Ag Apolloni: Në emër të popullit të Kosovës

NË EMËR TË POPULLIT TË KOSOVËS

“In the name of the people of Kosovo, the Panel finds you guilty”, kështu i tha secilit nga katër të akuzuarit shqiptarë gjykatësi Charles Smith III, i cili nuk e njeh gjuhën e popullit të Kosovës, por ia lejon vetes pa pikë turpi të flasë në emër të këtij populli. Ky gjykatës ka qenë pjesë e EULEX-it gjatë viteve 2010-2013. Pikërisht më 2013 Andrew Radin (shkencëtar i lartë politik në RAND dhe zëvendësdrejtor i programit Master në Politikën e Sigurisë Kombëtare në RAND School of Public Policy) ka shkruar artikullin “Analysis of current events: towards the rule of law in Kosovo: EULEX should go”, që është publikuar një vjet më vonë, më 2014, në revistën The Journal of Nationalism and Ethnicity, që botohet nga Cambridge University Press. Lidhjet bëjini vetë!

Është e çuditshme që EULEX erdhi në Kosovë në vitin e shpalljes së pavarësisë (2008), pra pikërisht atëherë kur Kosova u shpall e pavarur dhe më s’kishte nevojë për kurrfarë misioni të tillë. Ardhja e EULEX-it ka qenë kufizim i pavarësisë. Ishte sikur të na thoshin: ju jeni të pavarur, por ne ju kontrollojmë, ju sigurojmë, ju arrestojmë e ju dënojmë. Duket sikur Evropa nuk e dinte ç’kuptim ka fjala shqipe “pavarësi”, as fjala greke “demokraci”, sepse na vunë nën monitorim: Big Brother is watching you. Por, ky Big Brother jo vetëm që s’arriti ta luftojë korrupsionin, por përfundoi disa herë me akuza serioze për marrje ryshfeti. Gjithashtu, u kritikua për rezultate të dobëta në “luftën” kundër krimit të organizuar, për gjyqësor të dobët, për mosvendosje të ligjit në veri të Kosovës, për paqartësi objektivash, dhe, në përgjithësi, për dështim në vendosjen e ligjit.

Më 2010, masha serbe, Dick Marty, raportues i Asamblesë Parlamentare të Këshillit të Evropës, hetoi pretendime për krime të rënda të lidhura me ish-pjesëtarë të UÇK-së, përfshirë pretendimet për trafikim organesh. Ky “njeri” që ka emrin si organ gjenital, aktivizoi EULEX-in, pra edhe Charles Smith III, për të hapur një hetim paraprak. Më 2015, Kuvendi i Kosovës miratoi Ligjin për Dhomat e Specializuara. Më 2018, një tjetër Smith, Jack Smith, mori frenat e Prokurorit të Specializuar, pastaj më 2020 njoftoi aktakuzën kundër katërshes shqiptare të Kosovës. Në fund të vitit 2022, ai Smithi me numrin romak III, u caktua kryegjyqtar i trupit gjykues në çështjen Thaçi dhe të tjerët, dhe, meqenëse kishte ndenjur nja tri vjet në Kosovë, kujtoi se mund të dënonte njerëz në emër të popullit të Kosovës. Ai, dhe krejt bota, duhet ta kuptojnë që asnjë shqiptar i Kosovës nuk e ka mbiemrin Smith. Ndoshta, populli i Kosovës, sikur të kishte mundësi, ata katër të akuzuarit do t’i rrihte me kamxhik për do punë nga viti 2000 e këndej, por jo për periudhën e luftës. Prandaj, është cinizëm i patolerueshëm që gjykatësi i huaj t’i dënojë tanët në emrin tonë. Ata mund të dënoheshin me këtë formulë: Në emër të EULEX-it..., Në emër të spiunëve të Kosovës,... Në emër të ndonjë familjeje të dëmtuar, ... Por, kurrsesi në emër të Kosovës. Charles, Jack, Dick e të tillë të tjerë, mund të na akuzojnë, mund të na njollosin, ndoshta edhe mund të na vrasin, por në emrin tonë nuk mund të flasin. Kosova është e pavarur dhe është e shqiptarëve. Minoritetet dhe miqtë i trajtojmë mirë, sepse mikpritja dhe mirësjellja është e shenjtë për ne, por s’lejojmë që të tjerët të flasin në emrin tonë, sidomos jo ata që as gjuhën shqipe s’e dinë.

Kjo farsa e sotme duhet t’ua hapë sytë shqiptarëve të Kosovës që t’i forcojnë institucionet e veta dhe t’i besojnë shtetit të vet. Partitë duhet të bashkohen dhe ta zgjedhin presidentin, e të mos e dëmtojnë buxhetin me shkuarje kot në zgjedhje. Kosova është çliruar më 1999, kurse më 2008 është pavarësuar. Tash është koha të bëhemi bashkë, t’i mbledhim forcat, t’i forcojmë institucionet, ta forcojmë shtetin. Kosova është shtet dhe të huajt mund t’i ndihmojnë këtij shteti, por s’mund ta dënojnë askënd në emër të këtij shteti, në emër të këtij populli.

Në emër të popullit të Kosovës do të flasë vetëm populli i Kosovës.

https://www.facebook.com/profile.php?id=100094275043325