Hamza Halabaku: Një vizitë e ministres së RSP të Shqipërisë, Tefta Cami

NJË VIZITË E MINISTRES SË RSP TË SHQIPËRISË, TEFTA CAMI 1)

Nga Hamza Halabaku

Edhe më parë, në disa shkrime, kujtime të mia, kam shkruar se, nga maji i vitit 1973 kam qenë i punësuar në Sekretariatin e atëhershëm krahinor për Arsim, Shkencë e Kulturë të Kosovë, si dhe kam përmendur se, për mua, ato ishin vitet më të mira, sepse aty, në atë organ të administratës, në nivel të Kosovës, defilonin emrat më të njohur të arsimit, të kulturës e të shkencës shqiptare në Kosovë dhe jashtë saj.

Kam përmendur emrat, si: Esad Mekuli, Rexhai Surroi, Mehmet Gjevori, Tajar Hatipi, Lorenc Antoni, Prof. dr. Idriz Ajeti, Prof. dr. Ejup Statovci, Abdullah Zajmi, Prof. dr. Ismet Dehiri, Mark Kaçinari, Prof. dr. Esat Stavileci, Shevqet Veliu, Rexhep Hoxha etj.

Gëzohesha shumë, sa herë që këta vinin në zyrën ku punoja, bashkëpunëtor në Pleqësinë e Arsimit të Kosovës. Ata vinin aty për punët e arsimit, të kul­turës po edhe të shkencës.

Aty, në Pleqësinë e Arsimit, bëhej lejimi i për­do­rimit të teksteve e mjeteve mësimore për shkollat fillore dhe të mesme në Kosovë.

Po kur u gëzova më së shumti?!

Pasi në vitin 1979 kisha diplomuar, pa shkë­putje nga puna, në Fakultetin e Drejtësisë të Univer­sitetit të Prishtinës, diku në fillim të vitit 1980, isha avancuar në titullin bashkëpunëtor profesional në Sekretariatin Krahinor për Arsim, Shkencë e Kulturë, një kohë për kulturë fizike e më vonë në titullin bashkëpunëtor profesional për punët admini­strative - juridike dhe të veprimtarisë normative.

Në ditët e para të tetorit të vitit 1980 mora vesh se në organin më të lartë administrativ të Kosovës për çështje të arsimit, shkencës e kulturës, do të vinte një delegacion i Ministrisë së Arsimit e të Kulturës të Republikës Popullore Socialiste të Shqipërisë.

Këtij delegacioni do t’i printe ministrja Tefta Cami.

Më kujtohet kur atë ditë, dikush nga Shërbimi i Protokollit të Kosovës, e hapi derën e paradhomës – kabinetit, si i thoshin atëherë, të sekretarit krahinor për Arsim, Shkencë e Kulturë, Prof. dr. Ymer Jaka. Këtë e vërejta, meqë aty, në paradhomë, në anën e djathtë, unë e kisha vendin e punës, ndërsa në anën e majtë ishte Sllobodanka, sekretarja teknike e Prof. Jakës.

Delegacioni nga Republika Popullore Socialiste e Shqipërisë, me ministren Tefta Cami, në krye, hyri në zyrë. Unë e Sllobodanka u ngritëm në këmbë, ndërsa mua më kaploi një dridhërimë e lehtë zemre! Ishte kjo ndjenjë gëzimi që në atë kohë manifestohej për vizitat nga Shqipëria.

Edhe Prof. dr. Ymer Jaka, bashkë me njeriun e protokollit, kishte dalë në paradhomë, për t’i dëshiruar mirëseardhje ministres Tefta Cami dhe dele­gacionit nga Shqipëria. E para hyri ministrja Tefta Cami.

Kisha shumë dëshirë që edhe unë, sikurse sekre­tari Jaka, që ishte rang ministri i sotëm, ta përshëndesja apo t’i dëshiroja mirëseardhje për dore ministres Cami dhe pjesëtarëve të tjerë të delegacio­nit, por këtë nuk ma lejonte protokolli!

