një obligim ndaj heroit tonë Azem Bejta.

Zbulimi i bustit u bë më 23.05.2025, në oborrin e shkollës “Azem Bejta” në Grabanicë të Klinës.

Kjo shkollë, për shumë dekada, e ka mbajtur me krenari këtë emër, por një bust i tillë na mungonte. Tani e realizuam këtë dëshirë dhe nevojë të domosdoshme.

Do të doja të isha edhe më modest në këtë prezantim, sikur të theksohej nga organet zyrtare të shkollës apo komunës se me iniciativën e kujt filloi ndërtimi i bustit dhe kush e udhëhoqi gjithë procedurën deri në përurim, sepse akti solemn nuk do të thotë përvetësim i gjithë procesit.

Ne (unë dhe përfaqësuesit e fshatit Grabanicë) nuk e bëmë për lavdi personale, por për nderimin e heroit të kombit Azem Bejta, emër që edhe sot për disa mbetet i papranueshëm.

Pavarësisht disa zërave për devijim apo minimizim të kësaj vepre, projekti u realizua me sukses dhe në mënyrën më të mirë të mundshme.

Pra, shkurt: iniciativën e kam dhënë unë, është përkrahur nga përfaqësuesit e fshatit Grabanicë, është bërë grumbullimi i mjeteve, ndërsa pagesa përfundimtare është marrë përsipër nga komuna, për çka jemi mirënjohës.

Tani me krenari qëndron busti i luftëtarit nacionalist, i cili deri në flijim luftoi për çlirimin dhe bashkimin e trojeve shqiptare.

Urime dhe gëzuar bustin e Heroit të Kombit, shkolla tradicionalisht më e veçantë në Dukagjin dhe më gjerë në kohët më të vështira!

Video: https://www.youtube.com/watch?v=flmKFGWsm1E

Selman Etemi (ish punëtor dhe drejtor i kësaj shkolle si dhe kryetar i LASH-it në Klinë)

12 maj 2026

Dërgoi për botim: Florim Zeqa