Asllan Dibrani – Luani: Provokim në zemër të Kosovës - Flamuri i një shteti të huaj në Mitrovicë dhe policia që e ruan atë

Provokim në zemër të Kosovës: Flamuri i një shteti të huaj në Mitrovicë dhe policia që e ruan atë

REAGIM PUBLIK

Nga Asllan Dibrani – Luani

Ngjarja e fundit në Mitrovicë, ku policia e Kosovës është angazhuar për të ruajtur flamurin e Turqisë pasi ai është grisur dy herë në një tendë iftari, nuk është një incident i zakonshëm. Kjo është një çështje që prek drejtpërdrejt dinjitetin kombëtar dhe ndjeshmërinë historike të popullit shqiptar.

Unë, Asllan Dibrani – Luani, e them qartë dhe pa asnjë hezitim:
vendosja e flamurit të një shteti të huaj në një hapësirë publike në një qytet shqiptar është një provokim i hapur dhe një veprim i papranueshëm.

Shqiptarët janë një popull që kanë kaluar shekuj të tërë nën pushtime, terror dhe përpjekje për zhdukje. Historia jonë është e mbushur me masakra, djegie të fshatrave, zhdukje familjesh dhe represion të egër. Ky popull është martirizuar pa fund për të mbrojtur identitetin, gjuhën dhe flamurin e vet.

Prandaj është e pakuptueshme dhe e papranueshme që në një qytet shqiptar të vendoset në mënyrë demonstrative flamuri i një shteti tjetër.

Askush nuk është kundër ndihmës humanitare dhe askush nuk është kundër bamirësisë. Por bamirësia nuk ka nevojë për ekspozim të flamujve të huaj në mes të qyteteve shqiptare. Nëse dikush dëshiron të ndihmojë qytetarët, le ta bëjë me respekt për vendin dhe popullin ku vepron, jo duke ngritur simbole shtetërore të huaja në hapësirat publike.

Le të jemi të sinqertë:
sikur në një qytet ku jetojnë shqiptarë të vendosej flamuri i Serbia, reagimi do të ishte i menjëhershëm dhe i fuqishëm. Pse atëherë duhet të pranohet si normale vendosja e çdo flamuri tjetër të huaj në territorin shqiptar?

Kosova është shtet i pavarur dhe sovran. Në hapësirat publike të saj duhet të respektohen para së gjithash simbolet e këtij shteti dhe sakrificat e popullit që ka derdhur gjak për këtë liri.

Në vitet e fundit po shohim gjithnjë e më shumë përpjekje për ndikime ideologjike dhe politike në shoqërinë shqiptare përmes aktiviteteve fetare dhe financimeve të ndryshme nga jashtë. Shqiptarët nuk duhet të lejojnë që hapësira e tyre kombëtare të shndërrohet në terren propagande dhe ndikimi politik nga shtete të tjera.

Flamuri i vendosur në atë vend duhet të hiqet, por kjo duhet të bëhet në mënyrë ligjore dhe institucionale.
Nuk është e drejtë që një simbol i huaj të vendoset në një hapësirë publike dhe pastaj t’u imponohet shqiptarëve sikur të ishte diçka normale.

Institucionet e Kosovës duhet të sqarojnë një pyetje shumë të thjeshtë:
kush e vendosi atë flamur, me çfarë leje dhe mbi çfarë baze ligjore?

Nëse ai është vendosur pa procedura të rregullta, atëherë ai duhet të largohet menjëherë nga autoritetet kompetente.

Çdo shqiptar që ka ndjenjë për identitetin dhe historinë e këtij populli nuk mund të jetë indiferent kur në hapësirat publike të Kosovës vendosen simbole të huaja në mënyrë demonstrative.

Shqiptarët janë popull mikpritës dhe mirënjohës për çdo ndihmë. Por mikpritja nuk do të thotë nënshtrim dhe as pranimi i imponimit të simboleve të huaja në tokën shqiptare.

Kosova është ndërtuar mbi gjakun dhe sakrificat e bijve dhe bijave të saj.
Dhe kjo tokë meriton respekt të plotë për identitetin, historinë dhe dinjitetin e popullit shqiptar.