Cikël poetik nga Hajdin Morina

KU JANË NJERËZIT

Ujqit nuk janë të dëmshëm
Ia mësyjnë vathës në fshat
Por sakaq ikin
Hyjnë në përrallë
Vënë në gjumë
Fëmijët e një bote

Nuk janë të dëmshme
Dhelprat as shqiponjat
As qentë natyrisht
Ata ruajnë shtëpinë

Për besë të moçme
Nuk janë të dëmshme
Kafshët e malit

Një poezi të bukur
Do ta bëj pastaj për njerëzit
Janë pemët më të bukura
Të Planetit

JANINA

Naim Frashëri aty
Ali Pashë Tepelena po
Ti qysh nuk erdhe
Fol Janinë ku mbete

Na mori Deti
Qiell e tokë moj Shqiponjë

A nuk patëm gjak Rozafe
A në mur nuk vumë gurë

Na ra Deti s’na la urë

KUR NUK KEMI DRITA NË FSHAT

Kur nuk ka drita në fshat
Nuk bien yjet
Bëjnë zjarr më shumë
Të kenë dritë librat
Fëmijët dhe njerëzit e sëmurë

Zemra Shqiptare

Cikël poetik nga Hajdin Morina