Visar Zhiti: Maji i ri në kalendarin e atjonit

MAJI I RI

NÊ KALENDARIN E ATJONIT

Kthejmë fletën e Kalendarit… muaji i ri ndonjëherë është si shtëpia e re…

1.

Datat në kutitë e tyre - si dritaret e pallatit. Por ka dhe një ballkon, që të pëlqen se nuk je më brenda dhe ende nuk je jashtë dhe të duket ndërkaq se je në kufirin mes asaj që ikën dhe asaj që vjen.

Po sot është Festa e Punëtorëve, ka një histori që lidhet me protestat, pikërisht ato në Chicago, në 1886, në Haymarket Affair, lexoj, siç duket Chicago është qyteti më i përshtatshëm për të bërtitur... Dhe më pas 1 Maji u shpall festë ndërkombëtare e punëtorëve, shumë e rëndësishme në vendet e Lindjes, me paradat dhe tribunat e kuqe, me rreshtat dhe disiplinën deri në dënim, etj, etj.

Të vjen të buzëqeshësh trishtueshëm, kur ndërmend se muaji që sapo kaloi, fillonte me atë që quhet dita e gënjeshtrave, ka që e kanë çdo ditë atë festë, madje duke e shndërruar në dëm…

Por sot është 1 Maj. Ka dhe një histori tjetër, më vlerësuese, do të thosha për festën, që lidhet dhe Tokën dhe Qiellin që quhet Festa e Punës, pra, pa i ndarë njerëzit në klasa.

SHBA p.sh. më të çmuar ka Festën e Punës.

Edhe Kisha Katolike ka Festën e Shën Jozefit punëtor, të lidhur me 1 Majin. Madje Papa Più XI e ka emëruar dhe Pajtor të të gjithë atyre që punojnë kundër komunizmit, diktaturat e së cilës e shpërdorojnë punën, e trajtojnë si dënim, që e hedhin mbi ata që punojnë, etj, etj.

Po është 1 Maj. Përballë është një pranverë kaq e bukur, e çlirët dhe e begatë që të futet në shpirt.

2.

Kërkimi

është zhveshje”, -

i shkruar dhe në anglish e italisht, të cilat studenti i filizofisë i fliste lirshëm si gjuhën amë, por në këtë maj ajo thënie rreptësisht e shkurtër, ndjehet edhe më e fortë, aq sa dhe e urtë, duhet të heqësh shtresat e shtirjes, të hipokrizisë, të mashtrimit. Nuk mund të mbash maska, sidomos në pranverë, vetëm e vërteta që të mbetet në trup.

Është porosi të riu, kërkimi nuk mbaron kurrë dhe guxon të zhveshë më thellë realitetin…

3.

Dhe piktura në Kalendar, po e Atjonit, vënë në kopertinë e librit “Perëndia mbrapsht dhe e dashura”, e punuar posaçërisht për këtë roman.

Se ka dhe një botë të kthyer përmbys, ku e shenjta dhe e përditshmja sulmohen nga djalli, nuk ka brirë, që ta kuptosh, madje dhe buzëqesh, mbahet dhe modern, të jep dorën, që befas kthehet në kthetër parake.

Por ështê maj. Maji i dashurisë, thotë kenga e popullit, Shko ku është pranvera, ku blerimi nuk di të shtiret. Kërkimi është zhveshje… nga të tepërtat. Mjafton sot të shohesh një degë plot me brilante petalesh. Sa bukur!