Ministrja Tefta Cami ishte veshur për mre­ku­lli, për kohën e atëhershme. Kishte edhe një kapotë, me që atë tetor bënte ftohtë edhe në Shqipëri, po edhe në Kosovë, të cilën e vendosi në varësen që ishte pas derës së zyrës sonë.

Pos dëshirës për t’i përshëndetur mysafirët, më kishte kapluar edhe kureshtja se për çka po bise­dohej aty brenda, në kabinetin e sekretarit të Arsimit, Shkencës e të Kulturës. Mendoja me vete se, me gjasë, po bisedohej për nxitje të bashkëpunimit dhe shkëmbimit të dyanshëm të përvojave në fushën e dijes e të arsimit, edukimit dhe kulturës.

Po, mua më shkonte mendja, e saktësisht nuk dija për asnjë fjalë që është biseduar brenda, përveç atyre që ditën e nesërme ishin shkruar në Gazetën tonë “Rilindja”!

Ditën e nesërme, datë 07 tetor 1980, në njërën nga faqet e para të “Rilindjes” shkruante:

“Tefta Cami arriti në Kosovë. Ministren e Arsimit dhe të Kulturës të RPSSH e priti Dr. Ymer Jaka”.

Ishte një kumtesë e shkurtër zyrtare, në të cilën, përveç të tjerash, shkruante: “Dje në lokalet e Këshillit Ekzekutiv të Kuvendit të KSA të Kosovës Dr Ymer Jaka dhe Tefta Cami zhvilluan bisedimet e para në një atmosferë të përzemërt. Në bisedë mori pjesë edhe ambasadori i RPS të Shqipërisë në Beograd, Sokrat Plaka”.

“Rilindja” vazhdonte ta njoftonte opinionin për vizitën e Delegacionit të RPS të Shqipërisë, i cili zgjati disa ditë në Kosovë, përmes kumtesave zyrtare!

Njëra nga kumtesat në vijim, ndër të tjerat, shkru­ante: “Sekretari krahinor i Arsimit i Shkencës dhe i Kulturës të KSA të Kosovës, duke veçuar bashkë­punimin e mirë ndërmjet institucioneve arsi­more-shken­core dhe kulturore të të dy vendeve, tha se deri më tash është arritur një nivel i lakmue­shëm i bashkëpunimit dhe se po krijohen kushte që ai të jetë gjithnjë më i thellë, meqë mundësitë janë të hapura. Kjo vizitë, siç tha ai, i kontribuon synimit për një bashkëpunim më të gjithanshëm”!

Kur mbaroi takimi, ata dolën nga kabineti i ministrit Jaka. Unë brofa në këmbë dhe shpejt dola te varësja e kapotave. E mora kapotën e Tefta Camit, mi­ni­­stres së Arsimit dhe Kulturës të Republikës Socialiste Popullore të Shqipërisë, që t’i ndihmoja për ta veshur.

Kështu isha mësuar unë! Kështu bënim në familjen tonë me gjyshin, po edhe me mysafirët që na vinin.

Ministrja Cami më refuzoi!

Insistova për së dyti!

Sekretari Jaka më ndiqte me një buzëqeshje të lehtë dhe sikur më thoshte se po bëja mirë. Më dukej sikur po më thoshte: “Ti, si një djalë i ri, po do t’i ndihmosh një gruaje fisnike, gruas së parë të arsimit dhe të kulturës të shtetit tonë amë!”

Më dukej se sekretari Jaka e kishte “lexuar” gëzimin tim për atë vizitë historike, që vinte nga e para e Shqipërisë për çështje të arsimit dhe të kultu­rës.

Insistova edhe për së treti, por ministrja Tefta Cami nuk më lejoi t’ia mbaja kapotën për ta veshur.

“Do ta bëj vetë”, - më duket se më tha.

Kur erdha në shtëpi, plot gëzim u shpjegova fëmijëve. Vajzave të mia e bashkëshortes u thashë se sot ishte një ditë e gëzuar për mua, meqë e kisha parë për së afërmi ministren e Arsimit dhe të Kulturës të Republikës Popullore Socialiste të Shqipërisë, Tefta Cami.

1)   *Hamza Halabaku: “RRJEDHË MOTESH”, Takime, kujtime ditar... fq. 64, Prishtinë, 2017