Ndue Ukaj: Ibrahim Rugova - “Me varg në shpirt m’çeli pranvera…”

Ibrahim Rugova: “Me varg në shpirt m’çeli pranvera…”

Sot, në promovimin e librit “Poezia shqipe”,  që përmban studimet e Ibrahim Rugovës për poezinë shqipe, të botuara në librat e tij dhe në shtypin e kohës, përgatitur nga Munish Hyseni, fola për krijuesin, që me varg në shpirt e çeli pranvera, për krijuesin që ndër vite u shndërrua në një pranverë të mrekullueshme për kombin shqiptar, frytet e së cilës, janë të mëdha, në kulturë e politikë.

Ibrahim Rugova, fillimet krijuese i nisi si poet, aktivitetin kulmor letrar e vazhdoi si studiues, duke e kurorëzuar si krijuesi dhe ndërtuesi i shtetit të Kosovës.

Në thelb, Rugova ishte një shpirt i bukur poetik, një krijues i ndjeshëm, gjë të cilën e pohonte, kur thoshte se nuk donte të ishte si ballkanasit që vetëm kritikojnë, por donte të krijonte.

Në vitin 1969, ai shkroi poezinë “Vargje e lotë”, ku ka një varg domethënës:  “Me varg në shpirt m’çeli pranvera”. Kjo është edhe poezia e fundit e poetit, që do të bëhet intelektual dhe studiues i madh i poezisë në veçanti dhe letërsisë në përgjithësi.

Ky varg në shpirt me të cilin Rugovën e çeli pranvera, jetoi në jetën e Rugovës deri në fund, duke e bërë veprën e tij një pranverë plot jetë e dritë në jetën kulturore shqiptare.