Kastriot Dervishi: Fan Noli, vizita e parë në Korçë si peshkop

“Kurrë dhe kurrën e kurrën të mos harrohet 9 dhjetori 1921”-shkruan gazeta “Koha” e Mihal Gramenos, dita kur për të parën herë shkeli në Korçë shenjtëria e tij peshkopi Theofan, themelues i Kishës Ortodokse Autoqefale Shqipe, peshkopi i Bostonit, dhespot i Krujës dhe eksaku i gjithë lirisë. Sipas gazetës, populli i Korçës, pasi përzuri Jakovin, i telegrafoi peshkopit Theofan, të cilin e priti në Vlorë një komision i kryesuar nga Llambi Bimbli. Në korçë i pari foli Atë Vangjel Çamçe në emër të 50 priftërinjve të rinj, i cili i premtoi mirëseardhjen, besnikëri e përunjësi. Koço Grameno, drejtor i “Kohës” foli në emër të katundarisë; në mitropoli foli kryetari i pleqësisë Llambi Mborja dhe profesor Sotiri. Banda muzikore e “Vatrës” ishte po ashtu e pranishme. Noli predikoi bashkim, dashuri dhe punë për Shqipërinë.