Gjon Keka: Besimi është i lirë, figurat kombëtare janë të paprekshme

Secili ka të drejtë të besojë ku të dojë, por askush nuk ka të drejtë të njollosë apo sulmojë figurat tonë themeltare kombëtare

Nuk urrej asnjë religjion; secili ka të drejtë të besojë ku të dojë dhe të mos besojë.

Në fakt, unë kam lindur në një familje shqiptare myslimane, ka vite që jam kthyer te rrënjët e mia të lashta arbërore, respektivisht te rrënjët e Gjergj Kastriotit, Pjetër Bogdanit, Idriz Seferit etj; i ndjeri babai im ishte një shqiptar i mirë, shok i ngushtë i atdhetarit Metush Krasniqi, pastaj nënën, vëllezërit e motrat, familjarët, kusherinjtë etj., që janë shqiptarë myslimanë, i respektoj e i dua.

Por unë jam kundër dhe gjithmonë do të jem kundër errësirës ideologjike të radikalëve islamikë, të cilët shajnë, njollosin figurat kombëtare dhe mohojnë identitetin kombëtar iliro-arbëror, europian, dhe vetë gjuhën e kombit tonë.

Kështu që vetëm të bashkuar si vëllezër e motra, si në kohën e Gjergj Kastriotit (Skënderbeut), ne mund të arrijmë gjëra të mrekullueshme, ta lulëzojmë atdheun tonë dhe ta integrojmë në familjen europiane, aty ku e ka vendin e natyrshëm.