Visar Zhiti: Tetor

Nga Visar Zhiti

Vjeshtë e Dyt?.

Kthejmë fletën në Kalendarin e Atjonit, muaj tjetër, Vjeshtë e Dytë, - është quajtur në traditën shqiptare, se ka më ngjyra të saj dhe pem?t japin frutat e vonë.

Dhe njerëzit? Puna e tyre sikur ka më pjekuri e ndjenjë…

1.

DATAT:

Shoh kutitë e datave të tetorit në kalendar, të kujtojnë dhe hojet e mjaltit. Jemi në mesin e stinës së begatë, edhe me poezi…

2.

FJALËT:

Dhe pastaj është thënia e Atjoni, në tre gjuhë, anglisht, italisht, me shqipen tonë mes, si vetë tetori:

“Kur padrejtësia e përgjithshme

bëhet rrugë,

rezistenca është detyrë.”

Është marë nga libri i tij “Për atë që dua(m)”, pra, është thënie nga dashuria. Atij si student i filozofisë i ka pëlqyer, është goditur nga ky mendim i ngjeshur dhe e ka përsëritur, ku fjala padrejtësi nuk mbetet vetëm një emërtim i një të keqeje, ndërsa rezistenca nuk është thjesht vepër kundërshtimi.

Sepse kur padrejtësia përsëritet, ajo kështu edhe lejohet, pra, bëhet dhe zakon dhe më në fund shndërrohet në “rrugë”, por dhe në “sistem” dhe heshtja rrezikon të bëhet bashkëfajtore. Dhe zëri studentor na thërret të mos e pranojmë si normale atë që nuk është e drejtë. Rezistenca bëhet një qëndrim i ndërgjegjes, përgjegjësi përballë kohës.

Kaq shumë aktuale sot, shihet dhe rrugëve të kryeqytetit tonë…

Arritje të qëllimit të mirë në tetor! - urojmë!

3.

Në bazën e faqes së Kalendarit janë ngjyra të Atjonit, dy piktura të tij si dy vjeshta në ballinat e dy librave të babait të tij.

Në kopertinën e parë zotëron e kuqerremta vjeshtore me fashot e së blertës, ndërfutet e verdha, por ka blu qiellore, një harmoni që duket e shpirtit.

Në kopertinën e dytë ka më rrëfim, një qenie si me brirë e bisht të gjatë ndjek nga pas dikë si me flatra, që po shkon drejt diçkaje të bardhë që autori ia ka ngjitur tablosë si copëz tjetër e pikturës.

Metaforë tetori, metaforë e jetës.

Mirë se vini ditë të Vjeshtës së Dytë,

- të vjen të thuash, - plot pjekuri e mendim e gëzime arritjesh!