Gjon Keka: Kodi gjeopolitik i orientimit perëndimor - nga Gjergj Kastrioti te Ibrahim Rugova

Kodi gjeopolitik i orientimit perëndimor: Nga Gjergj Kastrioti te Ibrahim Rugova

Historia e kombit tonë ka prodhuar dy figura të papërsëritshme, të cilat mishërojnë të njëjtin mision ekzistencial: lirinë, paqen dhe orientimin e palëkundur drejt familjes europiane. Presidenti vizionar dhe i urtë i Dardanisë, Ibrahim Rugova, dhe Kryeheroi, udhëheqësi i papërsëritshëm i Arbërisë dhe mbrojtësi i civilizimit perëndimor, Gjergj Kastrioti, ndajnë të njëjtën linjë gjenetike në strategjinë e tyre kombëtare.

Ashtu sikurse Gjergj Kastrioti mbajti lidhje të fuqishme me Papët e kohës, veçanërisht me Kalikstin III dhe Piun II – i cili i dha titullin më të lartë që një arbëror ka mbajtur ndonjëherë, atë të Atletit të Krishtit (Athleta Christi) dhe Komandantit të përgjithshëm të ushtrisë së Europës – ashtu edhe Presidenti Ibrahim Rugova ndërtoi një lidhje të pathyeshme e shpirtërore me Papa Gjon Palin II.

Ky nuk ishte thjesht një veprim diplomatik i rastit, por një kod i qartë gjeopolitik. Udhëheqja e urtë e Dr. Ibrahim Rugovës arriti ta mbante popullin të bashkuar rreth kështjellës së identitetit europian, pikërisht atëherë kur mbijetesa jonë rrezikohej më së shumti. Ky orientim bëri që bota perëndimore, e prirë nga Shtetet e Bashkuara të Amerikës, të ndërhynte për të sjellë shpëtimin dhe pavarësinë e Kosovës.

Si në epokën e Skënderbeut, ashtu edhe në atë të Rugovës, vërtetohet se lidhja e natyrshme dhe jetike e kombit tonë është ajo me Vatikanin, familjen europiane dhe ShBA-në. Sot, në një kohë turbullirash gjeopolitike, mungesa e këtyre dy gjigantëve ndihet thellë. Mbrojtja e qenies sonë përmes urtësisë intelektuale, drejtësisë dhe ruajtjes së dinjitetit europian mbetet testamenti më i madh që ata na lanë.