Sevdail Hyseni: Misioni i deputetit

Satirike

Misioni i deputetit

U zgjodh një deputet,

nga populli me vota,

dha shumë premtime,

por edhe fjalë të kota.

“Do të jem zëri juaj,

gjithmonë aktiv!”

Sapo mori mandatin,

u bë shumë pasiv!

Në fushatë i njihte mirë,

me emër e me derë,

për vete kërkon zgjidhje,

për qytetarët - asnjëherë.

Deputetit në Parlament,

kurrë mos i qofsha falë,

kur erdhi koha e votimit,

kishte një mision global!

Nuk merrej me të papunin,

as me pensionistin e gjorë,

që pret i kërrusur nga halli,

me letra e fatura në dorë.

Ai nuk merret “pa lidhje”

me këto “çështje të vogla”,

për një burrë kaq madhor,

këto janë “dushk për gogla”!

Dhe kështu po vazhdon

misioni i filan deputetit,

me fjalime fort të mëdha

për shqetësimet e planetit.

Populli mbetet poshtë,

me problemet në derë,

kurse deputeti hip lart,

me privilegje përherë.

Ka një seancë Kuvendi,

që kurrë nuk e harron:

kuptohet, atë të pagës,

ku aty Ai voton!

(Karikatura marrë nga interneti)