Spica Metalike: Musketarët e Luginës

Satirike

MUSKETARËT E LUGINËS

(Humor në stilin popullor)

U nis Baba Dovlet, vetë i tretë,

deri në Nju-Jork për “zijaret”.

I rraskapitur nga pamja fizike,

me barrën e borxheve publike.

Pak për Hagë, pak për Luginë,

në Asamblenë e OKB-së prijnë,

për t’i qarë bashkë hallet lumë,

siç thonë: një udhë e dy punë!

Pse mos të marrin edhe dollarë,

nga mërgimtarët tanë atdhetarë?

A nuk ka thënë Noli ynë i madh,

dikur moti, nga “Shtëpia e Bardhë”:

“Mbaju, Nëno, moj, mos ki frikë,

i ke djemtë gjithandej n’Amerikë!”

Nuk kursejnë aspak për ndihma,

kur të vijnë vëllezërit nga Lugina.

Tani, kur zgjedhjet i kemi në prag,

i ka zënë liderucët, ai, i ziu merak,

për ta zënë një vend n’Parlament,

se pa shqiptarë do të mbetej shkret.

Si ta bëjnë Listën unike me besë,

ashtu si macet kur futen në thes,

me një problem shumë të paparë:

kush nga kandidatët të jetë i parë?

Po sikur të gjendet një mision mësiti,

për ta ndarë mandatin ashtu fifty-fifty?

Do të vijë në shprehje, ai, sikur dje,

në emër të popullit edhe për Atdhe!

E kur Beogradi, atyre ua prish pazarin?

Drejt për në Prishtinë e lakojnë samarin,

të kërkojnë mbështetje këta musketarë,

sepse pa pushtet, jeta për ta është varr.

Janë mësuar të jetojnë gjithnjë në luks,

edhe pse qytetarët i kanë punët “pus”.

me shpresë se dikur do t’mbushen mend,

pasi t’i kenë humbur një nga një dhentë!

(Karikatura marrë nga interneti)